1 Yongama wamba pitisa mupapi, Judamanya isingi akalipi, Mosesanya loo mana nyepae akalipi, kanjole kambuingi andake dupa pitaka kambuiyami. Lao kambutala, Jisasa anjoo soo, Pondiasa Pailate maiya peami. 2 Maitiaminopa, Pailateme baa tipa pyoo, “Emba Judamanya Kiŋi dokope?” lea. Dopa leamopa, Jisasame pii yanu pyakamaiyoo, “Embame leleno dokoakana” lea. 3 Dokopa pitisa mupa dupame baa-kisa tenge longo seteami. 4 Dokopa Pailateme baa dee tipa pyoo, “Akali dakaitame emba-kisa tenge longo lao setelyamino doko, embame piipi mende yanu pyao nalelepe?” lea. 5 Dopa leamopa, Jisasame dee pii mende yanu pyao naleamosa, Pailate paka kaeyapala, masepae longo nyia.

6-8 Ee kana dii lao, Napinya Kaeyamo Pasopa gii doko epelyamoli pyoo, Pailateme akali anjetae dupanya mende, endakali dupame mokekena lelyamili pyoo, mokata pyakamaingi. Gii doko paleamopa, endakali kambu dokome ipupala, akali mende mokekena leami. Akali Barabasa lenge dokopi, akali mendapuapimi wamba gapomane yanda pimaitala, endakali mendapu pyao kumasetala, anjetae paleami. 9-10 Dokopa pitisa mupa dupame Jisasa-pipa tilya nyepala, baa anjoo dimini-lamo lao Pailateme kandea. Kandatala dokaita tipa pyoo, “Nambame Judamanya Kiŋi doko mokakapili lao masilyamipi?” lea. 11 Dopa leamoaka doko, pitisa mupa dupame akali Barabasa doko mokekena lamana lao, endakali kambu dupa ingi tuu leami. 12 Dokopa Pailateme dokaita deaka tipa pyoo, “Nyakamame Judamanya Kiŋi lengema dake nambame aipa pyakaowape?” lea. 13 Dopa leamopa, dupame deaka puu lao, “Poko itanya pyao yuku!” leami. 14 Dopa leaminoaka doko, Pailateme dokaita lamaiyoo, “Baame koo aki mende pipyape?” lea. Dopa leamopa, dokaitame eteteaka puu lao, “Baa pyao yuku!” leami. 15 Dokopa Pailateme endakali kambu dupanya auu kaeyamili pyoo, Barabasa doko mokakamaiya. Dopa petala yanda singi dupame Jisasa konjame pyapala, pyao yukuina lao maiya.

16 Dokopa yanda singi dupame Jisasa laminao, gapomane isingi akali andake petenge anda dokonya kolandatala, yanda singi dupa pitaka ipao kambu pina leami. 17 Kambu pyatala, dupame yonge pee ketae pingi kala pepola mende baanya petakamaitala, kende nenge-nenge katapae mende nyoo makipu petala, Jisasanya aiyombanya pyakamaiyami. 18 Dopa petala, dupame baa lamba lao, “Judamanya Kiŋi, emba auu pyoo katape!” leami. 19 Dopa latala, dupame keoo konjame aiyombanya pyapa, sopokalimi pyapa petala, baa lamba lao luma lakao, mambo piami. 20 Dopa pyoo etapala, yonge pee kala pepola wamba pyakamaiyamino doko lyokao nyepala, baanya yonge pee ketae pingi doko tange pyakamaiyami. Dopa petala baa pyao yukulanya laminao peami.

21 Dokopa Alekesandapa, Rupasapanya takange Saimone yuu Sairini tange doko kamalyatena katao, taono dokonya epeamo kandanyetala, yanda singi dupame baa pyalanya latala, Jisasanya poko ita doko sakamaina leami. 22 Sina latala, dupame Jisasa laminao, yuu manda kenge Gologota lenge dokonya pao pyakalyiami. (Manda Gologota dokonya tenge doko, “Matena kuli.”) 23 Yuu manda dokonya pupala, dupame baa tanda kaeyala naena lao, waene matasini-pipa wasepala maiyaminopa, nanenya kaeya. 24-25 Kaeyateamopa, yongama 9 kiloko dokonya Jisasa pyao poko itanya yukuiyami. Yukutala baanya yonge pee wamba lyokeamino dupa setapala, yanda singi dupame apimi yonge pee dupanya mende nyilyape kandamana lao lakii piami. 26 Jisasa-kisa tenge seteamino pii doko, “Judamanya Kiŋi dokona” lao pepa pyatae doko poko ita ketae dokonya katea. 27-28 Jisasa poko itanya pyao yukuiyamino dokopa, akali pake nenge lapoma apata pyao yukuiyami. Mende doko baanya kingi tolae-kaita yukuiyami. Mende doko baanya kingi koeya-kaita yukuiyami.* Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Dopa piamino dokome pii pepa pyapae singi dokonya, 'Mana setapae nepenge endakali dupa-pipa baa pyasoo itaki pyatamina' lapae singi doko angi jia.” 29 Jisasa pyao yukutae kateamo dokonya-kaita endakali paeyamino dupame baa lamba lao, aiyomba wangatoto pyoo, “Lotuu anda andake doko lakyepala, yuu gii tepomanya waka mende pituna leeno akali dokae! 30 Embame emba tange pyoo nyoo, poko ita doko yakinatala, isa ipupoko!” leami. 31 Dopaka pyoo, pitisa mupapi, Mosesanya loo mana nyepae akalipi, dupame lamba lao, nyakamalapo laloo pyoo, “Baame endakali waka dupa pyoo nyipumuaka doko, baa tange kapa pao pyoo nyala naenge-lamo. 32 Kraisa dake, Israelemanya Kiŋi daape, epapu poko ita doko yakinatala, isa epena kaeya. Yakinatamo doko, naimame kandatala, baa lao masoo minamanalena” leami. Akali lapoma baa-pipa apata pyao yukutae kateambino dolapome mendai dopaka pyoo, baa-kisa lamba pii kando piambi.

33 Jisasa yukutae kateamopaka, 12 kilokonya pituu yuu kuiya. Kuiyamo doko kuiyataeyaka katao pao, 3 kilokonya tuu lea. 34 Dokopa, Jisasame etete puu lao, “Ilai, Ilai, lema sabatani?” lea. (Pii dokonya tenge doko, “Nambanya Gote, nambanya Gote, embame namba aipuma yakinelepe?”) 35 Dopa leamo doko endakali dosa kateamino dupanya mendapuame sepala, “Ilaija lao wii lelyamona, salapape” leami. 36 Dopa lateaminopa, akali mendeme alo pyao pao, koma jepae mende itakulinya tuku petala, waene kaa pipae mendenya poeyanyetala, Jisasa nena lao, makapusakamaiya. Dopa petala baame lao pituu, “Ilaijame baa kondao nyala epelyape lao kandamanana, malisalapa” lea. 37 Dokopa, Jisasame eteteaka puu lao ae mende latala, baa kumia. 38 Dokopa lotuu anda andake dokonya lapalapa andake mendeme nee nyetae katenge panda dokonya kame pinyetae katenge doko ketae pituu titi pyao isa tuu latala, lapo pyoloo pia. 39 Yanda singi isingi akali Jisasanya enomba-kaita kateamo dokome, Jisasa dopa pyoo kumiamo doko kandatala, “Kiningi etete, akali dake Gote Ikiningi-lamona!” lea.

40 Maria Magadala tange dokopi, wane kole Jemesa, Josesapanya endangi Mariapi, Salomiapi, dutupame kuki tependale pituu, kandatae peteami. 41 Wamba Jisasa Galilea yuu dokonya kateamo dokopa, enda dutupame baa watao paeyao nisiami. Dee enda longo mendapu Jisasa-pipa apata Jerusalema lalyoo epeamino dupa dosa kateamiaka.

42-43 Yuu kuiyalanya piamopa, Josepe Arimatia tange, kanjole dokonya akali kenge epe singi mende epea. Baa Gotenya isingi mate doko malisoo, katengeaka. Sambata depa lapenge gii paleamopa, Josepe paka nakaeyao, Pailate peteamo dokonya pupala, Jisasanya yonge doko dina lao tee lea. 44 Dopa leamopa, Pailateme Jisasa kumatalame-lumu lao walu lea. Walu latala baame yanda singi isingi doko epena latala, Jisasa kumatalape lao tipa pia. 45 Yanda singi isingi dokome Jisasa kini kumatalamona lao lamaitiamopa, Pailateme Jisasanya yonge doko Josepeme kondao nyala pena lea. 46 Dokopa Josepeme lapalapa epe kyeto mende sambapala pao, Jisasanya yonge doko kondao isa nyepala, lapalapa dokome yaki-yaki pia. Dopa petala akali mendenya kananda malu tumbinya setea mendenya yonge doko nyoo setapala, kana andake mende kapilya mina-mina pyoo minao pao, malu kambu doko piti pia. 47 Dopa piamopa, Maria Magadala tange dokopa, Josesa endangi Maria dokopame, Josepeme Jisasanya yonge doko nyoo seteamo panda doko kandao peteambi.