1 Eme aŋelo namba 5 eki qeŋ qawec. Eme noni bâpiŋ moc sambâŋkonec tararâ mâreŋko wahame honepo. E hârâcte tapa roocte irec ki râcnekicne. 2 Eme hârâcte tapa rome hosâc sâko wefuwec, gie ʒame hosâc feekac, irec sâc hosâc wefu ferâ ʒoaŋ â sawa sâocke-fârewec. 3 Hosâc maŋkonec ine ɋirikiŋ wefurâ mâreŋko wahambiŋ. Micjeŋic ine omeqaqare Sâc. 4 Erâ jaŋe mâreŋko sopâc nânâ kise me jâcrehac wiac râsi ecneniŋte mi mukicne, ŋic Anuture maqâreŋ mai-jeŋicko mi fowec, jaŋe sawa râsi ejareniŋte mukicne. 5 Erâ jopapie hâmoniŋte mâcne, mâc mosa 5 kiʒâic-jopahuc juniŋte mukicne. Ʒâic ine omeqaqare micte sâc iŋuc manazo. 6 Eme dameŋ ira ŋic jaŋe hâmoniŋte biŋe muniŋmu erâ mi hâmoniŋmu, hâmoc hefâre-bipiepie sifu mi maic-jopaocmu.

7 Ɋirikiŋ jaŋe ine becâsic hawari, momori jaŋe ʒikao raniŋte becâsic wiac bâmocke-jareeŋgopieŋ hawari iŋucne hâcne. Qizec-jeŋicko du golzi bakicne tinac ŋewec, ʒâŋe mai-jeŋic ŋic ʒâŋe mai tinac. 8 Kanʒaŋ-jeŋic ʒoricne, ŋokac qizec gere-jeŋicte sâc. Micjeŋic laioŋte mic iŋucne. 9 Amec-jeŋicko maro wapazi bakicne tinac fowec. Fakec fânâŋ-jeŋic ine keretac fânâŋ iŋucne, becâsic bocjaha jaŋe ʒikao raniŋte keretac gagasac jaha fâre rapie fânâŋkeekac, iŋucne tinac hâcne. 10 Gecjeŋic omeqaqare gec iŋucne Micjeŋic i gecjeŋicko hâcne fokac, izi ŋic mosa 5 kiʒâic-jopahuc juniŋmu. 11 Erâ hârâckonec aŋelo e ŋicwofuŋ jujarekac, ʒâŋene Judaŋic jaŋere dâŋko Abadoŋ â Grikŋic jaŋere dâŋko Apolioŋ. 12 Tucwipezi jei jahec â moc wirawec, moc omaekac, ʒi jajahec fokopirec.

Aŋelo namba 6 eki qeŋ qame momori guru hâhâwicne fuambiŋ

13 Eme aŋelo namba 6 eki qeŋ qawec. Eme alata golzi bakicne, Anuture maio ŋekac, masune 4, 14 irecnec dâŋ wefurâ aŋelo namba 6 qeŋ badomawec e ʒiŋuc âzâcnewec: “Eufrata opâ sâkoo aŋelo 4 niŋgiŋ-jopakicne jaŋe bâŋgoroŋ-jopac.” 15 Eme aŋelo 4 jaŋe jara, mosa, ʒoaŋ, aua maickeme mâreŋ sâc ŋic tucne qâmiziec-jopaniŋte woŋec jumbiŋ, jaŋe hâcne firuec-jopawec. 16 Eme momorifâc-jeŋic becâsicko ŋeŋe jaŋere ʒare 200 million, iŋuc mupie manapo. 17 Ŋic â becâsic jaŋere hawari ine maŋ ʒâŋe-nanezi kecʒiŋuc honepo: Ŋic jaŋe maruku bâbâroŋ â keda â bâbâŋeŋ iŋuc rojumbiŋ, â becâsic jaŋere qizec laioŋ qizecne iŋucne, micjeŋickonec ine ʒoc â hosâc â tepe ʒocne wahawec. 18 Eme wiac fârone jahec â moc izi ŋic gâcne sipiric-jopa-fârewec, becâsic mickonec ʒoc â hosâc â tepe ʒocne wahawec izi hâcne. 19 Becâsic tâpiri-jeŋic ine micjeŋicko â gecjeŋicko fowec. Gecjeŋic homa iŋucne, qizecnehec, izi hâcne ŋic sipiric-jopaeŋgopieŋ. 20 Eme ŋic tucne hâmo sipiric ehapie tucne akic-jopakicne jaŋe maŋjeŋic mi bârisiembiŋ â juju bapa-jeŋicte manapie mi sâqorewec. Aricne, jaŋe sifu demoŋ wiac bajumbiŋ. Á nemuɋâŋ golzi â siliwazi â aeŋzi â qânâzi â jâczi bakicne, hone manac eene tâmiric â rarac wawarecne tâmiric, i numu-jarehuc jumbiŋ. 21 Ehuc ʒika â qaŋgec â sasec â fiuc i mi behembiŋ.