3
Mono aliya vayala Anumaya Koti aliya vaya mainae.
1 Nafunagana-gatama tamakaiene mainena, Avamumoma amakupi mainea veamoya havisaya avamete kea ohunogi tamakaya atafa lamaipale, osi nafane kana hutama mainagena Kalaisi humainea auava yafema nohavinaya veamogami avamete kea tamahapai-mainoe. 2 Tamakaya tokiyaage kema hisua kea ohavigahayanagina nu tamamisua avamete ke tamahapai-mainoe. Meni kanafienena ania huna nu tamamisua avamete ke tamahanepauve. 3 Naafene atafa lamaipamo akave maletama mainetama tamafu-tamakana-gamifena tamaipa haviya humatetama kema vaimatayana atafa lamaipa hanegetama ma mopafi veamoya nehaya kavakeya nehae. 4 Nagoamogatama “Polo tahapaiya kele akave nehune.” hutama hagetama nagoamogatama “Tagaila Apolosi tahapaiya kele akave nehune.” hutama nehae. Ani kavama nehayana ma mopafi veamoya nehaya avamete kava nehae.
5 Apolosia hanaa augafa kanoe? Nagaya Polona hanaa augafa kanoe? Taagaya aliya kanolatake mainoe. Anumaya Kotia alu aliya lu aliya taamigetaa nealue. Ani aliyateti tamakaya Yisasifena havitama tamakupina maletama lamametitia humainae. 6 Nagaya Yisasi kea tamakupina fai-maletogeno Apolosia timaa hefino taki-maleneanagi Anumaya Kotia agaiage alino aifalo higeno hagemaine. 7 Naa humainegi avina yama fai-malenea kanomo agiene tima taki falu hu-malenea kanomo agienena omalegi avina yama alino aifalo higeno hage-mainea kanoa, Anumaya Koti agigeya alisaga hisune. 8 Anumaya Koti kema faimalenea kanoene tima takino falu humalenea kanoene nago aliya alimainae. Ani aliyatetila tolemogania ali-mainaa avamete anonaania aligae. 9 Taagaya Anumaya Kotiene ailokaetaa aliya kanolatamaa mainoe. Tamakaya Anumaya Kotina hoyaa kana hutama mainae. Tamakaya Anumaya Kotina nomaa kana hutama mainae.
Mono aliya veamoya kamuta vaya kana huya mainae.
10 Tamakaya Anumaya Kotina nomaa mainagena Anumaya Kotia kayone yamaaleti nagaya no ki aliyate kava kano mainena yafateti tunagea ago ayemalenogeya nagoa veamoya nona negiye. Mukia veamoya amakesa havilama huteya kanaleya huya kiho. 11 Anumaya Kotia tokiyaage no yosamoma noma atafa nehia yosa Yisasi Kalaisina agaiage ategeno maineanagiya nagoa veamoya alu tokiya noma atafa hisia yosa oayegahae. 12 Nagoa veamoya haya keleti ani nona tokiyaage huno falu otesia yosaletiene u yosaletiene yafatetiene negiyanagi nagoa veamoya hofaletiene vitimo alapaletiene aupaa kasalisia yateti negiye. 13 Negiyanagino Anumaya Kotia kaiyekema hulatesia kanafina mukia veamogami aliyamo aepaa haote haote huno atamo anefemo avame humateno amakege amakege hutesigeya aliyama ali-mainesaya aliyamo aepaa fufu yate ali falote hugahie. 14 Nagoa veamoya tokiyaage u yosaleti kimalenaya avamete huya ki-malenesaya noamimoma atama otesigeno kanalema huno hanesiana ani veamoya kanale miyana anonaamia aligahae. 15 Aligahagi nagoa veamoya ki-malesaya noamimoma atama lesigenoa mukia aliyamaamimoa fanane hugahianagi atafiti veama ali vati huna avamete huno amakaiami amaku amamena aligatisigeya maigahayanagiya anonaamia oaligahae.
Tamakaya Anumaya Kotina alu aotage nomaa mainae.
16 Tamakaya Anumaya Kotina alu aotage nomaa mainageno Anumaya Kotina Alu Aotake Avamuamoa tamakupina maine. Tamakaya ani yana havilama ohunao? 17 Nagoa veamoya Anumaya Kotima mainea nomaama ali haviya hisayana Anumaya Kotia amakaina ali haviya humategahie. Anumaya Koti nomaa alu aotage nona haneanagitama tamakaya ani nona mainae.
Veamogami amakia alisaga ohisune.
18 Havigu tamakaitamihe havige ayemavataga hisagi. Nagoamogatama “Mopafi veamogami haviyamiene veane mainone.” huya hisayana naa amaku amakesa ataleteya amakesa nohaviya vea kana huya maisayana kanale haviyamiene veane maigahae. 19 Ma mopafi haviyaami hanea veamoya Anumaya Koti aulagafina amakesa nohaviya veane kana humainae. Anumaya Koti avopina mage huno kae-maleneane
“Ma mopale haviyaamiene veamoya savaleage nehageno Anumaya Kotia veamoya kalifuma hanagi-maleneya nehayafiya avamete huno amatafa nehie.” huno humaineane.
20 Nagoene mage huno humaineane
“Anumayamoa haviana ma mopale haviyaamima hanea veamoya nehaviya amaku amakesamoa afa ya kana humaine.” huno humaineane.
21 Na yafe “Ma veala kanale veane mainae.” hutama amakia alisaga ohiho. Anumaya Kotia mukia yana tamamine. 22 Polonagi, Apolosiagi, Pitaagi, ma mopaene tamahaimuene, fali yaene, meni kanaene, haenagama falote hisia kanaene, mukia yana Anumaya Kotia tamamine. 23 Tamamigetama tamakaya Kalaisi ayapi maigeno Kalaisia Anumaya Koti ayapi maine.