147
Ka lentoe Cathut pholennae
Kathutkung: Panuekhoeh
1 BAWIPA teh pholen awh.
Maimae Cathut hah la sak laihoi pholen e teh ahawi.
Pholen e teh atangcalah, a kamcu teh ngai ao poung.
2 BAWIPA ni Jerusalem kho a sak teh
pâlei lah kaawm e Isarelnaw hah a kamkhueng sak.
3 A lungthin kareknaw hah a dam sak teh,
ahnimae hmânaw hah a kawm pouh.
4 Âsinaw hah a parei teh,
ahnimae minnaw hai koung a phung.
5 Maimae Bawipa teh a len teh,
thaonae dawk bahu ao,
thaipanueknae dawk khori tawn hoeh.
6 BAWIPA ni kârahnoum e naw hah a tawm,
tamikathoutnaw hah talai dawk rek a payan.
7 Lunghawilawkdeinae laihoi BAWIPA koe la sak awh.
Ratoung kueng laihoi maimae Cathut hah pholen awh.
8 Kalvan hah tâmai hoi a huem teh,
talai hanelah kho a rak sak teh,
monruinaw dawk phonaw a pâw sak.
9 Moithangnaw hoi kacaikaringe
vongacanaw hah rawca a poe.
10 Bawipa ni marang tha lunghawikhai hoeh.
Tami e khoknaw lunghawikhai hoeh.
11 Bawipa ni ama ka taket e taminaw hoi
amae pahrennae ka ngaihawi e taminaw doeh a lunghawikhai
12 Oe Jerusalem, BAWIPA hah pholen haw.
Oe Zion, na Cathut hah pholen haw.
13 Bangkongtetpawiteh, Bawipa ni nange
kholongkha khannae hah a caksak teh,
nang thung kaawm e camonaw hah yawhawi a poe.
14 Bawipa ni nange thungup vah roumnae ao sak teh,
katuipounge rawca hoi na von a paha sak han.
15 Ama e kâpoelawk hah, talai van a patoun.
A lawk teh, karang poung lah a yawng.
16 Tadamtui hah tumuen patetlah a poe.
Tadamtui kamkak e hah hraba patetlah a dan.
17 Ama e rounnaw hah vaiyei kanuinaw patetlah a pabo.
Bawipa ni a pâding sak e hah apinimaw a khang thai han.
18 A lawk hah a patoun teh, hotnaw hah a kamyawt sak.
Ama e kahlî a tho sak toteh, tuinaw teh a lawng awh.
19 A lawk hah Jakop miphun koe thoseh,
phung hoi lawkcengnae teh Isarel miphun koe thoseh, a pâpho.
20 A louk e apipatet e miphun koehai hettelah sak boihoeh.
Hote Jentelnaw teh,
Lawkcengnae hah panuek awh hoeh. BAWIPA teh pholen awh.