1 Eeꞌnoko teeꞌkoo niiꞌ baruꞌ nemariarooꞌnaang; teeꞌkoo neeꞌke Sailas naankai arooꞌampesieeng teka Aateni-namono-koo siꞌmureeꞌnaang neeꞌ neeꞌka, eeꞌnoko neeꞌke botoampetuꞌ tee Timoti diiꞌanko. 2 Timoti tee neeꞌmaikoꞌpinaꞌ, neeꞌ ninka Kumponing-nung botovotonaaꞌ, tampara doorenang Jiisuuꞌ Karistooꞌkoong nau-anta. 3 Tee botoampetuꞌ puring-antaruriiꞌnaang, eeꞌnoko unaunturiiꞌnaang diiꞌkoo narung paapaaꞌaraꞌneeng-koo poreꞌanta kuneꞌuma. Diiꞌke diiꞌka noruꞌeri otong teeꞌ nariꞌ poreꞌanta kuneꞌampiiꞌnaang Jiisuuꞌke tero tampuuꞌnaꞌ. 4 Tenang diiꞌ niiꞌ ninka oꞌnori tee napoꞌ niiꞌke naurarampikoꞌ mmeꞌ nkoaravaruko damaꞌke tee niiꞌ turamaariaining, enang ooveriko eeꞌnaꞌ nkomaarimaang. 5 Teeꞌkoo, nemaravarui, nka namuꞌke botoansieeng tee Timoti diikaang otootoꞌ noruꞌkoo piamora, aaꞌpamira, “Teing arekeeꞌ otorong: Sietaniꞌke paaravuriko mmeꞌ masikaꞌantavai otong Karistooꞌ? Aiꞌ duaꞌariruꞌnunge?” – niikaang nko-nko daang deemparaꞌneenga. 6 Teka tee Timoti toroarieeng neeꞌanko diiꞌankoita. Eeꞌnoko toroarara tampara minkunaa naumuresieeng diikaang baito-koo eeꞌnoko diikaang piaa. Aaꞌmuresieeng diiꞌke niiꞌ tampaꞌ noruꞌmererima neeꞌ napoꞌ oo-koo aaꞌnaꞌ piarorimaung, teeꞌ nariꞌ neeꞌ diiꞌ oo-koo aaꞌnaꞌ piamoremanaꞌ. 7 Eeꞌnoko ee niiꞌmaikororiꞌ, teeꞌ taaravampeta tee poreꞌanta eeꞌnoko turang kuneꞌampimaung ampaꞌmorema domang kuaaꞌmoretuꞌ, diikaang baito purimpari otoko tasiꞌpampeta. 8 Diiꞌ purintariri Kumponing-koo biꞌdariri otoriko niiꞌ Sailas dovang Timoti enang domamariri oꞌnoring. 9 Enang tee niiꞌke aaꞌnaꞌ tampara minkuampimaung Kumponing-koo diiꞌke Kumponing tampaꞌ siomperiko dotumarimaung-koo. 10 Aaꞌnaꞌ kunsimarimaung muung eeꞌnoko doong diiꞌ ninka eeꞌning ninka oing oomeeriiꞌnaang. Eeꞌnoko pakurarampiai diiꞌ apukaꞌdariri otoing-koo diikaang baito-koo.

11 Enang tee Niuma Kumponinge eeꞌnarai eeꞌnoko Ovoring Jiisuuꞌke koong-antavureaing niikaang taung diiꞌ beeroꞌkoo nanampiainavung. 12 Eeꞌnoko Ovoringe diikaang aarumo piaa-koong pankaꞌantareruriaing bera aaꞌnaꞌ tampaꞌ piaareeriainaꞌ diiꞌ diiꞌka eeꞌnoko ookara nantoong piaaverereriainaꞌ, teeꞌ nariꞌ niiꞌke diiꞌ piaararampimanaꞌ. 13 Eeꞌnoko teeꞌkoo puring-antaruriai tuumpi otoriaing deentariri otoriainaꞌ meekaꞌdariri niikaang Kumponing eeꞌnoko Niuma-koo uroꞌkanooꞌke tenang Ovoring Jiisuuꞌ Toroaravainang teing ninka ookara bakaning meekupoong ninka.