૧ હે સર્વ લોકો, તાળી પાડો;

આનંદથી મોટા અવાજે ઈશ્વરની સ્તુતિ કરો.

૨ કારણ કે પરાત્પર યહોવાહ ભયાવહ છે;

તે આખી પૃથ્વીના રાજાધિરાજ છે.

૩ તે આપણા તાબામાં લોકોને તથા આપણા પગ નીચે

વિદેશીઓને હરાવીને મૂકશે.

૪ તેમણે આપણા માટે આપણો વારસો પસંદ કર્યો છે,

એટલે તેમણે, પોતાના વહાલા યાકૂબની ઉત્તમતા પસંદ કરી છે.

૫ ઈશ્વર વિજયના પોકારસહિત,

યહોવાહ રણશિંગડાના અવાજસહિત ચઢી ગયા છે.

૬ ઈશ્વરનાં સ્તોત્રો ગાઓ, સ્તોત્રો ગાઓ;

આપણા રાજાનાં સ્તોત્રો ગાઓ, સ્તોત્રો ગાઓ.

૭ કેમ કે ઈશ્વર આખી પૃથ્વીના રાજા છે;

સમજદારીથી તેમની પ્રશંસાનાં ગીતો ગાઓ.

૮ ઈશ્વર વિદેશીઓ પર રાજ કરે છે;

ઈશ્વર પોતાના પવિત્ર સિંહાસન પર બિરાજમાન છે.

૯ લોકોના રાજકુમારો એકત્ર થયા છે

ઇબ્રાહિમના ઈશ્વરના લોકોની સાથે બધા ભેગા થયા છે;

કેમ કે પૃથ્વીની સર્વ ઢાલો ઈશ્વરની છે;

તે સર્વોચ્ય છે.