28
Jisasa Malunya Sakateamo Doko
(Mk 16:1-8; Lk 24:1-12; Jn 20:1-10)
1 Sambata gii doko pateamopa, yuu yongalanya piamopa, Maria Magadala tange dokopa, Jemesa Jonepanya endangi Mariapame malu doko, kanja peambi. 2 Gii dokopa titiwali andake mende minatala, Kamongonya enjele mende, kaiti-kisa katao isa ipupala, kana doko kapilya mina-mina pyoo nyoo kapya latala, dokonya ketae petea. 3 Baanya lengelyapi doko yuu-wapaka pingili pia. Dee baanya yonge pee doko, etete kyoo lao pole-pole pia. 4 Dopa piamo kandatala, yanda singi malu isetae kateamino dupa, walu lao paka kaeyami dokome, kumapae joo lombapae siami. 5 Dokopa enjele dokome enda dolapo lamaiyoo, “Nyakambame Jisasa pyao yukuiyamino doko, kutilyambino lao nambame masilyona, paka nakaeyalapape. 6 Wamba baa sakatato leamoli pyoo sakatatalamona, seteamino panda dakenya nasilyamona, kanja ipupa. 7 Kandatala nyakamba baanya disaipolo dupa katatamisa, yapa pupala, baa malunya sakatatala, Galilea wambao pelyamona, nyakamame dokonya pao kanjaminona, lamaiyapale lao, langya epona” lea. 8 Dopa leamopa, enda dolapo paka kaeyambinoaka doko, auu kaeyapaeme tumbiamopa, malu doko yapa yakinatala, alo pyao disaipolo dupa lamaiya peambi. 9 Alo pyao peambinopa, Jisasame kaitinisa kandanyetala, “Wanalapo, yongama etete!” lea. Dokopa dolapome pao, Jisasa mokonya kopetala mambo piambi. 10 Dopa piambinopa, Jisasame enda dolapo lamaiyoo, “Nyakamba paka nakaenya, nambanya kaiminingi dupa katatamisa pupala, Galilea pena lamaiyepape. Dupame dokonya namba kanjaminona” lea.
Yanda Singi Dupame Sambo Lena Lao Pii Wasoo Maiyamino Doko
11 Enda dolapo peambinopa, malu isetae kateamino yanda singi dupanya mendapuame, taono dokonya pupala, piamo dupa pitaka pitisa mupa dupa lamaiyami. 12 Dokopa pitisa mupapi, Judamanya isingi akalipi, dupame pii wasoo nyepala, yanda singi dupa muni longo mendapu maiyami. 13 Maitala pii dapa lena lamaiyami: “Nyakama luu palipumanopa, Jisasanya disaipolo dupa kuka ipupala, baanya yonge doko nyoo pamini-lamona lapape” leami. 14 Gapena dokome pii dake setamopa, naimame baa pii auu kaena lao lamaitamanopa, nyakama-kisa pundu mende naipapomona” leami. 15 Dopa lateaminopa, yanda singi dupame muni dutupa nyepala, lena leaminoliaka pyoo, lao taeyami. Pii doko lao Juda dupa-kisa taeyapae siamo doko, enepapupi dopaka pyoo taeyapae silyamo.
Wai Pii Epe Doko Yuu Pitakanya Lao Taeyalapape Leamo Doko
(Mk 16:14-18; Lk 24:36-49; Jn 20:19-23; Ap 1:6-8)
16 Disaipolo 11-pela dutupa, Galilea pupala, wamba Jisasame manda mendenya pena leamo dokonya peami. 17 Dokonya pao Jisasa kandatala, baanya kenge minalyoo mambo piami. Dopa piaminoaka doko, mendapuame mona lapo paleami. 18 Dokopa Jisasa nyakama kateamisa ipupala dokaita lamaiyoo, “Yuupi kaitipi dupa pitaka isepe lao, Goteme pupu lapae doko namba ditiana, 19 nyakama pupala, akali tata paliu pelyamo dupa pitaka, nambanya disaipolo jina lao pii lamaiyepape. Pii lamaiyoo pituu, Takange dokopi, Ikiningi dokopi, Oli Spirit dokopi, dutupanya kenge doko lao, kaimbu pyakamaiyepape. 20 Nambame pii manapi langio dupa pitaka, minina lao mana lamaiyepape. Namba nyakama-pipa apataka katao pao, yuu etatamo gii doko nyetamana,” Jisasame lea.