1 Anumzamo amanage huno Jekopuna asmi'ne, Otinka, anagamu Beteli vunka anante umanio, anante Anumzamofo ita tro hunto, ko'ma negfu Iso koro frenka nevankena kagrite fore hugaminoa kumate vuo. 2 Jekopu'a amanage huno naga'ane, agrane nemnizamokizmi zamasmi'ne. Maka'a havi anumzana netreta, tamagu'a retro nehuta, kukena timia antaniho. 3 E'ina hutenketa otita ete anagamu Beteli vamneno. E'i anante Anumzamofo have ita tro hugahue, antahima nenamino kna'zampinti nza nehuno hakare kaziga nevugeno nagrane nemanie. 4 E'inage hige'za maka'a vahe'mo'za havi anumza zimine, zamegesafi renentaza rinine eri'za Jekopu eme amizageno erino Sekemu kuma tva'onte oak zafa agafafi keri kafino asente'ne. 5 Jekopu'a amohe'zane kama nevzageno'a, Anumzamo Kenani vahera zamazeri koro hige'za zamariri'za mago'zana huozamte'naze. 6 Jekopu'ene vahe'ane ana maka vu'naze. Nevu'za Lusi uhnati'naze, mago agi'a Beteli'e, ana mopa Kenani me'ne, 7 Jekopu'a havere ita tro hunteno agi'a El Beteli hu'ne, na'ankure nefu Isonku koro'ma freno nevigeno Anumzamo korapara anante fore humi'neane, 8 anante mani'nageno Rebeka avate eri'za ara Debora'a frige'za oak zafa agafafi Betelia ohenkamu'a asente'naze. Nehu'za agi'a Alon Bakut hu'za ante'naze. Zamagra kefina, zavi zafe hu'naze.

9 Padan-aramuti ete ne-egeno Anumzamo Jekopuna mago'ene fore humino, asomu hunte'ne. 10 Anumzamo amanage huno asmi'ne, Kagi'a Jekopu'e, mago'ene Jekopu'e osugahaze, hagi menia kagi'a Israeli'e huno megahie. Israeli'e huno Agra ante'ne. 11 Anumzamo mago'ene asmi'ne, Nagra hihamu'ane Anumzane, fore huhakare hunka rukzi hunka, rankuma (nation) nente'za aru moparegane umani emani nehu'za atru huza rankuma (nations) antesageno, kagehe'impinti hakare kini vahera fore hugahaze. 12 Mopa Abrahamune, Aisaki'gizni Nagra znami'noe, Nagra kagri kmigahue, Nagra henka ama mopa kagehe'i zamigahue. 13 Huteno Anumzamo Jekopu ene keaga hu'nea kumateti atreno ete Agra mreri'ne. 14 Jekopu'a ra have erino eme retru rente'ne, ana haverera waini ti tagino ofa nehuno, oliv masve erino eme neragino, Anumzane naneke hu kumare huno hu'ne. 15 Jekopu'a Anumzane keaga hu'nea kuma'mofo agi'a Beteli'e huno ante'ne.

16 Jekopu'a naga'ane Betel atre'za, Efrata kumate vuku nevzageno kantega Resolina mofavre ante kna'amo egofta higeno tusi atagu hu'ne. 17 Mofavre'za negegeno tusi atagu nehigeno anante aza huno kse aminaku avega huno mani'nea a'mo amanage huno asmi'ne, ne'mofavre ksentananki kagogogu osuo. 18 Resoli'a ksenteteno fri'za nehuno ana mofavre agi'a Ben-oni'e (nansunku mofavre) huno ante'ne, nehigeno Jekopu'a Benjameni'e (nza tamaga mofavre) huno ante'ne. 19 Resoli'a frige'za Efrata vu kamofo ankenare asente'naze, (mago agi'a Betrehem.) 20 Jekopu'a ra have erino vuno Resolima asente'nea kerimofo agofetu ome retru re'ne, menina Resoli kerire retru re'nea havea amne me'ne. 21 Israeli'a (Jekopu'a) viazamo mani'ne'za afu kva nehza no (tawa) Ederi agatereteno seli nonku'ma omegino mani'ne. 22 Anampi umani'nageno Israelina (Jekopu'na) agonesa ne'amo Rubeni'a, nefana mago a'a, nenaro eri'za erinente'a a' Bilha anteno mse'nea, ke Israeli'a antahi'ne.

23 Ama Jekopuna 12fu'a ne' mofavre zamagi'e. Lea ne'mofavre Rubeni'a Jekopuna zge'e, anante Simioni'e, Levi'e, Juda'e, Isaka'e, Zebuluni'e. 24 Resoli ne'mofavre, Josefe ene Benjamenike. 25 Resoli eri'za a'mo Bilha znante'nea ne'mofavre Dani'e magora Naftali'e. 26 Lea eri'za a'mo Zilpa znante'neana Gati'e, Aseri'e Jekopu Padan-aram mani'neno zamante'ne.

27 Jekopu'a nefa hirega Mamre Kiriat-arba e'ne, e'i Hebron mago agi'e, ana kumara nefa Abrahamu ene Aisakike zoka umnina'a kumare. 28 Aisaki'a wan hantret eiti'a (180) zgegfu mani'ne. 29 Aisaki'a zaza kna maniteno ozafa reteno rentermino, vgare asimu antete'no frino agehe'zane agigo mo'zane umani'nazarega vu'ne. Jekopuke, Isoke eri'ne ome asente'na'e.