1 Eme Lama e sâfâ namba 7 bâhockeme sambâŋko niniŋ qiririŋ fuarâ fohame haae aua qâririŋ ewec. 2 I tarame aŋelo 7 Anuture maŋfuŋko domambiŋ jaŋe honec-jopahape gâcnezi qeŋ 7 jarembiŋ. 3 Eme aŋelo moczi râqâc golzi bakicne ihec warerâ ra alata maŋfuŋko badomame gâcnezi ira hosâc âsu biaŋ bocjaha râepie huwec. Hume eri ŋeŋe mainao alata golzi bakicne ŋewec irec fainao râehuc mitiŋic jaŋere nunumuo ʒuhuckewec. 4 Ehame meticnaonec hosâc âsu biaŋ izi mitiŋic jaŋere nunumu bafickehuc Anuturao fewec. 5 Aŋelo e iŋuc erâ alataonec ʒoc kine rorâ râqâc-ticne bâfuserâ mâreŋko hoŋkeme huwec. Hume ɋuŋ parandaŋ â bâbâric â homeŋ fuawec.

6 Eme aŋelo 7 qeŋ jarekicne jaŋe qeŋ qaniŋte ʒawiembiŋ. 7 Ehuc aŋelo namba wâŋ eki qeŋ qame hoe sanaŋ â ʒoc sochec bâsifuckekicne izi mâreŋko hewec. Heme mâreŋ tucne ʒoczi ʒawec â jâc tucne â sopâc kecɋaŋ sasawa ʒoczi ʒafârewec.

8 Eme aŋelo namba 2 eki qeŋ qawec. Qeŋ qame wiac moc tiki sâko iŋucne ʒocbâruŋnehec hâwecko rucnewec. 9 Rucneme hâwec tucne soc efârewec. Eme hâwec qowi tucne hâmo-fârembiŋ â woke tucne ʒaŋke-fârewec.

10 Eme aŋelo namba 3 eki qeŋ qawec. Qeŋ qame bâpiŋ sâko moc sambâŋkonec tara waharâ ine waha iŋucne bâruŋkehuc opâ gâcnao huwec. 11 Bâpiŋ ʒâŋene Hâtâqiŋqiŋ. Eme irec opâ gâcne hâtâ qiŋqiŋne eme ŋic jaŋe nâpie hâtâc-jopame bocjaha hâmombiŋ.

12 Eme aŋelo namba 4 eki qeŋ qawec. Qeŋ qame ʒoaŋ mosa â bâpiŋ gâcne ira sâwec fuame tatamac-jeŋic pitiwawec. Tatamac-jeŋic gâkowawecte hae burec burec sawa furewec â ŋafeo iŋuc jaha mosa bâpiŋ buburecne tamaewec.

13 Eme no ʒâŋe firâ tucwipe sâko moc honepo. E sawao faic jâmbâŋ juhuc wiwic jaha ʒiŋuc wirawec: “Jei, jei, jei, aŋelo jahec â moc jaŋere qeŋ fokac, i qapie mâreŋŋic jaŋe weniŋuc eniŋmu!”