6
Sləray aŋa Pol
1 Iyay, anu kà anu azlaməna maɗàh sləray la Zəzagəla, lagwa kà məgoɗ à akul kà: ‘Kaɓəzàw vok mahamay aŋa Zəzagəla, ama ɗahàw haŋkəli kà uwaga aŋa matəfa kà akul aw.’ 2 Tatsetsèr à wakità Zəzagəla à abà, agòɗ à tsəhay aŋha kà:
ˈMok uwana kaslà adaslay kà, gi aŋa maɗàh delga à azladza kà, gətsəɓ à ka sləm,
ŋgaha la mok uwana kaslà asla kà, maɓəl azladza kà gəzlak à ka.ˈ✡ 6.2 Yesayya 49.8
Azladeda, lagonay la uwana kaslà uwana asà à Zəzagəla kà maɗaha à anu delga, lagonay la uwana asal maɓəl azladza.
3 Asa à anu kà dza atsəɗ gay à sləray gami à tsəh aw, kà uwaga à uwana məɗàh haŋkəli, kà anu aŋa maɗəɗ gay à madiŋal gəl à vok aŋa dza à ahəŋ aw. 4 Ama la tatak la abà gesina kà, məpəhla ala, kà anu azlaməna sləray aŋa Zəzagəla. Mədàgay la matərəɓay la abà, mədàgay la mazaw la gəl la abà amiyaka azlaŋgərpa taɗuw à anu bay kà, məbasiŋ kiya uwaga pəra. 5 Azladza taslahahanula, tawats anu à daŋay, tamaham à anu azladza à gəl. Sləray babay kà aɗuwa anu, vərdi anik babay kà mədzehahal aw, məɓaza tetəvi kà mazuw tatak may babay aw. 6 Mapəhla uwaga ala, kà anu azlaməna maɗàh sləray aŋa Zəzagəla la ləv tekula, məsəl dziriga, anu azlaməna mabasiŋ, anu azlahayhay. La mazlakay aŋa Masasədok tsikaslaga kà, məwoy azladza anik la ləv tekula. 7 La maz sayda dziriga, Zəzagəla avà à anu ndzəɗa aŋha. Maday lela gami kà bokuba kazlaŋa guvəl, uwana məpalla guvəl la huma azlaməna məzam gami, kà mahəlla à ahəŋ. 8 Azladza anik tasləkaw anu, ŋgaha azlaanik tapəsew anu babay. Tapəh gay delga lakəl gami, ŋgaha tapəh mawisiga babay aya. Azladza anik tanərəz anu bokuba anu azlaməna fida, baməraka dziriga məpəhay. 9 Tanərəz anu kà bokuba tasəl anu aw, ama la dziriga kà, tasəl anu. Tanərəz anu bokuba anu azlamazimnekiɗ, ama anu la sifa. Taslàhàhanula, ama taslala vok aŋa makaɗanula aw. 10 Amiyaka mədagay la mazaw la gəl la abà məŋga kà, məda à huma à gay la marabay. Məkor tatak məŋga la gudəŋ uwanay la vok aw, ama aŋuvaw məpak azladza ala kà azlagorobu la tetəvi aŋa Zəzagəla la tsəh. Haɗay kà, bokuba məkor tatak aw, ama tatak gesina kà, anu məkoray la huma aŋa Zəzagəla.
11 Akul azla Korintiya, məpəh à akul uwanay, kà bà la paraka, tatak la ahəŋ məhaɗaŋ à ahəŋ la tsəh ləv gami aw. 12 Anu kà məwoy akul la ləv tekula, ama akul la uwana kawoyaw anu aw. 13 Gəpəh à akul gay bokuba akul azlabəza gulo: Ɗahàwnəŋ bokuba uwana məɗahakullaŋ suwaŋ, pòkwàw ləv aŋkul la paraka.
Məham gay à vok la azladza à uda aw
14 Azladza, uwana tasəl Zəzagəla aw kà, kahamaw à sləray à abà akul nna aw, maham gay à vok uwaga kà akəsa vok aw. Kakay dziriga aham gay à vok la mawisiga ma? Kakay uɗaka aham gay à vok la mələs ma? 15 Kakay azla Kristu la seteni taslala vok aŋa matsən vok gay la slaka gà ma? Tsa baŋa kità ma, kakay masla madiŋal gəl à vok, atsən vok gay la dza uwana adiŋal gəl à vok aw ma? 16 Mana ma à uwana aham gay à məŋ gày Zəzagəla, uwana la sifa à vok, la gày mazlazlay ma? La dziriga kà, anu kà, anu azlaməŋ gày aŋa Zəzagəla. Kà uwana Zəzagəla agòɗ:
ˈGədàdza à ahəŋ la tataka aŋatà la abà, gədàgay la atà, gədàgay Zəzagəla aŋatà, tadàgay azladza gulo.ˈ✡ 6.16 3Musa 26.12
17 Kà uwaga à uwana Sufəl Zəzagəla agòɗ à azladza aŋha:
ˈSàw à uda la tataka aŋatà la abà, kadzaw à ahəŋ akul la atà nna aw. Katapaw ahàl à tatak àlàhga aŋatà, uwana à vok taɗehəŋ aw, kiya uwaga kà, gədàkəs akul.
18 Gədàpaka Baba aŋkul, akul babay kadàpakaw azlakohana gulo la azladəgam gulo.ˈ✡ 6.18 2 Samuyel 7.14; Yesayya 43.6; 52.11
Kiya uwaga à uwana Zəzagəla uwana asla à tatak gesina à vok, agòɗ à atà.