2
Poloa Kolini veamogami amametitihe humaine.
1 Nafunagana-gatama nagaya nayona tamakaite Anumaya Koti kema me lamahapauvana haviyaami hanea veamoya nehaya avamete huna tamaipafinaga tamahaisifa kea tamahaopainoe. 2 Nagainia naguafinaga mage huna havimainoe “Nagaya tamakai amunopima mainoana nagoa yafena tamahaopaigahue. Nagaya Yisasi Kalaisia yafaga yosalema falimainea yafekeya tamahapaigahue.” huna humainoe. 3 Hagotena tamakaienema mainoa kanafina foli foli huna koli nehuna atali huna mainoe. 4-5 Atali nehuna Anumaya Koti tokiyahe havitama tamakupi maletama tamametiti hisae huna ma mopafi haviyaami hanea veamoya nehaya augafa kea ohunogi Avamumo tokiyaleti kea huhalena tamahapai-mainoane. Haviyaami hanea veamoya nehaya kehena tamametitia ohisae huna Yisasifena kanale mono kea humainoe.
Anumaya Koti Avamumoa kanale tagu tagesa nelamie.
6 Anumaya Kotina amakua amitafa huya akave nemalaya veamogamifena tokiyaage kea nehuanagi ma mopafi haviyaami hanea veamogami augafa kene, ma mopafi kava yagai-mainaya veamoya nehaya augafa kene, fanane hisia kea nohue. 7 Aao, tagaya Anumaya Koti agu agesamoa falaki-mainea ke tamahanepaune. Anumaya Kotia ma mopama talo ohunenoa hagoteno nago kea humainegeno falakino haneanagino menia lagaya Anumaya Kotitegati tokiya hale yamaa alisunafe mani kemoa falote humainone. 8 Ma mopafi kava vayamoya mani kemona aepaa ohavinae. Mani kema havimainasina tokiya hale yamo aepaa hanea kanoa, Anumayamona, yafaga yosalela nilia heya oasaisine. 9 Anumaya Koti avopina mage huno kae-malenayane
“Taulagamoa oagenea yaene tagesamoa ohavinea yaene veamogami amaku amakesafiti omalenea yaenena Anumaya Kotina amakuama aminaya veamogamife talo tala humalene.” huya kae-malenayane.
10 Veamoya oagageno falakino hanea kea Anumaya Kotia agaia Avamualeti taveli-maine. E, Alu Aotage Avamumoa mukia yana atiyeno Anumaya Kotina falakino hanea agu agesaene agemaine. 11 Hana veamoya nago kanomoma agesama nehavia yana agemaine? Aao oagenagi agaia agupima mainea agu nafamokeya agemaine. Ani kava huno nagoa veamoya Anumaya Kotia agu agesafima havia yana ohavinagi agaia Avamumokeya agemaine. 12 Anumaya Kotia ma mopafi veamoya nehaviya amaku amakesa notamigi tagaima Anumaya Kotia taminea kema havilama huta havisunafe ani Alu Aotage Avamula tamigeta avale-mainone.
13 Tagaya mani kea huhaleta nehune. Ma mopale kanale haviyaami hanea veamogami ke kana huta nohunagi Avamumo tahapaiya kegeya tamahanepaunageno ani Avamuma amakupi mainea veafekeya sili huta hamanepaune. 14 Hamanepaunanagi Alu aotage Avamumoma amakupi omainesia veamoya ani Avamumo kea haviya akave malesaya amukoamia omaleneanagiya “Mani kea havigu-nagu ke nehae.” huya nehuya Avamula oavalenayanagiya aepaa havisaya amukoamia omalene. 15 Alu Aotage Avamuma amakupi mainea veamoya mukia aepaa haviya yamona fako hugahayanagi nagoa veamoya agaifena “Naa kano mainane.” huya fako hu oategahae. 16 Anumaya Koti avopina mage huno kae-maleneane
“Anumayamo nehavia agu agesa hanaa veamoya havilineya Anumayamo aliya alisia yafena hapaigahae?” huno humaineane.
Naa ohugahagi Kalaisia agai agu agesa ago tahapaino tamigeta agai kemo aepaa havilinone.