1 Daina'a Jekopune, Leagini mofakino mago kna a'ne zamagenaku vu'ne. 2 Sekemu'a Hamori nemofo'e, Hivai vahe'mokizmi kva (prins) nekino negeno kefoza huntenaku, hankvetino avazu huno kefoza hunte'ne. 3 Sekemu'a, Jekopu mofa Daina avesinenteno, akoheno masve kefinti ke humi'ne. 4 Sekemu'a nefa Hamori asmi'ne, Ama mofara a' erinaku nehuanki avre namio. 5 Jekopu'a mofa'amofo Daina kefo avu'avazama hunte'nea ke nentahino, akoheno ke osu mani'nege'za, mofavre'amo'za lama afu kva nehzaregati e'naze. 6 Hamori'a Sekemu nefa Jekopuntega ana hazenke'mofo keaga hunaku vu'ne. 7 Jekopu amohe'za sipisipi afu kva hunareti, ana hazenke zamofo ke nentahiza, kumate ene hnatiza, zamagua kna nehzageno tusi zamasi vazi'ne. Na'ankure, e'inahu kefo avu'avazana Israeli vahepina osugaza, Jekopu mofara hunte'naze. E'inahu avu'avazana osugaza hu'ne. 8 Hianagi Hamori'a zamasmi'ne. Sekemu'a agu'areti avesinenteno e'i ana avu'avazana hu'negu, muse hurmantoanki aminkeno a' erinteno. 9 Mofa omiami hugahune, namohe'za mofaneka'a, a' erisageno, kamohe'za, mofa'nenia a' erigahaze. 10 Tamagra, tagrane manineta, mopatifina tamevesite vano nehutma, nazanoma troma hunaku'ma hanutma amne tro hugahaze. 11 Sekemu'a Jekopune amohe'igizmia amanage huno zamasmi'ne. Tamagrama knarere hnage'na, inankna zanku tamavesisia zana nagra tamigahue. 12 Mofa tamimofonte zgo fenonku'ma agima ahenantesazana, kema hnazagante tamigahue, hagi mofa tamia naminke'na a' eri'neno. 13 Jekopu amohe'za Sekemune nefa Hamorigizni reznavatga hu'naze, na'ankure nezmasaro Daina azeri haviza hu'negu zamagesa nentahiza, kea hufatgo osu'za havige hu'naze. 14 Zamagra znasmi'naze, tagra e'inahuzana osugahune. Oku avufga tga osu vahe'mo'ma nerasaro a' erisigeno'a, tagaze hugahie. 15 Mago'zana oku kvufama tga osu'nana kazigati nehune, tagra hu'nonakna huza, kagri nagamo'za oku zamufga mika'moza tga hiho. 16 Tamagra tagri mofane ara erisageta, tagra tamagri mofane enerita magoke vahe trohuta manigahune. 17 Hanki tamagrama ketima antahita oku tamufga taga osnageta, nersarona avreta ama kumara atreta vugahune. 18 Hamori ene nemofo Sekemuke anankema nentahike hugnarere hu'na'e. 19 Ana nehaza ne' Sekemu'a anagema hza nentahino, hantka huno ana kemofo amage' ante'ne, na'ankure Jekopu mofate agu'a me'negeno'e. Sekemuna nefa nagamo'za antahi nemiza nere. 20 Hamorike nemofo Sekemu ene ran kumamofo kahante eke atru huza kenaneke fatgo nehaza kumate vahe anankea eme zamasmina'e. 21 Ana vahemo'za knare knampa hurantaze, zamatre sunke'za mopatimo'a ra hu'neakiza mani'neza, inankna'zana mizante tro nehuta, mofanetia omeri emeri hugahune. 22 Oku tavufga tga hutesunke'za, anamo'za mago zamarimpa hu'za tagrane, mago vahere hu'za mani'gahaze, e'igu zamagra hzankna huta maka'a vene'nemota oku tvufga tga hugahune. 23 Afu kevuzimine, feno zamimo'a tagriza segahie. Hanki tagrama zamagri kemofo avaririta oku tavufga tga hanunke'za tagra'ene knare hu'za manigahaze. 24 Hakare'a vahe'mo'za rankumamofo kahante atiramiza, Hamori ene, nemofo Sekemugini ke nentahiza, mika venenemo'za oku zamufga anoma'a tga hu'naze.

25 Tagufa zge agteregeno anama oku zamufga tga hunaza vahemo'za tusi zamatazmampi mse'nageno, Daina nesaroke Simioni ene, Livaike zaza kazi (bainat) eri'ne, ana kumapi vu'ne maka'a vahera antri hzaza hu'ne zamahe hana hu'na'e. 26 Hamorine nemofo Sekemu'giznia kazinknonu (bainat) znahe nefri'ne, Sekemu nompinti neznasaro, Daina nevrene vu'naze. 27 Dainama kefo avu'avama hunte'naza zanku, Jekopu mofavre nagamo'za ana kumapi mreri'za, maka'a knare'zana eri vgare'naze. 28 Afu kevuma, donkima, kuma agu'afi me'neaza eri hana nehu'za, fegi'a me'nea zane eri'naze. 29 Hakare'a razama, onensa zama, a' mofavrene nompinti zane erihna huza vu'naze. 30 Jekopu'a amanage huno Simionine, Livaigiznia znasmi'ne, Kenani vahe ene, Perizi vahe amu'nompina knaza erita nagrira nazeri hi'mna va'e. Tagra onensa'a vahe mani'nonankiza, atru huza ha'ma eme hurantesuza, nagri ene maka zaniane nazeri haviza hugahaze. 31 Hianagi kenona'a anage hu'na'e, hanki nahigeno nersarona, monko a'nemofo hianknara hunte'ne?