46
Te Kora hani dabego asęani balia po me deli dao.
God da dali bidibao
1 God aga te da seselalubo bidi da, tama agai
sesemane sogo da bomo mabo dao.
Aga te pąde bidiyu,
te dago genuai sęgę sabo sogo
tau sainu sisi elalubo dao.
2 Tama tiyu, te haniani sę dabe pedalubo side,
te dago wi me elamuo.
Tǫ te mali eyu aluaibao, tama te bulu du dabe te
tamu ąį tomoba degasa dulaibao.
3 Tama genuai tamu ąį te bomonama, kulukulu weyu,
tama pepeda pelama, tama te dini pedaliyu,
tama genuai tamu ąį bǫį samanu,
tama te bulu du dabe degelaibao.
Te tobage genuai sę pedaligi sogo da,
teda da wi munu me igi meni.
4 Te Godigo hanu da, te magi dwai sę meni yai
wiegi yai bulu,
te Ugwadu Mu Bidibo Godigo hanu dao.
Te genuai soabo wę me deli te tomode elalubao,
tama te węde te we bidi dabego
wiegi yai pemene ebo dao.
5 God te taunde bidibao,
tama tiyu, te taun munu me dologobeo.
Te be posisąbadi, tama te Godigo aga tau saibao.
6 Te haniani tǫ pedai kantri we bidi hani dabe
augwali dwai midigi selama,
tama hwįyu dali yai, tama te king dabe dali,
te augwa we bidi dabe me,
te augwali dolaibao.
Godigo genuai po dągą mu obaso,
tama tǫ te olo wę tiwai pedelaibao.
7 Te Tigidali Bomo Elalubo Genuai
Bidi aga te da dali bidibao.
Te Jekopgo God aga te dago duala sabo pesage elalubao.
8 Ae, tegobao!
Dagego te Genuai Bidigo yali sę suagasao.
Te dagego haliga te agai
te tǫde gasa tobage bomai sę hauwa
ebaso, midigi saibao.
9 Agai te tigidali tǫ pedai badu
te hwįbo togolobo dao.
Agai te tigidali enesigi me ene togolama,
tama te sabele dabe te siaba ulubadi ebo dao.
10 Agai te po wai,
“Dage munu ma hwįnamuo,” wali.
“Dagego ena bugagia koneiąo, ena God mu dao.
Ena ugwadu mu elalu,
tama te tigidali tǫ pedai kantrigo
we bidi hani dabe ena dologode bidibao.
Te tigidali bulu pedai tǫde
ena te polalubo bidi bidibo dao.”
11 Te Tigidali Bomo Elalubo Genuai
Bidi da dali bidibao.
Te Jekopgo God aga te da seselalubo bidi mu da.