45
Te Kora hani dabego asęani balia po me deli dao.
Te kingo we sabo sogo wabo tęąbi po
1 Te wiegi yai po hauwa eno homude elalubao.
Eno te tęąbi po asęnama,
te kingba mawainu yali.
Eno pedauwali da, te wiegi yai kuskus
bidigo te po asębo hoda pen tiwai dao.
2 King bidi, nage te gasa sawi yai bidi mu dao.
Te gasa bidi nage tiwai me menio.
Nago po te wiegi yai naga elalubo.
Tama te sesemane sogo Godigo nageba
te wiegi yai homu ebo yai.
3 Nage te bomai king da.
Nago au dobage te hauwa elalubao,
tama nago genuai nogi te ugwanu mu yai.
Nago te bainat hwą dią selama, te hwįabo sisi elaluao.
4 Nage te genuai nogi elalu, te polalubo king dao.
Nage te hosde dugulasa, tama te hwįboba pelama,
tama te hwįbo bage aiyaba elaluao.
Nago hwįainu da, te bidi dabego
nago po te aiyaba me elalugobeo.
Tama nago hwįbo te bidi dabe dolasa
bilimainu tau siyu hwįani.
Te nago hwįbo te bomo yai pedelaibao,
tama te dwai bidi dabe nagede
wi mu emainu ebo dao.
5 Te nago ene dabe te mu poa pelama,
tama te boi bidi dabe mu eneyu ebo dao.
Nago hwįyu, te gasa hani dabe aiyaba elaluama,
tama augwali te nage dologode bidibao.
6 Godigo nage te king nigilama,
tama nage te king sesemane
bidada peyu, bidada paibao.
Nago te naga we bidi dabe
te doloba pai kolesagade naga tonalubo dao.
7 Nago te doloba pai kolesaga wei eyu,
tama nago te dwai kolesaga te
wei isiąyu, hagela mu ebo dao.
Tama tibaso, naga Godigo digi, agai te nage sa muyu,
tama agai nago nogi ugwaba mu muyu,
tama nago nogi te gasa king dabego
nogi aiyaba elalubo dao. * Hib 1:8-9
8 Te nago gudubo bobage ugwade
te wiegi yai denami ebo haniani nai,
te sanda tiwai mea, me kasia te denami elalubao.
Augwaligo te kingo be te haniani
au ilibo naigo te au ilali,
augwa te elefan kelego nigali,
tama augwa te nage wiegi yai homu
pemene ilibo musik weyu ebo dao.
9 Te gasa tǫ pedai kantri tonalubo king
dabego wegi dabe,
te genuai nogi elalubo we dabe dali,
te nago bede bidibao.
Kwin we te nago dolo nogo badu dolalubao.
Augwa te bulu Ofirde sali wiegi yai
golgo nigai au ilibo naigo
te agai au elama, bidibao.
10 Nage te gesi wegi te king dali bidi painu,
nago te eno po odolama,
tama tede homu kone palao.
Nago te naga bulude bage
te homu kone ebo gegeda palama,
tama naga deli kaneme bage me
te homu kone ebo tagalao.
11 Nago tama tebo te kingo subaso da,
te nage sawi yai we da weyu,
tama te nage godolo mu yaibao.
Aga te nago genuai bidi da,
tama tiyu, nago agai po wali pao.
12 Te Tair bulu we bidi augwaligo
te nageba wiegi yai homu ilibo nai dabe sesaibao,
tama te mone hauwa elalubo
bidi dabego me te nageba
wiegi yai homu ebo nai dabe mawaibao.
13 Te kingo gesi we te aga be habude bidibao,
tama aga te gasa sawi yai mu.
Agai te ugwa augwaligo te nigilama,
tama te golgo nigai hobigo au ilai ugwa muai.
14 Agai te ugwa kala te dodobolo pali
te hauwa elalubao.
Megi da, augwaligo te we te kingba odasa pobao.
Tama te gesi wegimani te aga hai namu dabe
augwali te aga wali pali.
15 Augwali te wiegi yai haliga pemene elama,
tama augwa te kingo wiegi yai
genuai be tomoba palio.
16 Tama king, nago da, te nago wai ogwa
te hauwa elaluaibao,
tama augwaligo te nago wąį nǫų dabe
bidali pesage hasegeliyu,
tama king dabe pedelaibao.
Te nago augwaliba genuai namba mayu,
tama augwaligo te tigidali bulu
tǫ pedai we bidi dabe tonaluaibao.
17 Te nago genuai nogide po eno hanilama pusuyu,
tama te nosali pedalubo hani tigidaligo
te nage sesemane sogo homu kone paibao.
Tama tiyu, te me badu we bidi dabego
te nago nogi sesemane sogo
ugwaba siyu yaibao.