15
Yesu se hetolo Pilato matana unai
(Mataiyo 27:1-2 yo 11-14; Luka 23:1-5; Yowane 18:28-38)
1 Malatomtom gagilina unai taukaitalasam tauwoyaidi maiyadi tamowai lakilakidi, laugagayo taulauhekata yo Sunedeli maudoidi nuwatu kesega se kawanamwanamwaei. Na kabo Yesu nimana se paidi na se woyahai se laei se moselaei Pilato* Pilato meta Loma yodi gabemani se tole iya Yudeya yodi gabana, na iya Loma tamowaina. unai. 2 Pilato Yesu ye henamaiyei ye wane, “Kowa Dius tamowaidi yodi wasawasa wa?” Yesu ye hededebui ye wane, “Mamohoi, saha ku hedede me iya ede.” 3 Na kabo taukaitalasam tauwoyaidi yodi hedehedede maudoidi udiyedi Yesu se hegilu. 4 Unai Pilato Yesu ye henamaiꞌuyoi ye wane, “Kowa nige kalinam? Siya hedehedede maudoidi udiyedi se hegilugo.” 5 Yesu nige saha hesau ye hedede, unai Pilato ye nokokalili.
Dius se henuwa bena Yesu ye boita
(Mataiyo 27:15-26; Luka 23:13-25; Yowane 18:39–19:16)
6 Bolimai badobado Taukiuli Henuwaisinina huyana unai Pilato yona laulau meta taba Dius tamowaidi numatutugudu tamowaina hesau se kaibwadai kabo ye yailigabaei. 7 Tenem huyana ne unai taukaiꞌunu hesau hesana Balabasi numatutugudu unai ye miyamiya. Iya ma kana kahao maiyadi gabemani se haikabi, na tamowai hekadi se koihemwaloidi. 8 Bodalakilaki se lagegogo Pilato unai na se kaibwadai bena Taukiuli Henuwaisinina unai na laulau saha ye ginaginauli wa bena ye ginauli. 9 Pilato ye henamaiyedi ye wane, “Kwa henuwa bena Dius yodi wasawasa ya yailigabaei kalimiuwai?” 10 Na ye henamaiyedi, matawuwuna ye nuwatulobaiyako meta taukaitalasam tauwoyaidi Yesu se kaikalomagigiliyei na debanawai se moselaei iya unai. 11 Taukaitalasam tauwoyaidi boda se henuwasaedi na se kaibwada Pilato unai bena Balabasi ye yailigabaei. 12 Na Pilato ye henamaiyedi ye wane, “Saha kabo ya ginauli Dius yodi wasawasa ta unai?” 13 Na se yogasae se wane, “Ku hesatauloyawa!” 14 Pilato kabo ye henamaiꞌuyo ye wane, “Matawuwuna saha? Yababa sahasahana ye ginauli?” Siya kabo se yogalakilaki se wane, “Ku hesatauloyawa!” 15 Pilato ye henuwa bena boda wa ye henuwanamwadi, unai Balabasi ye yailigabaei. Na kabo ye hedede yona iyala tamowaidi Yesu se pidili wipi* Wipi unai Yesu se pidili wa meta suisui dahina unai maina se bolidi na siliya yo pawati matamatadiyao se hepatudi maina wa udiyedi na maina gwaudi udiyedi wipi se pai. Na wipina ne unai tamowai se pidili meta ye kamkamnakalili. unai na mulinaena kabo ye moselaei na se hesataulo.
Iyala tamowaidi Yesu se talatalawasiyei
(Mataiyo 27:27-31; Yowane 19:2-3)
16 Na kabo iyala tamowaidi Yesu se woyalaei Pilato yona numa bakubakuna unai,* Pilato yona numa bakubakuna meta tauꞌiyala yodi kabamiya. na kadi kahao se yogagogoidima. 17 Siya kabo kwama pulupululuna kana kao doha wasawasa kana kwama se baheiyama na Yesu se heluwui na kaiwa gwaligwalina unai peyaula* Peyaula meta wasawasa o tamowai lakilakidi kadi hati or kuludi kadi pasa. se hei na se henabai. 18 Na se laulautokiyei se wane, “Dius yodi wasawasa miyamiyahaina, yauwedo!” 19 Kuluna ne didiyali unai se pidili, yo se kaikaisoi, na se tulibono iya talanuwana ne unai na se talatalawasiyei. 20 Se talawasikaiyawasi kabo kwama pulupululuna wa se haigabaei na kana kwama wa se helikwaꞌuyoidi. Na kabo se woyalaei Yelusalema dagelanawai na se hesataulo.
Yesu se hesataulo
(Mataiyo 27:32-44; Luka 23:26-43; Yowane 19:17-27)
21 Yelusalema se hetubu bena se laugabaei na tamowai hesau hesana Simona se lobai koya unai ye uyoma. Iya Sailini tamowaina, Alekisenda yo Lupuso tamadi. Iyala tamowaidi wa Simona se lauhelili Yesu yona sataulo ye bahei. 22 Yesu se woyai se laei teha hesau hesana Golagota, kaniyona ede “mwayalu magaina”. 23 Kabo mulo* Mulo meta kaiwa hesau masina. Unai yausipanepane se ginauli, yo hinage se hepaisowa kamkamna kabahekaiyawasina mulamulana hesau. yo waina se hebwalikesegaidi na se mosei bena ye numa, na ye laukwatakwata. 24 Na kabo se hesataulo. Tauhesataulona wa Yesu yona kaleko se hinelidi, na se kaiheyaidi kaiteya kabo yona saha ye hai.
25 Malatomtom awa hehaligigi-hasina unai Yesu se hesataulo. 26 Yodi kabahegiluna hedehededena wa se kuli molumolu* Molumolu meta Saliba kalinadi, huya bagubagunana unai se hepaisowa. Molumolu meta kaiwa o timba tehana. hesau unai na se pawatisae kulubawana wa unai. Kulikuli wa doha teina, “Dius yodi wasawasa.” 27-28 Taukaiwahali labui se hesataulodi iya maiyanao. Hesau kahatuna unai na hesau seuseulina unai.* Kulikuli beyabeyadi hisa mo lausoisoi 28 se kuli: Na teina saha se ginauli ta meta peloweta ye kuliyako wa ye wane, “Yodi kabikabina meta doha iya yababa tauginaulina hesau.” (Aisaiya 53:12) 29 Keda unai tamowai se sae yo se dobi na se hagahagasiyei yo se kulukulukwadei na se wane, “Kamokisa! Kowa bena numa tabuna tausokegwaligwalina, na mayadai haiyona unai kabo ku hetoloꞌuyoi wa! 30 Hage, ku henamwanamwaꞌuyoigo na ku pesadobima!” 31 Yo hinage taukaitalasam tauwoyaidi yo laugagayo taulauhekata iya se talatalawasiyei se wane, “Tamowai hekadi ye henamwanamwadi, na nige gonowana ye bom ye henamwanamwaꞌuyoi! 32 Teina Keliso ta, iya Dius yodi wasawasa, taba sataulo ne unai ye pesadobima, kabo ka kita yo ka kawamamohoiyei.” Tamowai labui maiyanao se hesataulodi wa Yesu hinage se hagahagasiyei.
Yesu ye boita
(Mataiyo 27:45-56; Luka 23:44-49; Yowane 19:28-30)
33 Mayamayadailaki unai magai wa maudoina ye masigili ye lau ee meimeilahi awa haiyonana unai. 34 Mahanana ne unai Yesu ye yoga ma kalina lakilakina ye wane, “Eloi, eloi, lama sabatani?”, kaniyona ede, “Yogu Yaubada, yogu Yaubada, idohagi to ku nuwagabaegau ta?” 35 Na tautotolo hekadi dedekana unai, kalinana se lapui ede se wane, “Kwa lapui! Iya Eliya ye yogayoganei.” 36 Tamowai hesau ye heloi ye lau balo ye hedakwa winega unai, na ye paihepatu didiyali unai, na kabo ye helelesae Yesu unai bena ye numa, na ye wane, “Hage ta kita kabo Eliya ye laoma na ye toledobiyei.” 37 Yesu ye yoga ma kalina lakilakina, na kabo yawasina ye pito.
38 Tenem mahanana ne unai meta numa tabuna unai woyo kalekona* Teina woyo kalekona ta tamowai ye guduguduidi bena tabu se mwalamwalaesae teha tabukalilina unai. ye tapulisilabuiyei kewa unai ye dobi guni. 39 Iyala tamowaidi kadi tanuwaga* Tauꞌiyala kadi tanuwaga meta Apostolo 10:1 unai ka kuli sentuliyo. Lausoisoi ne unai hinage hededehemasalahana ku hasili. Yesu yona sataulo wuwuna ne unai ye totolo, kalinana ye lapui yo ye kita idohagi ye boita, unai ye wane, “Mamohoi, teina tamowai ta iya Yaubada natuna!”
40 Waiwaihiuwo hekadi kedalohawai se kitakitalau. Luwadi ne unai meta Maliya, Magadala waihiuna, yo Maliya Yamesi gagilina maiyana Yose sinadi, yo Salome. 41 Huyana Yesu Galili unai meta se hemuliwatani yo se kitahetete. Yo waiwaihiuwo gwaudi Yesu maiyanao se saema Yelusalema wa, siya hinage temenai.
Yosepa Yesu ye tole bwayabwaya unai
(Mataiyo 27:57-61; Luka 23:50-56; Yowane 19:38-42)
42-43 Yelusalema unai Alimatiya tamowaina hesau hesana Yosepa. Iya Sunedeli kadi boda saesaena hesau yo Yaubada yona basileiya ye nayanayai. Yesu yona huyaboita mayadaina ne meta Sabati kabinonoha mayadaina.* Dius yodi Sabati meta Palaide meimeilahina awa haligigi-kesega unai ye hetubu, ye lau ee Satade awa haligigi-kesega meimeilahina unai. Mahana ye duitalu na sola kabo Sabati hekasisina ye hetubu na Yosepa ma nuwabayaona ye lau Pilato unai na Yesu tauna ye kaibwadai. 44 Yesu yona boita wa wasana Pilato ye lapui meta ye siliyata na nige ye kawamamohoi. Unai iyala tamowaidi kadi tanuwaga wa ye yoganei na ye henamaiyei. 45 Pilato hedehedede wa ye lapui meta mamohoi, unai Yesu tauna ye talamgabaei kabo Yosepa ye hai.
46 Yosepa kabo kaleko maisana lakilakina ye hemaisa na kabo ye lau Yesu tauna ye taluhidobiyei na kaleko wa unai ye suma, na ye tole bwayabwaya* Isalaela unai yodi bwayabwaya meta weku duhadi se tadidi. unai. Na kabo weku lakilakina ye builae bwayabwaya duhana wa ye buigudui. 47 Maliya Magadala waihiuna maiyana Maliya Yose sinana se kita haedi Yosepa Yesu tauna ye tole.
*15:1: Pilato meta Loma yodi gabemani se tole iya Yudeya yodi gabana, na iya Loma tamowaina.
*15:15: Wipi unai Yesu se pidili wa meta suisui dahina unai maina se bolidi na siliya yo pawati matamatadiyao se hepatudi maina wa udiyedi na maina gwaudi udiyedi wipi se pai. Na wipina ne unai tamowai se pidili meta ye kamkamnakalili.
*15:16: Pilato yona numa bakubakuna meta tauꞌiyala yodi kabamiya.
*15:17: Peyaula meta wasawasa o tamowai lakilakidi kadi hati or kuludi kadi pasa.
*15:23: Mulo meta kaiwa hesau masina. Unai yausipanepane se ginauli, yo hinage se hepaisowa kamkamna kabahekaiyawasina mulamulana hesau.
*15:26: Molumolu meta Saliba kalinadi, huya bagubagunana unai se hepaisowa. Molumolu meta kaiwa o timba tehana.
*15:27-28: Kulikuli beyabeyadi hisa mo lausoisoi 28 se kuli: Na teina saha se ginauli ta meta peloweta ye kuliyako wa ye wane, “Yodi kabikabina meta doha iya yababa tauginaulina hesau.” (Aisaiya 53:12)
*15:38: Teina woyo kalekona ta tamowai ye guduguduidi bena tabu se mwalamwalaesae teha tabukalilina unai.
*15:39: Tauꞌiyala kadi tanuwaga meta Apostolo 10:1 unai ka kuli sentuliyo. Lausoisoi ne unai hinage hededehemasalahana ku hasili.
*15:42-43: Dius yodi Sabati meta Palaide meimeilahina awa haligigi-kesega unai ye hetubu, ye lau ee Satade awa haligigi-kesega meimeilahina unai.
*15:46: Isalaela unai yodi bwayabwaya meta weku duhadi se tadidi.