7
Ŋic mai-jeŋicko maqâreŋ bajarekicne
1 Eme no ʒâŋe firâ aŋelo 4 honec-jopapo, jaŋe mâreŋ tuturuŋne 4 ira doma rahuc mâreŋte mâŋâŋ 4 badomambiŋ. Mâreŋko me hâwecko me jâcko mâŋâŋ moc mi qaocte iŋuc embiŋ. 2 Ehame ʒoaŋ wewefunaonec aŋelo moc wefume honepo. E Anutu jujune eraonec maqâreŋ bajuwec. Bajuhuc aŋelo 4 mâreŋko â hâwecko ima baniŋte mujarekicne jaŋe wiwic jaha wira-jarehuc ʒiŋuc muwec: 3 “Ŋoŋe mâreŋko me hâwecko me jâcko ima biac mi banʒepieŋ, nâŋe qanaŋ Anuture ŋicfâc mai-jeŋicko maqâreŋ râenaŋmu.” 4 Iŋuc mume ŋic maqâreŋhec jaŋere ʒare kecʒiŋuc mupie manapo: “Israe guru sâc jaŋeraonec 144 tauseŋ maqâreŋ râe-jarekicne. 5 Judare guruonec 12 tauseŋ maqâreŋ-jeŋichec, Rubeŋte guruonec 12 tauseŋ, Gade ere guruonec 12 tauseŋ, 6 Ase ere guruonec 12 tauseŋ, Naftali ere guruonec 12 tauseŋ, Manase ere guruonec 12 tauseŋ, 7 Simeoŋ ere guruonec 12 tauseŋ, Lewi ere guruonec 12 tauseŋ, Isasa ere guruonec 12 tauseŋ, 8 Sebuloŋ ere guruonec 12 tauseŋ, Josefe ere guruonec 12 tauseŋ, Benjamiŋ ere guruonec 12 tauseŋ, ŋic iŋuczi maqâreŋ-jeŋichec embiŋ.”
Ŋicguru hâhâwicne Anuture maio domambiŋ
9 Wiac i hone manac efârerâ moc honepo, mâreŋ sâc irec ŋic tucne, sahac hawari-jeŋic fuŋne fuŋne â dâŋ marac-jeŋic fuŋne fuŋne, guru sokawec jâmbâŋ, ŋic moczi mi wowosene, jaŋe eri ŋeŋere â Lamare maŋfuŋko domapie honec-jopapo. Jaŋe ŋaqi qaŋqaŋhec sasawa, 10 erâ mejeŋiczi ʒariŋ badomahuc dâŋ hahaŋne bahuc ʒiŋuc mumbiŋ: “Bâbâpiaŋ i Anutu-nâŋec eri ŋeŋeo ŋekac erao â Lamarao fokac.” 11 Eme aŋelo sasawa eri ŋeŋe â ŋicqizec â wiac jujune 4 orâŋ-jopahuc domambiŋ, jaŋe eri ŋeŋe maŋfuŋnao fodaperâ Anutu nunumu mumuteŋ ecnehuc ʒiŋuc mumbiŋ: 12 “Jâmbomac¡ Mumuteŋ â eri qaraweŋ â maŋɋârâŋ â daŋge mumu â ʒâŋe rara â tâpiri â sasanaŋ i Anutu-nâŋec focnekaczi focne rahuc juzejec sanaŋ. Jâmbomac.”
Jaŋe ʒâic busâqoc maŋnaonec
13 Eme ŋicqizec jaŋeraonec moczi wio-narerâ muwec: “Ŋaqi qaŋqaŋhec i mo jaŋe? Wenirec warembiŋ?” 14 Wio-nareme dâŋ ʒiŋuc bâtikiecnepo: “Ŋicbomboŋ-nane, i goki manakic.” Eme nazawec: “Jaŋe ʒâic busâqoc maŋnaonec warembiŋ â ŋaqi-jeŋic Lamere soczi ʒure ɋaɋackembiŋ.
15 Irec ʒi Anutu eri ŋeŋe-ticnere maŋfuŋko juhuc
ŋafe furec ufuŋ-ticnao kiŋaŋ qacneeŋgopieŋ.
Ehame eri ŋeŋeo ŋeekaczi qâtec-jopahuc sâoc-jopaocmu.
16 Eme nânâ opâre mocwâc mi hâmoniŋmu;
ʒoaŋzi mi rikec-jopaocmu â ʒâic fâro mi fua-jareocmu.
17 Ŋeŋe ʒâʒâŋiŋko Lama domakac eki hâcne soŋaŋ-jopaocmu,
ehuc juju opâ ʒâkâŋnao amec-jopa rahuc juocmu;
erâ Anutuzi ʒâŋeuc-jeŋic bâkereŋke-fâreocmu.”