1 Ŋicbomboŋ ŋoŋe kiŋaŋ qaqafâc-ŋeŋic wiac sâkoa etiŋnehuc ejarenʒepieŋ, ehuc ŋaŋacne femicne Wofuŋ sambâŋko jukac i manasunʒepieŋ.

2 Paŋʒâic jaha numuhuc junʒepieŋ. Erâ rucgereŋ juhuc daŋge nunumu enʒepieŋ. 3 Erâ nâŋere wâc numupie Anutuzi mitire hata bâʒâwe-nâreme Kristore dâŋ soŋne mufuanʒepeneŋ. Dâŋ irec hâcne niŋgiŋko fokopac. 4 Nunumuzi dopecnupie dâŋ afeckehuc mujaŋgeŋkepe sâckezejec. 5 Qâpuc jaŋehec bâbâfuac erâ wiac mana tara-hâmohuc enʒepieŋ. Ehuc gie bapa dameŋ mi sipirickenʒepieŋ. 6 Dâŋŋeŋic hâwec ruacnepie aŋacne ezejec. Eme ŋic dâŋ iŋuc me iŋuc bâtikie-jareniŋte mi bititienʒepieŋ.

7 No nahacne dâŋ binaŋ i Tikikozi eŋareocmu. E joroc âgo babafic-nâŋec â Wofuŋte kiŋaŋ qaqa micrereŋhec. 8 E hâcne juju-nâŋecte dâŋ binaŋ eŋarehuc mu âkeriŋ eŋareocte ŋoŋerao sorepe fakac. 9 Erâ Onesimo, miti mamana âgo biaŋ-nâŋec, ŋoŋere haeonec, e mâmâc ecnepe fârâ ʒirec dâŋ binaŋ eŋare-fâreocmu.

10 Kâpâcwâru ŋic âgo-nane Aristako â Banaba nafe-ticne Mareko â Jesu, ʒâŋe-ticne moc Justo, jaŋe manasu-ŋareŋgopieŋ. Mareko ere sâcmutâc eŋarepo, fâ fisiocmuo âgo ecnenʒepieŋ. 11 Ŋic i jaŋe sawa Judaŋic jaŋeraonec fuakicnezi Anutu uucmaŋ-ticnere giere baficnueŋgopieŋ, ehuc bubiaŋ qanareeŋgopieŋ. 12 Erâ ŋoŋere haeonec ŋic moc Epafara, Kristore kiŋaŋ qaqa, ere mamanac ŋoŋerao fokac, erâ ŋoŋe sanaŋkerâ Anuture micsâcko juhuc wiac mana tararâ etiŋneniŋte dameŋ sâc nunumuzi dopec-ŋopaekac. 13 No fuŋne-ticne manakopac, e ŋoŋere mecne erâ Laodikea haconec â Hierapoli haeonec mitiŋic jaŋere mecne mâmâc ʒâic gie wemo afecne baekac. 14 Luka dokta biaŋ-nâŋec â Dema jahe mu ʒeri eŋarekopirec. 15 Erâ no Laodikea haeonec mitiŋic â Nimfasi â wiacfâcne mu ʒeri ejarekopac i mufua-jarenʒepieŋ. 16 Papia ʒi ŋic ŋokac wose-jarepie mana-fârepie Laodikea haeonec kikefuŋ jaŋerao râepie rame wosenʒepieŋ. Á jaŋere moc qâreŋkepo iŋuc jaha ŋarepie wosenʒepieŋ. 17 Arikipo e ʒiŋuc âzâcnenʒepieŋ: “Miti gie Wofuŋzi neŋgoc ŋeha mugarekicne i aijakic jaha bâhâmozemec.” 18 Paulo no nahacne ʒâŋe qâreŋ ʒi râekopac. Kâpâcwâru ŋic nore manasunʒepieŋ. Aki anonoczi ŋoŋerao fozejec.