146
Pahrennae hoi kawi Cathut
Kathutkung: Panuekhoeh
1 BAWIPA teh pholen awh.
Oe ka hringnae BAWIPA hah pholen haw.
2 Kai teh, kahring lahun nah BAWIPA ka pholen han.
Ka hringyung thung ka Cathut teh la sak hoi ka pholen han.
3 Bawinaw hoi na ka rungngang thai hoeh e
taminaw hah kâuep awh hanh.
4 Ahnimae muitha a tâco toteh, talai lah doeh a ban awh.
Hatnah hnin vah, ahnimae pouknae pueng teh be a rawk pouh.
5 Jakop e Cathut hah na kabawmkung lah kaawm sak e,
amae Cathut ka ngaihawi e teh, a yaw ahawi.
6 Hote Cathut ni kalvan, talai, tuipui,
hoi hetnaw dawk kaawm e naw pueng hah a sak.
7 Rektap lah kaawmnaw hanelah, lawk a ceng pouh teh,
a von kahlamnaw rawca a poe.
BAWIPA ni thongkabawtnaw a hlout sak.
8 BAWIPA ni mitdawnnaw mit a hmu sak.
BAWIPA ni katabutnaw hah a loungouk sak teh,
tamikalannaw hah a lungpataw.
9 BAWIPA ni Jentelnaw hah a khetyawt teh,
naranaw hoi lahmainunaw hah a kabawp.
Tamikathoutnaw e lamthung teh, a rawk sak.
10 BAWIPA ni a yungyoe a uk han.
Oe Zion na Cathut ni catounnaw totouh a uk han.
Hallelujah.