1 Aa ie tretreze’ Iehovà t’Iakobe,

naho joboñe’e t’Israele, vaho

hampimoneñe’e an-tane’ iareo eo;

le hirekets’ am’ iereo ty renetane,

hipitek’ amy anjomba’ Iakobey.

2 Ho rambese’ o kilakila’ ndatio

naho hasese’iareo mb’an-toe’ iareo mb’eo;

ie ho fanaña’ i anjomba’ Israeley

ho mpitoroñe lahy naho ampela

an-tane’ Iehovà ao;

naho ho tsepahe’iareo

o namahotse iareoo;

vaho ho fehè’ iareo ­ o namorekeke iareoo.

3 Ho tendreke amy andro hampanintsiña’ Iehovà anahareo amo fioremeña’ areoo,

naho amo haorea’ areoo,

naho amo fitromahañe

namorekekeañe anahareoo,

4 t’ie ho ente’ areo amy mpanjaka’

i Baveley añe ty tafatoño toy,

ami’ty hoe:

akore te nijihetse i mpamorekekey!

naho nipendreñe i fidabadoañey!

5 Fa pinoza’ Iehovà ty fitoño’

o lo-tserekeo, ty kobai’ o mpifeheo,

6 I nitolom-pamofoke ondatio

ami’ty haboseha’ey,

i nameleke ondatio ami’ty haviñera’e

an-tsarerake tsy nimete kalañeñey.

7 Manintsiñe iaby ty tane toy,

vaho mitsiñe;

ie ampipoñafan-tsabo.

8 Eka mirebeke ty ama’o o sohihio,

naho o mendorave’ i Lebanoneo:

Kanao nazevoñ’ ambane rehe,

tsy mitroatse ama’ay ty mpamira.

9 Mangetseketseke ty ama’o

ty tsikeokeoke

hifanalaka ama’o amy figodaña’oy;

ampibarakaofe’e ty ama’o o angatseo,

o nifeleke tan-tane atoio;

songa miongake amo fiambesa’eo

o mpanjakam-pifeheañeo.

10 Songa mifañontane ama’e

manao ty hoe:

Toe maleme manahake anay rehe !

Ihe hambañe ama’ay !

11 Fa nampanjotso azo mb’an-kibory

mb’atoy ty firegevoha’o,

reketse ty fikoraha’ o karara’oo;

Nalamake ambane’o ao o oletseo,

vaho mañohoñe azo o kànkañeo.

12 Akore ty nideboña’o boak’

andikerañey, ry vasian-kandro,

ana’ ty fanjirik’andro !

Finira mb’an-tane,

ihe nimpamotsake o fifeheañeo.

13 Nanoe’o an-tro’o ao ty hoe :

Hionjoñe mb’andikerañe mb’eo raho,

ambone’ o vasian’ Añahareo

ty hañonjonako ty fiambesako,

vaho hiambesatse am-bohim-pivory eo, amo ila’e avaratseo;

14 Hionjoñe ambonen-dikera’

o rahoñeo raho,

hihambañako amy Abo-Tia.

15 Te mone hazotso

mb’an-tsikeokeoke ao rehe,

pak’am-para’ i halale’ i koboñeiy.

16 Hisamb’ azo o hahaisake azoo,

hañarahara ty hoe: Itiañe hao indaty

nampiezeñezeñe ty tane toiy,

i ­nampihondrahondra o fifeheañeoy;

17 Ty nanao ty tane toy ho ratraratra,

naho nandrotsake o rova’eo;

vaho tsy nanokake ty vala-bei’e

himpolia’ o narohi’eo?

18 Songa mirotse ami’ty enge’e

o mpanjaka’ o fifeheañeoo, ie iabikey,

sindre an-kibori’e ao.

19 F’ihe ka, ro navokovoko boak’

an-kibori’o ao hoe tsampañe tiva,

an-tsaro’ ty vinono, tinomboke fibara,

mihotrake mb’amo vato an-koboñeo

hoe lolo linialiam-pandia.

20 Tsy hitrao-pileveñe am’ iereo,

amy te narotsa’o ty tane’o

vaho zinama’o ondati’oo;

toe tsy ho tiahieñe ka

ty tarira’ o lo-tserekeo.

21 Mihentseña hanjamañe o ana’eo

ty amo hakeon-droae’ iareoo;

tsy mone hitroatse

hitavañe ty voatse toy iereo,

hanitsike o rova an-tane atoio.

22 Zaho, hoe t’Iehovà’ i Màroy,

ty hitroatse am’ iereo,

vaho haitoako amy Bavele

ty añarañe naho ty sehanga’e,

ty tariratse naho ty tamingañe,

hoe t’Iehovà.

23 Hatoloko ho fanaña’ ty trandrake,

ho babangoa-mangenakenake;

le ho piopioheko am-pamafa-

karotsahañe, hoe t’Iehovà’ i Màroy.

24 Nifanta’ Iehovà’ i Màroy ty hoe:

Toe ho tondroke ze fitsakoreako;

hijadon-ko do’e ze aereñereko.

25 Ho folaheko an-taneko ao ty Asore,

ho lialiàko am-bohiko eo;

habalake ty joka’e am’ iareo,

vaho havotsotse an-tsoro’ iareo

ty kilanka’e.

26 Zay ty safiry nalahatse

ho a’ ty tane bey toy

vaho itoy ty taña natora-kitsike

amo fifeheañe iabio.

27 Naereñere’ Iehovà’ i Màroy,

ia ty hahakalañe aze?

Napololotse ty fità’e,

ia ty hampipoly aze?

29 Ko mandia-taroba, ry Pilistý iabio,

amy te pinozake ty kobaiñe nandafa azo,

fa boak’ am-baha’ ty mereñe

ty hitiria’ ty lapetake,

ie ka ty hamoa fandrefeala mibela, mitiliñe.

30 Hikama o loho rarakeo, naho

hàndre am-pipalirañe ao o poi’eo;

ho vonoeko ami’ty kerè o vaha’oo,

zay ty hanjamanañe ty honka’o.

31 Mañaoloa ry lalambey,

mikoiha ry rova;

mitranaha ry Pilistý, nahareo iaby;

hehe te boak’ avaratse añe ty hatoeñe,

tsy ama’e ty mitakàtrotse

am-pirimboña’e.

32 Akore arè ty hamaleañe

o ira’ i fifeheañeio?

Te naore’ Iehovà t’i Tsione

le hitsoloke ama’e ondati’e misotrio.