1 Israele tange dupame betesa yisa napalenge nengema gii dokopa, Napinya Kaeyamo Pasopa gii dokopa, dolapo ene ipanya yuu gii lapoma siamopa, pitisa mupapi, Mosesanya loo mana nyepae akali dupapimi aipa petala Jisasa waa katao, anjoo nyepala, pyao kumasemape lao, kaita kutiami. 2 Kutapala lao pituu, “Gii epe dakenya aopyoo latala, endakali dupame naima imbu kaeyapala, pundu yaka lasetamina, dopa napimanana” leami.

3 Jisasa baa taono Betani dokonya akali kopetali Saimone lenge dokonya andaka nee nao peteamopa, enda mendeme penge yakane mendenya, wele tunduma pipae muni andake pupenge, tumbatae mende minao epea. Ipupala, baame penge dokonya kambu doko tambapala, Jisasanya aiyombanya wele doko kaii lakamaiya. 4-5 Kaii lakamaiyamopa, endakali yangi peteamino dupame enda doko imbu kaeyapala, mende lamai-lamai pyoo, “Wele dake endakalimi sambaminopa, silipa muni 300 yalao nyepala, endakali daa jepae dupa maipumalina, aipuma baame mee pyoo nepelyape?” leami. Dopa latala, enda doko maka kaeyapala, pyalanya leami. 6 Pyalanya leaminoaka doko, Jisasame dokaita lamaiyoo, “Baame namba-kisa kalai epe etete mende pilyamona, pina kaeyalapa. Aipuma nyakamame enda dakenya mona kenda pisakamailyamipi? 7 Endakali daa jepae dupa koteaka lao nyakama-pipa apata katatami. Dokopa dokaita pitali pyoo nisetami. Dopaka doko, namba nyakama-pipa gii longo mende kalya naeyalamano. 8 Baame pipenge jipya doko pyomo. Baame wele tunduma pipae kaii lakalamo dokome, nambanya yonge doko malu pipenge dokonya depa lasoo pyakalamo. 9 Nambame nyakama kiningi langilyo: Yuu dupa pitakanya wai pii epe doko lao taeyatamino dokopa, enda dakeme pilyamo dupa apata lao taeyataminopa, enda dakeme pilyamo dupa masetamina” lea.

10 Judasa Iskariota doko, 12 disaipolo dutupanya mende, dokome Jisasa enge nyotoo lao masetala, pitisa mupa dupa laitaka pyaanya pea. 11 Pao lamaitiamopa, nyakamame baanya pii doko sepala, eteke pyao auu kaeyami. Auu kaeyapala, muni mendatupa maimana leami. Dokopa Judasame pitisa dokaita Jisasa laitaka pyaanya kaitini kutia.

12 Israele tange dupame betesa yisa napalenge nengema, yuu gii tee pyao dokonya, sipisipi yakane mendapu pyapala, Napinya Kaeyamo Pasopa gii doko masoo nengema. Dopa pingima gii doko epeamopa, disaipolo dupame Jisasa lamaiyoo, “Napinya Kaeyamo Pasopa nee doko naimame anja depa lamape?” leami. 13 Dopa leaminopa, baanya disaipolo dupanya lapoma lamaiyoo, “Nyakamba Jerusalema pupape. Patambinopa, akali endaki kamuo singi mendeme nyakamba kandanyalapomona, doko watao pupape. 14 Pao baa anda kolandatamo dokonya tange doko lamaiyoo, 'Mana lenge akali dokome baanya disaipolo dupa-pipa Napinya Kaeyamo Pasopa nee doko natoo, anda panda doko andusa silyape laamona' lao lamaiyepape” lea. 15 Dokopa baame anda andake ketae mendenya lumu depa latae singi mende laitaka pyaapomona, dokonya nyakambame nee depa lapape” lea. 16 Dopa lamaitiamopa, disaipolo dolapo Jerusalema pyakamatala kandeambinopa, Jisasame leamoliaka petae siamo dokonya, nyakambame nee akipi depa leambi.

17 Depa lateambinopa, yuu kuiyala peamopa, Jisasa baa 12 disaipolo dutupa-pipa epeami. 18 Ipupala nee nao pituu, Jisasame dokaita lamaiyoo, “Nambame nyakama kiningi langilyo: Nee nao pilyamano dakenya mendeme namba enge nyipumu dokome namba pyao kumasepenge akali dupa laitaka pyaapomona” lea. 19 Dopa leamopa, dokaitame mona kenda kaeyapala baa tipa pyoo, “Doko namba kandao leepe?” lao laa-laa peami. 20 Dopa leaminopa, baame dokaita lamaiyoo, “Nyakama 12 disaipolo nee disanya poeyanyoo apata nao pilyamano dakenya mendeme dopa pyaapomo. 21 Akalinya Ikiningi doko kumatana lao pepa pyapae singi dokonya, dopaka pyaapome-lamo. Dopaka doko, akali enge nyetamo doko yamataka andake mende lao kumata-lamo! Endangimi baa namandeali doko, yaka jialina” lea.

22 Nyakama nee nao pituu, Jisasame betesa mende nyepala, Gote lao yaka pilino latala konjia. Konjepala dokaita maiyoo pituu, “Dake nambanya yonge dokona, nyoo nalapa” lea. 23 Dopa petala baame kapo waene peteta mende nyepala, Gote lao yaka pilino latala, dokaita maiya. Maiyamopa, dokaitame dokonya nyoo neami. 24 Baame dokaita lamaiyoo, “Nambanya taiyoko kaii lelyo dakeme, Goteme endakali longo dupa nisoo, pii enenge mende lao setekelyamo. 25 Nambame nyakama kiningi langilyo: Namba dee waene nala naeyaowaka katao, tanga Gotenya isingi mate dokonya waene enenge doko natona” lea. 26 Dopa lateamopa, dokaitame wee mende latala, kamaka pyakalyetala, Olipimanda peami.

27 Dokopa Jisasame dokaita lamaiyoo, “'Sipisipi setao katenge doko Goteme pyatamopa, sipisipi dupa kaita wakale-wakale dupanya patamina' lao pii pepa pyapae silyamo. Lapae silyamoliaka pyoo, nyakama pitakame namba soo yakinalamino. 28 Dopaka doko, Goteme namba dee sakatasetatamopa, nyakama Galilea paa naeyataminopa, namba wambao patona” lea. 29 Dokopa Pitame Jisasa lamaiyoo, “Yangi dupa pitakame emba soo yakinatala pataminopa, nambame emba yakinala naeyatona” lea. 30 Dopa leamopa, Jisasame baa lamaiyoo, “Nambame emba kiningi langilyo: Indupa kuka gii dakenya, yaka pauli pii lapo pyoo, ene laanya pitamopa, paa tepomasa embame namba nakandengena laapenona” lea. 31 Dokopa Pitame etete kyeto joo baa lamaiyoo, “Nambame emba yakinala naeyato. Emba kumateno dokonya namba apataka kumatambana” lea. Dokopa disaipolo yangi dupa pitakame dopaka leami.

32 Dokopa dokaita Gesemani ee dokonya peami. Pupala Jisasame baanya disaipolo dupa lamaiyoo, “Namba loma sotoo, nyakama asa pilyepape” lea. 33-34 Dopa latala baame Pita, Jemesa, Jonepi, dutupa lanyoo, umbisale pea. Pupala baa mona etete kenda kaeyapala, dokaita lamaiyoo, “Nambanya mona doko etete kenda petala, kumapenge julumuna, nyakama asa kandao isoo kalyepape” lea. 35-36 Dopa latala baa kuki umbisale pao, yuunya tombauli sepala, loma soo pituu, “Apane, Apane, embame dupa pitaka pingi. Embame kandatenopa, gii dake namba-kisa naepena lapenge jia kandeno doko, dopa pipi. Embame namba-kisa kenda pipae silyamo dake nyoo nepaka lapuliaka doko, nambame masilyo dokonya-kaita napipi. Embame masilino dokonya-kaita pipi” Jisasame lea.

37 Dopa lao loma sepala, ipao kandeamopa, disaipolo dutupa luu palyasiamisa, baame Pita lamaiyoo, “Saimone, emba luu palelepe? Embame aipuma awa mendai dokonya kandao isoo nakatalepe? 38 Kiningi etete nyakamanya imambumi pyuani kaeyapumupa, yongeme papa tambulyamona, makande pingi dupanya nyakama pao koeyatamina, kandao isoo loma soo kalyepape” lea. 39 Dopa latala baa deaka pupala, wamba loma siamo dutupaka sia. 40 Loma sepala dee ipao kandeamopa, disaipolo dupa lemonguti kaeyapala, paleami. Dee nyakama sakatatala, baa aipa lamaimape lao masala naeyami. 41-42 Baa deaka paa tepo pyoo pilyetala, dokaita lamaiyoo, “Nyakama mee luaka paliu silyamipi? Namba enge nyipumu akali doko ipatelyamo. Akalinya Ikiningi doko koo pingi endakali dupa laitaka pyaapomo gii doko ipatelyamona, mona sakatalapa” lea.

43 Jisasame dopa lao kateamopa, baanya 12 disaipolo dutupanya mende, Judasa lenge doko epea. Epeamo dokonya, endakali kambu mende konja-wuapi, kolyepepi, dupa minao baa apata epeami. Dupa akali pitisa mupapi, Mosesanya loo mana nyepae akalipi, Judamanya isingi akalipi, dupame pena leaminosa, epeami. 44 Jisasa enge nyiamo akali dokome wambao endakali kambu doko lamaiyoo, “Nambame akali mende nunu pitu dokona, nyakamame baa anjetala, kandao isoo laminao pupape” lea. 45 Dopa lamaitala, ipao baa Jisasa kateamo dokonya tolao pupala, “Mana Lenge Akali” latala, baa nunu pia. 46 Dopa piamopa, dokaitame Jisasa minatala anjiami. 47 Anjiamino dokopa, akali mende baapa makisa katea dokome baanya konja-wua doko kolanyetala, pitisa mupa dokonya kalai akali mendenya kale lyanya nepea. 48 Dokopa Jisasame dokaita lamaiyoo, “Nyakamame pake nenge mende anjala epele lao, konja-wuapi, kolyepepi, dupa minao namba anjala epelyamipi? 49 Koteaka lao namba lotuu anda andake dokonya, nyakamanya kaina dokonya katao, nyakama mana langio dokopa, nyakamame namba anjala naeyami. Dopaka doko, pii pepa pyapae singi doko angi panelyamona” lea. 50 Dokopa disaipolo dupa pitakame baa yakinatala, paka pyakao peami. 51 Peamino dupanya, wane kole mende lapalapa iki petae, Jisasa watao peamo doko anjalanya lapalapanya miniami. 52 Minateaminopa, lapalapa doko kakonya yakinatala, baa papata paka pea.

53 Dokopa dupame Jisasa laminao, pitisa mupa dupanya aiyomba doko kateasa peami. Dopa piaminopa, pitisa mupapi, Judamanya isingi akalipi, Mosesanya loo mana nyepae akalipi, dupa ipao kambu piami. 54 Dokopa Pita waa katao maitanya Jisasa watao pea. Pupala pitisa mupa dupanya aiyomba dokonya anda kamapusa kolandatala, yanda singi dupa-pipa ita mende teamo dokonya endo soo petea.

55 Pitisa mupapi, kanjole kambuingi andake dokomepi, Jisasa pyao kumasemana latala, baa-kisa tenge mende setame lao kutiami. Dopa piaminoaka doko, tenge mende kandao nanyiami. 56 Endakali longo mendapuame baa-kisa tenge setao, sambo pii leaminoaka doko, nyakamanya pii leamino dupa mendai nanjia. 57 Endakali mendapuame sakatatala, baa-kisa sambo pii setao, 58 “Akali dakeme lao pituu, 'Nambame lotuu anda andake kingimi petae dake lakyepala, yuu gii tepomanya waka mende pitu doko, endakali kingimi napipenge mende pituna' leamopa, naimame siamana” leami. 59 Dopa leaminoaka doko, nyakamanya pii leamino dupa mendai nanjia. 60 Dokopa pitisa mupa dupanya aiyomba dokome dokaitanya kaina dokonya toeya katapala, Jisasa tipa pyoo, “Pii emba-kisa tenge setao lelyamino dake, aipuma yanu napilipi?” lea. 61 Dopa leamoaka doko, Jisasame ema napia. Dokopa pitisa mupa dupanya aiyomba dokome dee baa tipa pyoo, “Emba Gote Tii Pipae dokonya Ikiningi Kraisa dokope?” lea. 62 Jisasame pii yanu pyao, “Doko namba. Akalinya Ikiningi doko, Gote etete pupu lapae dokonya kingi tolae dokonya pituu, kaitinya kopa tambe-tambe ipatamopa, nyakamame kandatamina” lea. 63-64 Jisasame dopa leamo sulu katao, pitisa mupa dupanya aiyomba dokonya yonge pee doko tange minao lapyepala, “Baame Gote lamba lao pii lelyamo doko sepelyamino. Aipuma endakali mendapuanya pii deaka nyemape? Nyakamame aipa pimana lao masilyamipi?” lea. Dokopa pitakame, “Baa-kisa tenge silyamona, baa pyao kumasepengena” leami. 65 Dopa latala akali mendapuame baa sopokalimi piami. Pyapala baanya lengelyapi yaki petala, kimiame pyao pituu, “Emba kini propeta-tamo doko, emba akali dokome pilyamo lao naima langi!” leami. Dokopa yanda singi kateamino dupame baa pyao takiamiaka.

66 Pita baa anda kamapusa peteamopa, pitisa mupa dupanya aiyomba dokonya, kalai pyakamaiyoo petenge, wanaku dupanya mende epea. 67 Ipupala Pita endo soo peteamo doko kandokondape pyoo kandatala, baa lamaiyoo, “Emba Nasarete tange Jisasapa apata katengembana” lea. 68 Dopa leamopa, Pitame tanga lao, “Embame leeno doko namba nakandenge. Namba masala naelyona” lea. Dopa latala baa pitisa mupa dupanya aiyomba dokonya lome kambusa peamopa, yaka pauli pii mende lea.* yaka pauli pii mende lea. Buku Baibolo Giriki piimi wambao pyatae mendatupanya pii dutupa nakalyamo. 69 Dopa piamopa, kalai wanaku dokome baa deaka kandatala, akali kateamino dupa lamaiyoo, “Baa akali dutupanya mendena” lea. 70 Dopa leamopapi, Pitame deaka tanga lea. Gii kuki pateamopa, akali kateamino dupame Pita deaka lamaiyoo, “Kini, emba Galilea tange dokonyana, emba akali dutupanya mende-lamona” leami. 71 Dokopa Pitame lao pituu, “Nyakamame akali lelyamino doko namba nakandengena, sambo lato doko, Goteme namba pinana” lea. 72 Dopa lateamopa, yaka pauli pii lapo pyoo lea. Dokopa Jisasame pii wamba leamo datupa Pitame masia: “Yaka pii lapo pyoo, ene laanya pitamopa, embame paa tepomasa namba nakandengena laapenona” leamo doko masetala, Pita putukuo ee lea.