૧ જેઓ યહોવાહમાં ભરોસો રાખે છે

તેઓ સિયોન પર્વત જેવા અચળ છે, જે કદી ખસનાર નથી, પણ સદાકાળ ટકી રહે છે.

૨ જેમ યરુશાલેમની આસપાસ પર્વતો આવેલા છે,

તેમ આ સમયથી તે સર્વકાળ માટે

યહોવાહ પોતાના લોકોની આસપાસ છે.

૩ દુષ્ટતાનો રાજદંડ ન્યાયીઓના હિસ્સા પર ટકશે નહિ.

નહિ તો, ન્યાયીઓ અન્યાય કરવા લલચાય.

૪ હે યહોવાહ, જેઓ સારા છે

અને જેઓનાં હૃદય યથાર્થ છે, તેમનું ભલું કરો.

૫ પણ જેઓ પોતે આડેઅવળે માર્ગે વળે છે,

તેઓને યહોવાહ દુષ્ટોની સાથે લઈ જશે.

ઇઝરાયલ પર શાંતિ થાઓ.