1 Eme aŋelozi juju opâ sâko moc nowatume honepo, ɋaɋacne, jawa ririŋ kikicne. I Anutu â Lama ere eri ŋeŋe fuŋkonec wahakac. 2 Waharâ hae hata ʒâʒâŋiŋnao rakac. Opâ mecnao ŋifec â ŋifec jujujâc doma rakac. Jâc irec fârine hawarine fuŋne fuŋne 12 izi mosa sâc fua qeuc eekac. Eme mâreŋ sâc ŋic jaŋe jâc irec rehacne nâhuc biaŋkeniŋmu. 3 Hae ira wiac sâwechec mi foocmu. Anutu â Lama ere ŋeŋe hae ira hâcne fuame ŋicfâc-ticne jaŋe kiŋaŋ qacnehuc juniŋmu. 4 Erâ hawari-ticne honehuc juniŋmu, â ʒâŋe qâreŋ-ticne mai-jeŋicko fuarâ foocmu. 5 Hae i mi ŋafeocmu, erâ lambe me ʒoaŋ tatamacnere mi muniŋmu, Wofuŋ Anutu e jahac ʒoaŋ ejareocmu. Eme hae rune jaŋe ŋicwofuŋ gie barahuc juniŋmu sanaŋ.

6 Eme aŋelozi ʒiŋuc nazawec: “Dâŋ i fâri hândâŋne jâmbâŋ. Wofuŋ Anutu porofete ejareme maŋjeŋic ŋerisieekac, eki hâcne aŋelo-ticne soreme kiŋaŋ qaqafâc-ticne ŋoŋe wiac, mi ʒoraha fuaocte mukicne i ŋaza ŋowatuc ewec. 7 Manakic, no biac fâpemu, eme moc e papia kecʒira findaŋdâŋ qâreŋkekicne i sisirombe faio bajuocmu e ʒeri bubiaŋ manacnezo.”

8 Eme Johane no hâcne wiac i hone manac efârepo. Hone manac efârerâ aŋelo wiac nowatuwec ere maŋfuŋko fodaperâ numucnezo ehape 9 qatara-narerâ muwec: “Misac mac, no kiŋaŋ qaqa âgoge, erâ porofete qomâfâcge jaŋere âgo, â papia ʒirec dâŋ aimuŋ bajuniŋmu jaŋere âgo jaha. Go Anutu e jahacne sawa daŋge nunumu ecnec.” 10 Iŋuc murâ ʒiŋuc nazawec: “Go papia ʒirec findaŋdâŋ fâzâ mi bazemec. Dâŋ i fârinehec eocte dameŋne bembeŋkekac hâcne. 11 Irec sâqocne bapa e sâqocne bazo murâ bazejec, â maŋwânâŋheczi maŋwânâŋhec juzo murâ juzejec, â mitio juekaczi ine mitioa juzejec, â maŋfuru juekaczi maŋfuru jaha juzejec.”

12 “Manakic, no biac fâpemu. Okacnehec fâ fisirâ ŋic juju bapa-ŋeŋicte tofa sâckoa bazu-ŋarepemu. 13 No bâbâni â ʒâhec, fuŋne â botâŋne, wiac fufuŋke â babatara. 14 Ŋaqi-jeŋic ʒure ɋaɋackeeŋgopieŋ jaŋere manape ʒerine ekac. Jaŋe hâcne mujarepe jujujâckonec fârine nânʒepieŋ â hae irec maŋnao raʒinʒepieŋ. 15 Hae râpenao juniŋmu ine qâto â hafec qaŋgec bapa â sasecŋic â ʒika qaqa â nemuɋâŋ babaju erâ burec bajuhuc irec aŋac-jopaekac.

16 “Jesu no hâcne aŋelo-nane sorepe eki kikefuŋ gurufâc-nane ŋoŋe mumutaniŋ dâŋ i mufua-ŋarewec. No hâcne Dawidire fuŋqizecne â oso gitecne, erâ bâpiŋ sâko tatamachec.”

17 Mâro â Jesure biŋefâc jaŋe ʒiŋuc mueŋgop ieŋ: “Go warezemec.” Á moc e dâŋ ʒi manarâ iŋuc jaha muzejec: “Go warezemec.” Moc e opâre hâmorâ ʒira fisizejec. Á moc e irec ecnekacko ware juju opâ furimâc nâzejec.

18 Papia kecʒira findaŋdâŋ qâreŋkekicne i wose manac eniŋmu ŋoŋe uŋ ŋazape mananiŋ: Moc e maŋticnere dâŋ moc ʒuhuckeocmu, ŋic e Anutuzi wiac micne momori papia kecʒira qâreŋkekicne i ʒuhuckecneocmu wâc, 19 â moc e findaŋdâŋ ʒi âke sipuocmu, ŋic erao Anutuzi jujujâcte dâŋ â tiri haere dâŋ ʒi qâreŋkekicne iŋuc jaha âke sipuocmu.

20 Dâŋ mufuakicne ʒi dopeckekaczi ʒiŋuc mukac: “Jâmbomac, no biac fâpemu.” Jâmbomac, Wofuŋ Jesu go warezemec. 21 Wofuŋ Jesure aki anonoczi ŋoŋerao fofârezejec. Jâmbomac.