अय्‍युब
ब्रेक्‍ब मुर: साइ ङा टाल्‍मुत माइश्‍शो किताबम मोसा एको किताब ब्रेक्‍ब मुर बाक्‍ब, दे ब्रेक्‍शो बाक्‍ब। तन्‍न अर्को जोक्‍ब तुइक्‍ब मोसा आ बाक्‍ची ना क्‍येङा नोले ङा मुर ब्रेक्‍ब बाक्‍नीम देंनीम।
गेना बाक्‍शो: अय्‍युब ठेयब मुर दुम्‍शा, मोसा आ क्‍येङा ङोंइती, अब्राहाम, इसहाक नु याकूब आन बाक्‍ची ना ब्रोंइशो बाक्‍त। एको काथा ला ममाइ, थमा पा अय्‍युब मुर का बाक्‍त, दे उत्‍पत्ती रे यो तुंइसीब। अय्‍युब किताबम ब्रेक्‍शो नें उत्‍पत्तीमी यो बाक्‍नीम।
ऊज अय्‍युब १:१ उत्‍पत्ती १०:२३
साबा अय्‍युब १:१५ उत्‍पत्ती १०:२८
कल्‍दी रागी अय्‍युब १:१७ उत्‍पत्ती ११:३१
एलीफाज अय्‍युब २:११ उत्‍पत्ती ३६:१५
शुआह अय्‍युब २:११ उत्‍पत्ती २५:२ नु अर्को।
मार ब्रेक्‍शो:
१. अय्‍युब शुश शोंप पाइश्‍शो नु श्‍येत जाइब दुम्‍शो अय्‍युब १:-३:-
२. अय्‍युब आ वारच नु लोव़ पशो अय्‍युब ४:-३७:-
३. अय्‍युब परमप्रभु नु लोव़ पशो अय्‍युब ३८:-४२:६
४. अय्‍युब श्‍येत जवा नोले अय्‍युब ४२:७-१७
1
अय्‍युब कली नाक्‍शो
साइ नेसी ऊज रागीमी अय्‍युब नें पाइश्‍शो मुर का बाक्‍माक्‍‍त। मेको ब्रोंइम सम्‍म दोस मतथु नु रिम्‍शो थुं पाइश्‍शो दुम्‍शा बाक्‍चा माल्‍ब मुर बाक्‍माक्‍त। मेको परमप्रभु कली मान पा हिंशा मरिम्‍शो पतीक रे ङोन बाक्‍ब मुर बाक्‍माक्‍‍त। येरमीया २५:२०; बिलाप ४:२१; इजीकीएल १४:२४,२०; याकूब ५:११ मेको के ७ जना तौ नु तमी सां बाक्‍मा बाक्‍त। मेको के ७ हजार भेडा, हजार सां दल‍ओंठ, ५ सहे हाल ब्‍यफ नु ५ सहे गधा बाक्‍मा बाक्‍त। मिनु शुश वाइलीम वाइल यो बाक्‍मा बाक्‍त। मोपा अय्‍युब पूर्ब ङा नेल्‍ल क्‍येङा शोंप पाइश्‍शो नु ठेयब मुर बाक्‍माक्‍त। मेको आ तौपुकीम पाल्‍पालो पा आन आन खिंमी भोज पतीक पाइबाक्‍मा बाक्‍त। मिनु मेकोपुकीम जचा तूचा कली आन समी सांफा आन कली यो ब्रेप्‍‍बाक्‍मा बाक्‍त। मिनु अय्‍युबम मेको आन भोज पतीक नाक्‍त नेल्‍ल नुम नोले, आ तमी तौ आन कली “परमप्रभु आ ङोंइती ठीक सेल्‍सीन” देंथ, मुर सोइक्‍बाक्‍माक्‍त। मिनु अय्‍युबमी सुनी कना बोक्‍शा, मेको आन पर्बम चोशा चढ़ेतीक का का चढ़ेशा, मेको आन पाप क्‍याम्‍तीक गेय पाइबाक्‍माक्‍त। मारदे हना मेकोमी “आं आलपुकीम मारेइ पा परमप्रभु आ पर्बम पाप पामे कों” दे मिम्‍शा, गेना हना यो मो पाइबाक्‍माक्‍त।
ङोंइती ङा खेयप नाक्‍शो
मिनु काबु स्‍वर्गम बाक्‍ब परमप्रभु आ मुरपुकी परमप्रभु यावे आ ङोंइती जाक्‍मानु, सैतान यो मेकोपुकी नु जाक्‍माक्‍त। अय्‍युब २:१; उत्‍पत्ती ६:२; १इतिहास २१:१ मिनु परमप्रभु यावेमी सैतान कली “गे ते रे जाक्‍ङे?” दे हिल्‍लो पवा बाक्‍त। मिनु सैतानमी परमप्रभु यावे कली “रागी ङा एर ओंथ नेल्‍ल हिरशा जाक्‍ती” देंमाक्‍त। मिनु परमप्रभु यावेमी सैतान कली “गे आं गेय पाइब अय्‍युब कली तवी? परमप्रभु कली मान पा हिंब, मरिम्‍शो पतीक रे ङोन बाक्‍ब, रागीम मेको खोदेंशो पा पाप मपाइब नु ब्रेम्‍शो मुर अरु सुइ मबाक्‍नीम” दे मदा बाक्‍त। मिनु सैतानमी परमप्रभु यावे कली “मार, अय्‍युब परमप्रभु कली मो मान पा हिंशो बाक्‍बा ङा? भजन संग्रह ७३:१३ 10 गे मेको कली मेको आ खिं, आ शोंप नु आ मारेइ मारेइ नेल्‍ल एर ओंथ तेइ तेइ रे थरपु हिरशा, मवोइश्‍शो बाक्‍नीनी ङा? मेको आ गेय नेल्‍लेम गे आसीक गेशा वोइश्‍शो बाक्‍नीनी। मेको आ क्‍यारश भेडा नु बी ब्‍यफ शुश दुम्‍शो बाक्‍नीम। 11 तन्‍न गे इन गुइ दिंशा, मेको आ मारेइ मारेइ थि‍ने। मिनु मेकोमी इन कली इन ङोंइतीन सराप चीले पाइब” देंमाक्‍त। 12 मिनु परमप्रभु यावेम सैतान कली “दुम्‍ब मोदेंशोन दुम्‍ल। मेको के मार मार बाक्‍मे, मेको नेल्‍ल इ मिम्‍शो पावो। तन्‍न अय्‍युब कली चहिं मारेइ मपतो” दे मदा बाक्‍त। मिनु सैतान परमप्रभु यावे आ ङोंइती रे गाक्‍माक्‍त। ब्‍यवस्‍था ८:२
अय्‍युब आ मारेइ मारेइ खतम दुम्‍शो
13 मिनु काबु अय्‍युब आ तमी तौ आन ठेयब लोक्‍ब आ खिंम, जन जन, तून तून बाक्‍मा बाक्‍‍त। 14 मेको नाक्‍ती लोव़ कुरब मुर का दोरशा जाक्‍शा अय्‍युब कली “ब्‍यफपुकी वाक्‍ना वाक्‍न बाक्‍मानु नु गधापुकी मेको आन नेक्‍था जोना जोन बाक्‍मानु, 15 साबा रागी ङा मुरपुकी जाक्‍शा, गोठला आन कली लडाइ तोशा साइक्‍तेक्‍म। मिनु मेको मारेइ मारेइ योल्‍ताक्‍म। इन कली एको लोव़ शोव़चा कली गो का ला ब्रोंइती” देंमाक्‍त। 16 मेकोमी मेको लोव़ पन पना अर्को लोव़ कुरब मुर का जाक्‍शा, मेकोमी “परमप्रभु आ मी सरीङ रे दोक्‍शा, भेडा नु गोठला नेल्‍ल आन कली नेक्‍तु। इन कली एको लोव़ शोव़चा कली गो का ला ब्रोंइती” देंमाक्‍त। भजन संग्रह ७८:४८ 17 मिनु मेकोम लोव़ पन पना, अर्को लोव़ कुरब मुर का जाक्‍शा “हुल सां कल्‍दी रागी ङा मुर जाक्‍शा, गोठला आन कली तरवारम क्‍योरशा दल‍ओंठ नेल्‍ल योल्‍ताक्‍म। इन कली एको लोव़ शोव़चा कली गो का ला ब्रोंइती” देंमाक्‍त। येरमीया ५१:२४ 18 मेकोम लोव़ पन पना अर्को यो दोरशा जाक्‍शा “इन तमी तौ आन ठेयब लोक्‍ब आ खिंम जना जन तूना तून बाक्‍तेक्‍म। 19 मेना गोरशो रागी रे फश गिवार जाक्‍शा, खिं आ एर ओंथ नेल्‍ल रे थोक्‍ताक्‍व। मिनु मेको खिं मेको आन तार ब्रेश्‍शा, मेको नेल्‍ल आन कली चिप्‍शा साइक्‍तु। इन कली एको लोव़ शोव़चा कली गो का ला ब्रोंइती” देंमाक्‍त।
20 मिनु अय्‍युब बोक्‍शा आ वा खाक्‍गा बाक्‍त। आ चां प्रेक्‍गा बाक्‍त। मिनु खुम्‍की पा बाप्‍शा, 21 “गो आं ममा आ कोव़ज रे शिश्रा यिती। शिश्रा लेश्‍शा लाइनुङ। गो ते रे श्‍येत्‍थी जाक्‍ङा, मेकेन श्‍येत्‍थी लेश्‍शा, लाइनुङ। मेको नेल्‍ल परमप्रभु यावेमी गेती। मिनु मेकोमी नेल्‍ल लेश्‍शा लाइक्‍तु। परमप्रभु यावे आ नें ठेयब बाक्‍ल” देंमाक्‍त। उपदेसक ५:१४; १तिमोथी ६:७; याकूब ५:११
22 मेको नेल्‍लेमी अय्‍युबमी पाप मपवा बाक्‍त। परमप्रभु कली दोस मगेवा बाक्‍त।