Sou Misete kena Yesuse rebe Matiuse Ilekiule
Lepate Menai
Meije buku Sou Misete bei Alla kena Yesuse rebe Matiuse ilekiule.
Matiuse eni buku meije ebeteke Sou Misete kena Yesuse be Yesuse mere Maka Hlamate rebe akmena Alla ItalukeIne. Kena Alla Eni lepata rebe nabiaru esi lekire, ebeteke saisa rebe Alla Italuke ete Eni tamataru, Ionoe baue Yesuse mere peneka. Masike Yesuse, rueleI bei tamata Yahudi kai Irue mei nusare saka tamata Yahudi, po Sou Misete mere batuke ete tamata Yahudi mo po ete pusue tamata mei nusa meije.
Matiuse eni buku meije lekie atutu mimise; menai bei ruele Yesuse, eleki baptiseNi kai Isupu teheke bei ro tiaru esi elake, eleki Eni makerike me Galileare. Ete mere Ihotba, Iatetuke kai Iono tamata makerakaru esi mise. Meru pela, eleki buku meije ealenake Yesuse Eni lalane bei ndi Galilea lopai Yerusaleme, kai saisa rebe eono kenaI kena miku ului rebe Imata nere, eti Imata kai Ikwana suike.
Kena buku meije Matiuse ileki be, Yesuse mere Kuru elake, rebe Iatetuke be Alla Ipletae tamata. Yesuse lekwe Eni kbasa kena Ibeteke Alla Eni hukume esi natire. Yesuse Iatetuke, leki lulupukelu lulu saisa rebe Iatetukele.
Isi
1. Ruele Yesuse kai Ikerike memenaije (pasale 1-4)
2. Yesuse Iatetuke tamata bokala ndete ulate (pasale 5-7)
3. Tanda herana rebe Yesuse Ionolu leke aseluke Eni kbasare (8:1-9:34)
4. Yesuse Iatetuke Eni maka luluaru kena Iulakesi keu lepae Sou Misete mosare (9:35-11:1)
5. Yelu rebe eono me otoi Galileare rebe etiluke be Yesuse mere Ile Rebe Alla IulakeNi kena hlamate tamatare (11:2-12:50)
6. Perumpamana rebe ubeteke Alla Ipletae tamatare (13:1-52)
7. Yesuse Eni makerike me kota rebe tehaike kai me otoi Galileare kai Eni makerike pamulire (13:53-17:27)
8. Yesuse Iahnau Eni maka luluaru loko tamata rebe esi luluIje esi atataru (pasale 18)
9. Yesuse Ikeu lolete Yerusaleme kai Irare kai tamata Yahudiaru esi elakaru (pasale 19-23)
10. Yesuse Ilepa loko yelu rebe tatike pine uonore (pasale 24-25)
11. Tamata esi bunu Yesuse kai Ikwana suike (pasale 26-28)
1
Daptare kena Yesuse, Maka Hlamate Irulu bei ntuana menaru
1:1-17
(Luk. 3:23-38)
Yesuse, Maka Hlamate Irulu bei kamale Dauta kai Irulu bei Abrahame le,
Abrahame eni nanae kena Isake,
Isake eni nanae kena Yakupe,
Yakupe eni nanae kena Yehuda kai kwalinisi,
Yehuda eni nanae kena Perese kai Sera, bei eni bina Tamare.
Eleki Perese eni nanae kena Hesrone,
Hesrone eni nanae kena Rame,
Rame eni nanae kena Aminadape,
Aminadape eni nanae kena Nahasone,
Nahasone eni nanae kena Salmone,
Salmone eni nanae kena Boase bei eni bina Rahape,
Boase eni nanae kena Obeta bei eni bina Ruta,
Obeta eni nanae kena Isai,
eleki Isai eni nanae kena kamale Dauta.
Kamale Dauta eni nanae kena Salomo bei Uria matale eni bina,
Salomo eni nanae kena Rehabeame,
Rehabeame eni nanae kena Abia,
Abia eni nanae kena Asa,
Asa eni nanae kena Yosapate,
Yosapate eni nanae kena Yorame,
Yorame eni nanae kena Usia,
Usia eni nanae kena Yotame,
Yotame eni nanae kena Ahase,
Ahase eni nanae kena Hiskia,
10 Hiskia eni nanae kena Manase,
Manase eni nanae kena Amone,
Amone eni nanae kena Yosia,
11 Yosia eni nanae kena Yekonia kai kwalinisi, kena mere tamata Babelaru esi kerike mahake pusue tamata Yahudiaru, eleki esi kerisi me kota Babele.
12 Kena esi supu keri me kota Babele pela,
eleki Yekonia eni nanae kena Sealtiele,
Sealtiele eni nanae kena Serubabele,
13 Serubabele eni nanae kena Abihute,
Abihute eni nanae kena Elyakime,
Elyakime eni nanae kena Asore,
14 Asore eni nanae kena Sadoke,
Sadoke eni nanae kena Akime,
Akime eni nanae kena Eliute,
15 Eliute eni nanae kena Eleasare,
Eleasare eni nanae kena Matane,
Matane eni nanae kena Yakupe,
16 Yakupe eni nanae kena Yusupe, Maria eni mokwai,
rebe eni nanae kena Yesuse rebe kotiNe Maka Hlamate.
17 Hoko bei Abrahame eti roma kamale Dautare rulu rebai butu esa lesini ata, kai bei kamale Dauta eti roma tamata Yahudiaru esi supu keri me kota Babele rulu rebai butu esa lesini ata lekwe, kai bei esi supu keri me kota Babele eti roma Kamale Hlamate, rulu rebai butu esa lesini atare neka.
Ruele Yesuse Kristuse
1:18-25
(Luk. 2:1-7)
18 Ruele Yesuse, Maka Hlamate elere: Kena inaI Maria kai Yusupe luasi lalesi esa kena kai lomai, kena luasi rue kai lomai lupe bina mokwai mosa, Maria ikeu blublulu peneka bei Ro Misete Eni kbasare. 19 Hoko Yusupe, lalei kena ihleke Maria ndendene le Yusupe iono lulu tamata Yahudiaru esi atataru titinai kai isuka kena iono asomie eni bina ete tamata bokala mo. 20 Po kena inoake mere, ikmani kena Tuhane Eni malekate ibeteke lokoi be, “Yusupe, kamale Dauta eni anubu, rilamu kena rana Maria kena amu bina yake, le kwetele rebe ikeu blublulu leI mere bei Ro Misete Eni kbasa. 21 Namake pine iruele kwete mokwai, hoko aono Eni nane Yesuse, le Ile mere pine Iono hlamate Eni tamata Yahudiaru bei esi dosaru.” 22 Ele mere leke sakesa kai lepata bei Alla rebe akmena nabi Yesaya ibetekele be, 23 “Bina sae rebe intulu kai mokwai mosa, namake ikeu blublulu kai iruele kwete mokwai, kai esi ono Eni nane Imanuele.” Imanuele esi natire Alla Imei kai ite. 24 Eleki kena Yusupe ibeture, saisa rebe Tuhane Eni malekate ibeteke eteije iono lulue. Eleki ikai kai Maria ne, 25 po intulu kaini mo eti iruele Kwete mokwai mere. Kai kena ruele Kwetele mere, Yusupe iono Eni nane Yesuse.