1 Jisasame lotuu anda andake kame doko yakinatala peamopa, baanya disaipolo dupanya mendeme baa lamaiyoo, “Mana Lenge Akali, anda yale epe dupa kana yale auu petae dupame petae kalyamo kanda” lea. 2 Dopa leamopa, Jisasame baa lamaiyoo, “Anda yale epe kana soo namba-namba pyoo petae kalyamo kandeleno datupa, tanga dopa petae nakatata. Pitaka pyao kaluo nepatamina” lea.

3 Jisasa Olipimanda pituu, lotuu anda andake katenge dokaita-kaita, kandamatae petea. Peteamopa, Pita, Jemesa, Jone, Andruapi, dutupame elyakao baa tipa pyoo, 4 “Embame laleno dutupa gii andukupa pitape? Kongali aipale mende pitamopa, naimame kandatala, dutupa pitaka angi jalanya, tengesa petelyamona lao masetamape? Naima langi” leami. 5 Dopa leaminopa, Jisasame yanu pyao, “Endakali mendeme nyakama minao kyakasetana, kandao kalyepape. 6 Endakali longome nambanya kengenya ipupala, 'Namba Kraisa dokona' lao, endakali longo minao kyakasetami. 7 Yanda pilyamino lapaepi, yanda ingingi lapaepi, dupa sepala, nyakama walu nalalapape. Pipae, lapaepi, dupa pitaka ipatamoaka doko, yuu etapenge gii doko maitapyao ipata. 8 Kantri mendeme kantri mende yanda pimaita, kiŋi mendeme kiŋi mende yanda pimaita pitami. Dee yuu wakale-wakale dupanya titiwali dupa minata, lopo andake dupa sepa pita. Dopa pitamo doko, enda wane manjanya, maita pingi dopale joo pita.

9 Endakali dupame nyakama anjoo soo, kanjole dupa-kisa kote laa patami. Dee Judamanya lotuu anda dupanya nyakama pyatamiakana, kandao kalyepape. Nyakamame namba watao paeyataminosa, endakali dupame gapenapi, kiŋipi, dupanya enombanya nyakama laminao pao, katasetami. Katasetataminopa, nyakamame nambanya pii doko akali dokaita panao lamaitami.

10 Yuu etapenge gii doko ipatala naeyatamopa, wambao endakali dupa pitaka-kisa wai pii epe doko lamaiyoo taeyapenge. 11 Endakali dupame nyakama anjetala, laminao kote anda dokonya pataminopa, nyakamame aipa lamape lao masala naeyalapape. Kote lapenge gii dokopa, Goteme nyakama pii ditali pyoo lapape. Nyakamame latamino doko masoo laa naeyatami. Oli Spiritame ditamopa latami. 12 Akali mendapuame nyakamanya kaiminingi etete dupa enge nyepala, pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala, nyakamanya endangi takangepi dupa pyao kumasina lao, maitamiaka. 13 Nyakama namba tata joo katataminosa, endakali dupa pitakame nyakama etete imbu kaengitami. Dopa pitaminopapi, endakali mende kyeto joo katao, etatamo doko baa Goteme pyoo nyetana” lea.

14 Jisasame dee mende lao pituu, “Gote mambo napina lao kaita lyokapenge, myuku pipae dopale mende lotuu anda andake dokonya andakote nyoo setatamino dokopa, endakali Judia katatamino dupa yuu manda dupanya paka pupenge jetana” lea. (Pii dake itaki pyateno dokome tenge doko masoo nyepe.) 15 Gii dokopa, endakali mende baanya anda patakisa katatamo dokome, baanya oapi andakote setamo dupa nyala napupenge jeta. 16 Dee endakali mende eesa katatamo dokome, baanya yonge pee ketae pingi doko pilyoo nyala naeyapengeaka jeta. 17 Enda wane tongatapi, enda wane andu nengepi, dupa gii dokopa etete kondo pita! 18 Kenda pipae dutupa koo kana palitamo dokopa, naepena lao loma soo kalyepape. 19 Goteme yuu kaitipi wasiamo dokonya pituu, indupa tuu lao, kenda pipae epelyamo dupa pitaka kenda pipae ene ipatamo dokome ita minata. Dee kenda pipae dopale mende tanga tangapi naipata. 20 Kamongome yuu gii dupa muu pisala naeyatamo doko, endakali mendaipi mende nakatata. Dopaka doko, baanya endakali yapao nyepae dupa lao masetala, kenda pipaepi, yuu giipi, dupa minao muu piseta.

21-22 “Gii dokopa Gotenya yapao nyepae endakali dupa lanyoo lemba pyalanya, sambo Kraisa mane-mane pipaepi, sambo propetapi, dupame ipupala, kongalipi, mirakolo kalaipi, dupa pitami. Dopana, endakali mendeme nyakama langyoo, 'Kraisa doko asa kalyamo kanjepa! Amasa kalyamo kanjepa!' lea kandeno doko, baame kiningi lelyamona lao nyakamame masala naeyalapape. 23 Nambame enesa tanga pitamo dupa langilyona, nyakama kandao kalyepape” lea.

24-25 Jisasame dee mende lao pituu, “Kenda pipae andake ipatamo dupa etapatamopa, 'kaitinya singi dupa pitaka ema-ema pita. Dopa pitamopa, niki doko iminjoo, kana doko tii napyoo, kaitinya bui dupa kondao isa ipao pita.' 26 Dopa petatamopa, Akalinya Ikiningi doko baanya pupu lapaepi, tii pipaepi, dupanya pituu kopa tambe-tambe ipatamopa, endakali dupame kandatami. 27 Dokopa yuu lemba dupa pitakanya pituu, enjele dupame Gotenya endakali yapao nyepae dupa pitaka lanyoo elyambu pyekena latana” lea.

28 Jisasame dee mende lao pituu, “Nyakamame piki ita lenge dokonya mana mende nyalapape. Nyakamame piki ita mange popo pyoo, alulyamo doko kandatala, paina pyaanya pilyamona lengema. 29 Dokaita joo, pitamo dutupa pitaka nyakamame kandatala, Akalinya Ikiningi doko ipanya, etete tengesa pilyamona lao masalapape. 30 Nambame nyakama kiningi langilyo: Endakali indupa palelyamino dupa kumao etapala naeyataminopa, dupa pitaka pita. 31 Yuupi kaitipi dupa pitaka alu pita. Dopaka doko, nambanya pii doko tanga tangapi alu napita” lea.

32 Jisasame dee mende lao pituu, “Endakali mendeme yuupi kaitipi etatamo gii doko masala naengema. Kaitinya enjele dupame masala naengemaka. Ikiningi dokome apata masala naengeaka. Takange dokome iki masingi. 33 Nyakamame gii doko andukupa ipatape lao masala naelyaminona, kandao isoo kalyepape. 34 Tenda namba isa yuu dake yakinatala pato doko, akali mendeme baanya anda doko yakinatala, yuu waka mendenya pao katenge dopale. Paanya pituu baanya kalai akali dupame anda doko isoo katekena latala, kalai wakale-wakale mokosoo maingi. Dopa petala akali lome kambu isoo katenge dokome lome kambu doko isokondape pyoo isoo katekena latala, baa penge. 35-36 Patatamopa, nyakamame anda tange doko yuu kutu-kuta ipatape, palyapenge gii dokopa ipatape, kuka andatombe ipatape, yongao minao ipatape lao masala naengema. Nyakama ambe lao luu palitaminopa, baa tanda lao ipatana, kandao isoo kalyepape. 37 Nambame nyakama langilyo dokoaka, endakali pitaka lamailyona, nyakamame kandao isoo kalyepape” lea.