1 Eme no sambâŋ ɋâricne â mâreŋ ɋâricne honec-jofapo. Sambâŋ raŋɋane â mâreŋ raŋɋane jahe ine sirowepic. Erâ hâwec iŋuc jaha arictac ewec. 2 Eme tiri hae, Jerusalem ɋâricne hâcne, sambâŋkonec Anuturaonec wahame honepo, ŋokac biŋe moc ŋicko râeniŋte erickeeŋgopieŋ iŋuc tinac ericke emasaŋ ekicne honepo. 3 Eme eri ŋeŋeonec dâŋ kâcɋene ʒiŋuc wareme manapo: “Honekic, Anuture ŋeŋe hae ŋic jaŋerao fuakac hâcne. Eki ŋondeŋ-jeŋicko ŋeŋe juju ehame jaŋe ŋicfâc-ticne erâ juniŋmu. 4 Anutu e jahac jaŋerao juhuc ʒâŋeuc-jeŋic bâkereŋke-fâreocmu. Hâmoc me busâqoc me ki oowa me huc ʒâic ira mi fuaocmu. Wiac raŋɋanezi omae-fârewec hâcne.” 5 Eme eri ŋeŋeo ŋeweczi ʒiŋuc nazawec: “Manakic, no wiac sasawa ɋâricne bâfuakopac.” Iŋuc murâ muwec: “Go qâreŋkec, dâŋ i fâri hândâŋne jâmbâŋ.” 6 Erâ ʒiŋuc nazawec: “Wiac efârekicne, no bâbâni â ʒâhec, wiac fufuŋke â babatara. Moc e opâre hâmome no juju opâ ʒâkâŋkonec fiarâ katucmâc gumepemu. 7 Moc e sasanaŋte gie baku batararâ wiac ʒi raucke-fâreocmu, eme noni Anutu-ticne erâ juhape eki motec-nane erâ juocmu. 8 Hâwic bâroŋ â miti qiqikiŋ â wâwânâŋhec â ʒika qaqa â sasecŋic â hafec qaŋgec ŋic â nemuɋâî babaju â siocdâŋ babaju sasawa, ŋic i jaŋere ŋeŋe lambe opâre riqiczi ʒoc ʒahuc foekac ira mukicne. Izi hâmoc namba tu.”

9 Eme aŋelo 7 râqâc-jeŋic sâc wiac micne momorizi fuseme badomambiŋ, jaŋeraonec moczi norao warerâ ʒiŋuc nazawec: “Waretec Lamare ŋokac biŋe gowatupe.” 10 Iŋuc murâ enareme maŋnane ŋerisieme tiki sâko ʒoricne moc ŋewec ira jowacnu ferâ tiri hae Jerusalem i sambâŋkonec Anuturaonec wahame nowatume kecʒiŋuc honepo: 11 Anuture eri tatamaczi geroŋke-fârekicne. Hae irec tatamacnezi qânâ furi sâko jawa ririŋ kikicne iŋucne erâ bâric bâricneekac. 12 Qânâsac sâko ʒoricnezi hae râreckekac. Sac i motâc-ticne 12, erâ motâc botâŋnao aŋelo moc moc doma rapie 12 jaha ekac, erâ wâc motâc sâc Israe ŋicguru 12 jaŋere ʒâŋe qâreŋ forakac. 13 Ʒoaŋ wewefunaopec motâc jahec â moc domakac, mâreŋ juwicpec motâc jahec â moc domakac, mâreŋ faicpec motâc jahec â moc domakac, â ʒoaŋ huhunaopec iŋuc jaha motâc jahec â moc domakac. 14 Haesac irec qânâ wâtuŋ 12 doma rakac, eme wâtuŋ 12 irec ombâŋnao Lamare aposolofâc 12 jaŋere ʒâŋe qâreŋ 12 jaha forakac.

15 Aŋelo dâŋ nazawec eki gunusâc moc golzi bakicne badomawec, izi hae â motâc-ticne â sâcticne sâc bawec. 16 Hae i tuturuŋne jahec â jahec, hâŋne otecne sâckoa. Eme aŋelozi hae rârec rârec gunusâc-ticnezi sâc bame kilometa 2 tauseŋ ewec. Hâŋne otecne â ʒoricne sâckoa sasawa. 17 Eme haesac ɋâfoŋ-ticnere sâc bame 70 meta ewec, ŋiczi sâc bajueŋgopeneŋ ijaha aŋelozi bajuhuc hae sâc bawec. 18 Haesac i qânâ ɋaɋacne, huririnehec izi bakicne, â hae ine goì fifimârâŋne kiruŋ ɋaɋacne iŋucne izi bakicne. 19 Haesac irec qânâ wâtuŋ i qânâ furi sâko fuŋne fuŋne findowakicne sasawa izi bakicne. Wâtuŋ namba 1 i qânâ ɋaɋacne kiruŋ tinac izi bakicne, wâtuŋ namba 2 i qânâ keŋkeŋne izi bakicne, wâtuŋ namba 3 i qânâ kedazi bakicne, wâtuŋ namba 4 i qânâ ârâŋ ɋâri izi bakicne, 20 wâtuŋ namba 5 i qânâ birâ birâ izi bakicne, wâtuŋ namba 6 i qânâ bâbâroŋzi bakicne, wâtuŋ namba 7 i qânâ âmuc âmucnezi bakicne, wâtuŋ namba 8 i qânâ buge tinac weweaŋne izi bakicne, wâtuŋ namba 9 i qânâ bâbâŋeŋzi bakicne, wâtuŋ namba 10 i qânâ râweckekicnezi bakicne, wâtuŋ namba 11 i qânâ soc tinac gogowacne izi bakicne, wâtuŋ namba 12 i qânâ qondaŋ horiki tinac izi bakicne. 21 Sacmotâc 12 i kubu furi sâko 12 izi bakicne, motâc moc i kubi moczi bakicne, motâc moc i kubu moczi, iŋuc sasawa. Hae hata i goì ɋaɋacnezi bakicne, kiruŋ iŋucne fifimârâŋne.

22 Ufuŋ ine haeo moc mi ŋeme honepo, Wofuŋ Anutu bapafâre eki ufuŋ ejareekac â Lamazi mâmâc. 23 Erâ hae i mosa ʒoaŋzi mi âke tamaeekac, Anuture eri tatamaczi batamaeekac â Lamazi ʒoc tatamac-ticne eekac. 24 Mâreŋ sâc ŋicne ŋicne jaŋe hae irec tatamackoa jufâreniŋmu, â mâreŋ sâc ŋicwofuŋ jaŋe eri boreŋ wiac-jeŋic hae ira bara-fâreniŋmu. 25 Hae i moc mi ŋafeocmu, irec sac motâcne i ʒoaŋkore aaŋ sasawa doma-fâreocmu. 26 ŋicne ŋicne jaŋere wiac furi sâko qame hukicne, aŋac ʒizine i hae ira bara-fâreniŋmu. 27 Wiac wâwânâŋhec ine moc mi raʒi-jâmbâŋkeocmu. Á ŋic moczi wiac mamakâcne me burec bajuocmu, e hae ira wâc mi raʒiocmu. Ʒâŋe-jeŋic Lamare juju sanaŋ papiao qâreŋkekicne jaŋe sawa raʒiniŋmu.