WAI PII EPE
MAKEME
PEPA PIAMO DOKO
Pii Wambao Kandapenge Dupa
Jisasa kumateamopa, ee kana 70 dosale, wai pii epe doko Makeme Giriki piimi wambao pepa pia. Jisasa baa-kisa pupu lapae siamopa, kalai tata dupa pitaka pia. Baame endakali dupa mana lamaiyoo, imambu koo dupa watao pyao, endakalinya koo dupa kunanya nepakamaiyoo piamopa, naimame kandeama. Jisasa baa tangeme baanya kenge doko Akalinya Ikiningina lea. Baanya lete katenge epe dokome, endakali dupa pyoo nyalanya, epelyona lea.
Makeme Jisasanya kalai piamo longo dupa atome lao pepa pyao pituu, Jisasanya pii leamo dupa longo lao pepa napia. Baame Jisasanya atome pii etasoo pituu, baanya yandapipili dupame poko itanya pyao yukuiyaminopa, kumapala, yuu gii tepo dokonya sakatatala, baa ketae kaiti-kisa peana lao pepa pia.
1
Jone Kaimbu Pingi Dokome Pii Lamaiyamo Doko
(Mt 3:1-12; Lk 3:1-9,15-17; Jn 1:19-28)
1 Gote Ikiningi Jisasa Kraisanya wai pii epe doko dapa pyoo tee pia.
2 Propeta Aisaiyanya buku dokonya Goteme leamoli pyoo, dapa lao pepa pyapae singi: “Salapape! Nambame nambanya wai akali doko wambao pena latopa, baame Mesaeya dokonya kaitini doko depa lakamaita. 3 Akali dokome endakali napalenge yuu mendenya katapala, wii lao katata. Baame wii lao, 'Kamongonya kaitini doko depa lakamaiyepape. Kaitini koeyapae dupa tolasakamaiyepape' lao katata.” 4 Goteme leamoli pyoo, Jone kaimbu pingi doko endakali napalenge yuu dokonya ipao katapala, “Nyakama mona kapilyetala, kaimbu nyalapa. Dopa pitaminopa, Goteme nyakamanya koo dupa kunao nepekena” lao katea. 5 Dopa piamopa, Judia tangepi, Jerusalema tangepi, longo dupa baa kateamo dokonya pii sala peami. Pupala nyakamanya koo dupa lao panata piaminopa, baame endaki Jodane dokonya kaimbu pyata pyakamaiya.
6 Jone baa yonge pee kamele itimi wasepaepi, matapu bulumakao yanungimi wasepaepi, dupa pyoo katea. Baa paiyombapi, ambulya kakasa lyingipi, dupa nao katea. 7 Baame endakali dupa lamaiyoo, “Akali maitapyao epelyamo dokonya pupu lapae dokome namba ita minao. Nambame luma lakapala, baanya moko pee kende tata lakamaiyanya, namba epe daa. 8 Nambame endakimi nyakama kaimbu pyekelyona, baame Oli Spirit dokome kaimbu pyakatana” lea.
Joneme Jisasanya Kaimbu Pyakamaiyamo Doko
(Mt 3:13-17; Lk 3:21-22)
9 Gii dokopa, Jisasa baa yuu Galilea, taono Nasarete katao epeamopa, endaki Jodane dokonya Joneme Jisasanya kaimbu pyakamaiya. 10 Jisasa kaimbu nyepala, endaki ketae pyakalyiamopa, kaiti saa papa laloo petala, Oli Spirit doko yaka maiyolee joo, lanao ipao baa-kisa petea. 11 Dokopa kaiti-kisa katao pii mende lea dokome lao pituu, “Emba nambanya Ikiningi mona setenge doko. Namba tange emba etete auu kaengena” lea.
Sataneme Jisasa Minao Makande Piamo Doko
(Mt 4:1-11; Lk 4:1-13)
12 Dokopa endakali napalenge yuu mendasa, Oli Spirit dokome Jisasa lanyoo pea. 13 Pao mena yanapi kapu katengema yuu dokonya yuu gii 40 kateamopa, Sataneme baa minao makande pia. Dokopa, enjele dupame ipao baa nisiami.
Jisasame Kalai Tee Pyao Piamo Doko
(Mt 4:12-17; Lk 4:14-15)
14 Jone kaimbu pingi doko anjeteaminopa, Jisasa Galilea pupala, Gotenya wai pii epe doko lamaiyoo katea. 15 Baame lao pituu, “Goteme wamba gii seteamo doko indupa ipao palipilyamo. Gotenya isingi mate doko tengesa ipatelyamona, nyakama mona kapilyetala, wai pii epe doko masoo minalapa” lea.
Jisasame Pisa Nyingi Akali Kitomende Epena Leamo Doko
(Mt 4:18-22; Lk 5:1-11)
16 Jisasa Galilea pete lemba dokonya pao kandeamopa, pisa nyingi akali Saimonepa, kaiminingi Andruapame umbene nuu mende endaki pete dokonya pyandao pisa nyoo kateambi. 17 Jisasame dolapo lamaiyoo, “Nyakambame pisa nyingimbali pyoo, endakali nyalapale mana langitoo, namba watao ipupa” lea. 18 Gii dokopaka akali dolapome umbene nuu dupa yakinatala, baa watao peambi. 19 Umbisale pateaminopa, Jisasame akali Sebedi ikiningi Jemesa, Jonepa sipi andaka umbene nuu tambuo peteambino kandea. 20 Kandatala baame dolapo epena lea. Dopa leamopa, nyakambanya takange Sebedi, kalai akali dupa-pipa sipi dokonya yakinatala, Jisasa watao peambi.
Jisasame Imambu Koo Mende Watao Piamo Doko
(Lk 4:31-37)
21 Jisasame akali kitomende dutupa-pipa pao Kapename pyakameami. Pyakamatala Sambata gii dokonya Judamanya lotuu anda dokonya kolandatala, Jisasame endakali dupa mana lea. 22 Baame mana leamo doko, Mosesanya loo mana nyepae akali dupame mana lengemali pyoo laa naeya. Baa-kisa pupu lapae singi joo mana leamosa, endakali dupame sepala, paka kaeyao walu leami. 23 Gii dokopa, akali imambu koo paleta mende peteamo dokome wii lao, 24 “Nasarete tange Jisasa, emba Gotenya akali anali latae doko nambame kandengena, embame naima aipa pyaa epepe? Naima minao koeyasalanya epepe?” lea. 25 Dokopa Jisasame baa pyalanya lao, “Embame embanya nengekaita lyokatala, akali dake yakinatala puu!” lea. 26 Dopa leamopa, imambu koo dokome akali doko minao walu lasetala, ae andake mende lao akali doko yakinatala pea. 27 Peamo kandatala, endakali dupa pitaka etete paka kaeyao walu latala, mende lamai-lamai pyoo, “Dake aipa pilyape? Dake mana waka pupu lapae singi mende-lamo! Baame imambu koo dupame mende pina lelyamopa, lelyali pingima-lamona” leami. 28 Dokopa yuu Galilea dokonya Jisasame piamo dupa pupae lao taeyami.
Jisasame Endakali Yaina Pyapae Longo Mee Jakamaiyamo Doko
(Mt 8:14-17; Lk 4:38-41)
29 Jisasa, Jemesa, Jonepi, dutupa Judamanya lotuu anda doko yakinatala, Saimonepa, Andruapanya andaka apata peami. 30 Pao pyakamalu piaminopa, Saimonenya enda imange doko yonge itaita pimupa, yaina silyamona lao Jisasa lamaiyami. 31 Lamaitiaminopa, enda doko siamo dokonya pupala, Jisasame baanya kinginya minatala sakatasia. Dokopa yonge itaita piamo doko mee jeteamopa, enda dokome dokaita nee nyoo, nena lao maiya.
32 Niki landa piamopa, endakali mendapuame yaina pyapaepi, imambu koo paletapi, dupa laminao baa kateasa epeami. 33 Endakali taono tange dupa pitaka anda kambu dokonya kapatae kateami. 34 Endakali yaina tata longome pyapae dupa baame mee jakamaiya. Dee baame imambu koo longo dupa watao pyakamaiyaka. Imambu koo dupame baa kandengema dokonyana, dupame pii laa naena daa lea.
Jisasame Yuu Andake Galilea Dokonya Pii Lamaiyamo Doko
(Lk 4:42-44)
35 Yuu ene yongalanya piamopa, Jisasa sakatao, endakali napalenge yuu mendenya pupala, dokonya loma soo katea. 36 Kateamopa, Saimonepi, endakali apata kateamino dupame baa kutao peami. 37 Pao kandatala baa lamaiyoo, “Endakali pitakame emba kutilyaminona” leami. 38 Jisasame dokaita lamaiyoo, “Nambame endakali dupa pitaka wai pii epe doko lamaipenge, tenge dokonya epeona, taono yakane tengesa silyamo dokaitanya apata pii lamaitoo mua” lea. 39 Dopa latala baame Galilea yuu doko pitakanya pao, Judamanya lotuu anda dupanya pii lamaiyoo, imambu koo dupa watao pyakamaiyaka.
Jisasame Akali Mendenya Kopetali Mee Jakamaiyamo Doko
(Mt 8:1-4; Lk 5:12-16)
40 Akali kopetali mende Jisasa kateasa ipao luma lakapala, baame kyeto joo lamaiyoo, “Embame nambanya yaina dake mee jakalapo lao maseteno doko, mee jakalapenona” lea. 41 Dokopa Jisasame akali doko kondo kaeyapala, kingimi watandatala baa lamaiyoo, “Nambame embanya yaina doko mee jipyali lao masilyona, epapu embanya yaina doko mee jekelyona” lea. 42 Dopa lalu piamopa, akali dokonya kopetali yaina doko mee jia. 43-44 Dokopa Jisasame kyeto joo baa lamaiyoo, “Nambame embanya pyakalo doko mende lamaiya naenya, pitisa dokome emba kandena puu. Pupala Mosesame wamba mana seteamoli pyoo, dopale mende Gote kundi maitinopa, endakali dupame embanya yaina doko mee jipya-lamo lao kandenana” lea. 45 Jisasame dopa leamoaka doko, akali dokome pupala, piamo dupa lao taeya. Dopa piamo dokonya, Jisasa taono mendenya panao napenya, endakali napalenge yuu dupanya katea. Kateamopa, endakali dupa yuu pitakanya katao baa kateasa epeami.