1 Sera'a 127ni'a zgegfu mani'ne. 2 Sera'a Kiriat-arba fri'ne. Menina ana kumara Hebronie hu'za nehaze, Kenani mopafine. Hankino Abrahamu'a tusi'za huno Seranku asunku nehuno zvi ate'ne. 3 Sera fri kerfare Abrahamu mani'nereti otino Hiti mofavre'zga amanage huno ome zamantahige'ne, 4 Tamagra antahi'naze, nagra mopa agafa nera omni'noe, amne tmagri mopafi emani'noe. A'nimo fri'nege'na tmantahi'negoe, mopa miza hu'na anampi ome asenteku nehue. 5 Hiti mofavre'mo'za amanage hu'za Abrahamu asmi'naze. 6 Kma antahio ra ne'moka, kagra ra kvane tagrane mani'nane. Knare'ma huno kvesinia matipi asenteku'ma hananketa, amne kamigahune, aza'o nafa'a mani'nenimo'a i'o osugahie. Amne kamina ana matimatipina ome asentegahane. 7 Abrahamu ana mopafi vahera, Hiti mofavre'mokizmi zamufi otino mopafi kepri huno muse hu'ne. 8 Hanki antahiho! A' ka'ama asentesane hanuta, nagri nagi erita vuta Zohari nemofo, Efroni'ene ome kegaga hiho. 9 Ome antahigenkeno Makapela mopa nminke'na, Ana mopa agentega havegampi Serana ome asentaneno. Ana mopamo'a nagri'za segahie. Hanki knarere hinkena'a hakare'amota tamufi knare hu'na miza hugahue. 10 Hankino, Efroni'a ana Hiti mofavre'mokizmi amunompi mani'ne. Efroni'a Hiti ne'kino Hiti naga rankuma'mofo kafante emani'naza vahe'mokizmi zamagesafi, ke nona'a huno Abrahamu asmi'ne, 11 Efroni'a amanage hu'ne. Kma antahio ra ne'moka, havegana miza osegahane, e'i ana mopane amne kmigahue, maka'a naganimokizmi zamufi huvempa hu'na meni ana mopa kmigahue. Kamisnugenka anampi fri kerfa ome asente'gahane. 12 Anage higeno Abrahamu'a maka vahe zamufi kepri hu'ne. 13 Abrahamu ana vahe zamufi amanage huno Efronina asmi'ne. Efroniga muse (plis) hugantoanki kma antahio, nagra menina ana mopa miza hugahue. Hanki zgoma kamisnuana, erige'na ana mopafi fri kerfa ome asenta'neno. 14 Efroni'a ana naneke nentahino amanage huno Abrahamuna nona'a asmi'ne. 15 Kma antahio, ra vahe'moka, ama mopamofo mizama'a 400ti'a silva me'neanagi amu'nonti'afina osi'zane. Amne fri kerfa ome asentegahane. 16 E'inage nehigeno Abrahamu'a nentahino, mago'a zgo'a refko huno Efroni eme ami'ne. Efroni'a agra'a kehia avamente fo hantreti'a (400) silva zgo anama'a hakare vahe zamufi eme ami'ne. 17 Efroni mopa Makapela, Mamre kaziga avugosa hunte'ne. E'i ana mopafi me'nea havegane, zafane, mopane, hakarezana ami vgare'naze. 18 Hanki hakare'zana Abrahamu nfa'a hinogu Hiti ne'mofavre nagama ran kuma'mofo kahante ke refko nehza vahe'zmufi ami vgare'naze. 19 E'ina huteno Abrahamu'a Serana Makpela havegampi, Mamre kaziga avugosa hunte'nea have'gampi ome asente'ne, ana kuma agi'a Hebron hu'za nehaza kumare, Kenani mopafi me'ne. 20 Mopane havegane anampi me'neana, Abrahamu naga asezmante mope hu'za Hiti mofavre naga'mo'za ami vgare'naze.