1 Ana knafi Kenani mopare tusi'a zamagate'za fore hu'ne. 2 Isipi mopareti mizase'za eri'za e'naza ne'za nehna hzageno, nezmafa amanage huno zamasmi'ne, Ete mago'ene vuta ne'zana osia ome miza seho. 3 Hianagi Juda'a amanage huno nfa'amofona asmi'ne, Ana kva ne'mo hanvenentake ke huranteno amanage hu'ne. Tamagra nagna tmimofoma avreta ome snagena tamufina ontamagegosue huno higeta e'none. 4 Kagrama naganatima atresankeno'ma tagra'enema e'sniana, tagra uramita nezanka'a ome miza huta egahune. 5 Hianagi kagra'ma atresankeno'ma tagra'nema omesniana tagra ovugahune. Na'ankure, ana Isipi kva nemo'a amanage huno tasami'ne, tamagna timimofoma avretama ome snazana nagri navumo'a ontmagegahie. 6 Anage nehazageno Jekopu'a (Israeli) amanage hu'ne, Tmagra nahigeta ana kva nera magora nagna'tia mani'ne huta asminageno anankea hu'ne? Ana nehuta nagrira tusi'a zampi nazeri haviza haze. 7 Hianagi zamagra asmi'za, ana kva ne'mo'a hakaremota tantahige tantahage huno tagriku'ene, vahetigu'ene, tantahigeno amanage hu'ne, Nermafa'a ofri amne mani'nefi? Hagi magora nermagna'a mani'neo? Huno higeta tagra ke nona'a asmi'none, tamagra nermagnana avreta eho hani'a nanekea ontahineta hu'none.

8 Anage hu'za asmitageno Juda'a nfa'amofo Israeli (Jekopuna) asmi'ne, Ana ne'mofavre, Benjamenina huntegeno nagrane esnigeta otita va'mneno, hanigeta tagrane kagrane mofavre'zgatine tagakura ofrita mani'mneno. 9 Nagrani'a huvempa huankina kegva krintegahue, hanki kvama hu'soe osnugenoma kna'ma eri'na ana knazana nagra erigahue. Hagi kagri kavure'ma avre'na omesuna nagra ana knazana eri kofigahue. Nehanugeno ana knazamo nagrane mevava hugahie. 10 Hianagi tagrama avega ontetasina, tagra menina tare zupa vute ete huta nezana eruntesine.

11 Nezmafa Israeli'a amanage huno zamasmi'ne, Ana'ma hu'nesniana amanahu hiho, mago'a knare'zama mopatifi me'nesiaza kutamifi eririta osi'a tusa masevene (bam), tumemofo rima'ane, (honey) mananentake fukine, mananentake zafa rine, pistasios zafa rgane, almon zafa rgane eri'neta vuta ana kva nera museza ome amiho. 12 Ana nehuta mago'a zgone eri aguheta (dabol) tamazampina erineta viho, erita e'naza zgone erita viho, zamage kaniza eririnegahaze. Erineta omehefi amiho. 13 Ana nehutma ngana tmi'mofona otita ame huta avretma ete ana kva nete vinkeno, 14 hugahananagi hihamu'ane Anumzamo ana ne'mofo avure asunku hurmantesuno'a, mago nermafune, Benjamenigizni znatre sanigeke tamagrite egaha'e. Hagi nagrama mofavre ni'amokizmiguma nasunku'ma hanuna, nagra nasunku nehuna manigahue. 15 Jekopu'a anage hige'za mofavre naga'amo'za ana muse'zana (gift) eneri'za, mago'ane zgoa eriguhe'za zamazampi eneriza hagi, Benjameni nevre'za oti'za Isipi moparega vu'za ana kva ne' Josefe avure u'oti'naze.

16 Josefe'a ngana'amofo Benjameni negeno noma'afi eri'za ne'a amanage huno hunte'ne, ama vahera zamavrenka nompi ome nezmantenka mago afura ome ahenka, krenka retro huo, na'ankure zamagra, nagrane ferura ne'za negahune. 17 Eri'za ne'amo Josefe ke hiaza huno zamareno Josefe nompi ome zamante'ne. 18 Hianagi Josefe eri'za ne'mo, nompi zamareno vige'za kore nehu'za amanage hu'za hu'naze. Ko'ma kutifima eriri rante'nea zgoreku huno tavre noma'afi tanteankino tantahinegeno tazerino kazokzo eri'za vahe'a trohu ranteno mika donki tine avre vgaregahie. 19 Anage nehu'za Josefe nompi eri'za ne'te vu tva'o huza no kasante ome asmi'za, 20 amanage hu'naze, ra netimoke, tagra amare e'tama nezama eme miza senona naga e'none. 21 Hianagi ne'zama miza huteta, kantega umsenaku hunte kutima, eriheta huta konana, magoke magokemota zgotima atre'nona kante kutimofo avazare me'negeta keteta ama erita e'none. 22 Aza ana zgo'a eririranteneo e'i ana vahera onke'none. Antahita keta osu'neta ana zgo'ne ete mago'ane ne'za miza hanune huta eritru huna zgonena erineta e'none. 23 Josefe eri'za ne'mo amanage huno zamasmi'ne, knare huta mani'gahazanki koro osuta maniho. Kagri Anumzane, nermafa Anumza nemo kutmifina zgoa eririrmantene. Nagra zgo tmia ko nmizage'na eri'noe. Nehuno Simeoni ome avreno eme zami'ne. 24 Ana huteno Josefe eri'za ne'mo nompi zamareno eno, tina tagi zamige'za zamaga sese nehzageno, donki zamimofona nezana zami'ne. 25 Ana nehu'za, Josefe agra noma'afi feru ne'za negahune hige'za antahinagu avega anteza mani'neza musezana (gift) eri antente'naze.

26 Nontega Josefe ne'ege'za nege'za, musezama (gift) eri'za e'naza eme nemi'za mopafi zamarena reza avuga kepri hunte'naze. 27 Anante Josefe'a mani'za zamigu zamantahige'ne, Ko'ma nermafanku'ma ozafa reno mani'ne hutama nasmi'nazana, agra menina knare huno mani'nefi? Ofri mani'neo? 28 Zamagra anage hu'za asmi'naze, Nerfa'a eri'za nekamo'a knare huno ofri mani'ne. Anage hu'za nesmi'za agafi kepri hu'za razampi antahimi'naze. 29 Ana hunentageno kesga huno negna Benjameni, nerera mofavre negeno amanage huno hu'ne, ama mofavrea, henka mofavre hutama nasmi'naza mofavrefi? Josefe anage nehuno, Anumzamo knare huno mofavrenimoka kza huno agampu hugantegahie. 30 Josefe'a negna negeno zvi atentesia agesa higeno hantka huno zamatreno zvi ate'sia kumaku hakreno nemsefinka asafi (rum) ufreno zavi ome ate'ne. 31 Zaviteteno avugosa sese huteno asu'zana eri rentrako nehuno megi'a atiramino, amanage huno zamasmi'ne, Ne'za atinketa namneno. 32 Josefe ne'zana arure atimi'za, zamagrira arure atinte zamante'za, Isipi nagamo'za zamagragu nenaze, na'ankure, Isipi vahe'mo'za Hibru vahe enena magopina bretia onegahaze. Isipi vahe'mo'za Hibru vahe enema magopi kave nezankura zamesra huno zamagote'ne. 33 Hagi pusa mofavrereti agafa huno fore hunare, ranteti vuno osite zamazeri rempi huzmantage'za mani'ne'za tusi'a zampi zamano nevazige'za zamagogogu nehu'za ovufi avufi hu'naze. 34 Josefe itareti eri'za vahemo'za nezana refko huza afuhe'i ome ante nezmante'za, Benjameni tafepina 5fu'a vahe'mo'za nega neza antente'naze. E'ina hige'za magopi mani'ne'za knare hu'za ne'zane, tine nene'za muse hu'naze.