1 Ŋoŋe Kristo fafahare-ticnao ʒuhuckembiŋko ine faic Anuture maŋfuŋko Kristo jukacko wiac fokac, irec henʒiriŋnehuc junʒepieŋ. 2 Mâreŋko wiac fokac irec mâcne, faic wiac fokac irec maŋ mamanasu-ŋeŋic râepie fozejec. 3 Ŋoŋe hâmombiŋ hâcne, eme juju-ŋeŋic Kristohec Anuturao soŋkekicne fokac. 4 Juku Kristo e juju runâŋeczi fua taniŋkeme ŋoŋe iŋuc jaha ehec mâmâc tatamac huririnao fua taniŋkeniŋmu.

5 Wiac kecʒiŋucte ine sowa juhuc sahac-ŋeŋic bâhâmonʒepieŋ: Boe sau, maŋwânâŋ, bu gâgâpâcne, sasec sâqocne, buchâro, i eocmu e sahac-ticnezi wofuŋ ecnekac muzo. 6 Wiac i sasaware Anuturaonec okacne fisiocmu. 7 Ŋoŋe mârâcko iŋuc jaha wiac i bajupie maŋ fâri-ŋeŋic ejujec. 8 Ʒi ine wiac iŋucne sasawa hetaranʒepieŋ. Ehuc aaric, kimbeŋ, râŋgeŋ bârâŋgeŋ, dâŋ gâgâpâcne â simbiŋne i qikiŋnenʒepieŋ. 9 Burec eec i wâc mi enʒepieŋ. Maŋraŋɋa-ŋeŋic mâsi qâqâreŋ-ticnehec heunucke behec erâ 10 maŋɋâri-ŋeŋic hepie hume rojuŋgopieŋ. Maŋ i hâcne bâbâfuazi bâpiaŋkeme mamanahec erâ e jahacne hawari iŋucne fuahuc jukac. 11 Irec bârâwiŋ juju i tarawec, Grikŋic â Judaŋic, mahec â ma tâmiric, hâwecŋic â kâte sanaŋ, kiŋaŋ qaqa â ŋicbomboŋ, mâmâc sasawa Kristozi qâhâc-nâporâ micne junâre-fâreekac.

12 Eme Anuture biŋefâc, e jahac maŋjauŋ eŋarehuc rowosâec-ŋopawec, ŋoŋe buuruc â buafec â maŋhuhuŋ â miriŋ â bumâteŋ izi ŋaqi-ŋeŋic eme hepie hume rojunʒepieŋ. 13 Ŋoŋe aakic enʒepieŋ, â ŋondeŋ-ŋeŋicko dâŋ fuame kiŋ bebehec enʒepieŋ. Wofuŋzi kiŋ behe-ŋarewec iŋuc jaha eec enʒepieŋ. 14 Eme wiac sasawa irec fainao maŋjauŋ bajupie izi wiac bâture-fârehuc ematauckezejec. 15 Erâ Kristore wamazi maŋŋeŋicko guriŋne bazejec. Ŋoŋe wamahec erâ me sahac mocjahao juniŋte rocŋopakicne hâcne. Erâ wâc daŋge mumuteŋ ehuc junʒepieŋ. 16 Kristore dâŋzi ŋondeŋ-ŋeŋicko sawe mâririackezejec. Eme maŋɋârâŋ dâŋ fuŋne fuŋne qaqazuc ehuc faŋ qaqac enʒepieŋ. Erâ miti gae mânec i Mârozi baafec-ŋopaha maŋŋeŋiczi Anutu muteŋkehuc hecnenʒepieŋ. 17 Eme maŋzi me mezi wiac ezo murâ i Wofuŋ Jesu manasiŋkehuc enʒepieŋ, ehuc ere erâ Anutu Mamac daŋge âzâcnenʒepieŋ.

18 Ŋokac ŋoŋe ŋowefâc-ŋeŋic jaŋere rereŋfâc junʒepieŋ, Wofuŋte biŋe ekicnezi iŋuc epie sâckeocmu. 19 Ŋic ŋoŋe ŋonâŋfâc-ŋeŋic maŋjauŋ ejarenʒepieŋ, ʒâʒâicne ine mi ejarenʒepieŋ. 20 Naru motec ŋoŋe neŋgoc mamacfâc-ŋeŋic dâŋ mupie sâc reŋkenʒepieŋ, iŋuc epie Wofuŋzi maname biaŋkeocmu. 21 Mamac ŋoŋe naru motecfâc-ŋeŋic hâwic sahac enʒipiŋte aaricko wiac mi ejarenʒepieŋ. 22 Kiŋaŋ qaqa ŋoŋe mâreŋ ŋicbomboŋfâc-ŋeŋic jaŋere mic reŋke-fârenʒepieŋ, maizi qambaraŋ ejarepie ŋiczi sawa honec-ŋopapie sâckeocte mâcne, maŋsiocmâc Wofuŋ araŋ bacnehuc epie sâckeomu. 23 Gie-ŋeŋic sasawa i ŋic jaŋere erâ mâcne, Wofuŋte erâ aafec faio banʒepieŋ. 24 Kecʒiŋuc manahuc: Gie furi sambâŋko merâfâc fokac i Wofuŋtaonec roniŋmu. Irec Wofuŋ Kristo ere kiŋaŋ qaqafâc juŋgopieŋ hâcne. 25 Moc e gie-ticne bâsâqoreocmu, e irec okacne jaha roocmu. Wofuŋtao ra rowec ware rowec mi fokac.