ମାର୍କ ଲିଖିତ ସୁସମାଚାର
ମାର୍କ ଗୁଆର୍କ୍ନେ ନିମାଣ୍ତା ସାମୁଆଁ
ମାର୍କ ବଇ ବିସୟ୍ରେ ଉଃଡ଼ିକ୍ଲିଗ୍ ସାମୁଆଁ
ଜିସୁ କ୍ରିସ୍ଟନେ ଜିବନ୍କେ ବର୍ଣ୍ଣନା ଡିଙ୍ଗ୍ନେସା ତ୍ମି ନିୟମ୍ ଅରିଆ ଅଁ କ୍ଲିଗ୍ ପୁସ୍ତକ୍ ବାନ୍ ମାର୍କ ଗୁଆର୍କ୍ନେ ନିମାଣ୍ଡା ସାମୁଆଁ ଡିଙ୍ଗ୍ ଡିଙ୍ଗ୍କେ ମୁଇଙ୍ଗ୍ । ମେଁ ସାପାରେକେ ନିମାଣ୍ଡା ସାମୁଆଁ ବାଲିର୍ ମ୍ୟାକେ ଜାନେ ଅର୍ତ “ନିମାଣ୍ଡା କବର୍ ।” ଆତେନ୍ଇଂ ଜିସୁନେ ଗୁଏକ୍ନେ ବାନ୍ ମାତିଉ, ମାର୍କ, ଲୁକ୍ ଆରି ଜହନ୍ନେ ବାନ୍ ଗ୍ନୁଆର୍ ଡିଂଲେଃକେ । ଅଁ କ୍ଲିଗ୍ ନିମାଣ୍ଡା ସାମୁଆଁବାନ୍ ମାର୍କ ଗୁଆର୍କ୍ନେ ନିମାଣ୍ଡା ସାମୁଆଁ ଡିଙ୍ଗ୍ ଡିଙ୍ଗ୍କେ ସାପାବାନ୍ ଡାଆଁ । ଆକେନ୍ ଡିଗ୍ ବିସ୍ବାସ୍ ଡିଙ୍ଗ୍ଆର୍ଏ ଜେ ଆକେନ୍ ନିମାଣ୍ଡା ସାମୁଆଁଇଂବାନ୍ ସାପାବାନ୍ ପଏଲ୍ କିସ୍ଟାବ୍ଦ ଞ୍ଜିକୁଡ଼ି ମାଲ୍ ଗୁଆ ବିତ୍ରେ ଗୁଆର୍ ବକେ । ଜବର୍ ଗିଆନ୍ଣ୍ଡ୍ରେ ବିସ୍ବାସ୍ ଡିଙ୍ଗ୍ଆର୍ଏ ଜେ ରୋମ୍ ଅରିଆ ଲେଃକ୍ନେ କିସ୍ଟିୟାନ୍ଇଂକେ ସାର୍ଦା ଆଡିଙ୍ଗ୍ସା ରୋମ୍ଅରିଆ ଆକେନ୍ ଗୁଆର୍ ବଆର୍କେ । ମାର୍କ ଜାଣ୍ଡେ କି ଜହନ୍ ମାର୍କ ମ୍ନିରେ ମ୍ୟାଲେଃଆର୍କେ ମେଁ ପାଉଲ୍ ଆରି ବର୍ଣ୍ଣବାନେ ସାଙ୍ଗଡ଼େ ଲେଃଗେ ମାତର୍ ଉଡ଼ିବେଲା ମେଁ ଆମେଇଂକେ ମିସ୍ନାରି କାମ୍କେ ଆନ୍ତାର୍ଚେ ପାଙ୍ଗ୍କେ ଆତେନ୍ବେଲା ମେଁନେ ଜିବନ୍ ନ୍ନିଆ ଦୁକ୍ କସ୍ଟ ପିଙ୍ଗ୍ଚାକେ ପ୍ରେରିତ୍ ୧୩:୧୩ । ଇଡ଼ିଂଡେ ବେଲା ମାର୍କ ଆରି ମୁଇଙ୍ଗ୍ ତର୍ ବର୍ଣ୍ଣବାନେ ଏତେ କାମ୍ ଡିଙ୍ଗ୍ଆର୍କେ ପ୍ରେରିତ୍ ୧୫:୩୭-୩୯ । ମାର୍କ ଡିଗ୍ ପିତର୍ନେ ମୁଇଙ୍ଗ୍ ଅସେନେ ମିତ୍ମାସଦ୍ ସୁଗୁଆ ସ୍ନାମୁଆଁ ଲେଃଗେ ୧ ପିତର୍ ୫:୧୩ । ଜଦି ଡିଙ୍ଗ୍ଏ ମାର୍କ ମୁଇଙ୍ଗ୍ ଜିସୁନେ ଜିବନ୍ନେ ସାପା ସାକି ଆଲେଃଲା ଡିଲାଡିଗ୍ ଜ୍ଞାନ୍ଇଙ୍ଗ୍ ବିସ୍ବାସ୍ ଡିଙ୍ଗ୍ମ୍ୟାକେ ଜେ ମେଁ ପିତର୍ନେ ସାକି ଆଡ଼ାତ୍ରା ଆସାଚେ ନିଜେନେ ନିମାଣ୍ଡାସାମୁଆଁ ଗୁଆର୍ ବକେ । ନିମାଣ୍ଡା ସାମୁଆଁ ଅରିଆ ମାର୍କ ସିସ୍ଇଂ ଆରି ଜିବନ୍ ଡାନେ ବେଲା ବିସୟ୍ରେ ଜିସୁକେ ସିକ୍ୟା ଆଡ଼ାତ୍ରା ଇକ୍ଚା ଡିଙ୍ଗ୍ଚେ ବେକେ । ମାର୍କ ଆକେନ୍ ପୁସ୍ତକ୍ ଅରିଆ ଜିସୁ କ୍ରିସ୍ଟକେ ମୁଇଙ୍ଗ୍ ଦରମ୍ ଦାସ୍ ଆରି ପରମେସର୍ନେ ଇକ୍ଚାକେ ପୁରନ୍ ଆଡିଙ୍ଗ୍ ନ୍ସା ସାପାବେଲେ ତିଆର୍ ଡିଙ୍ଗ୍ଲେଃନେ ପ୍ରିଅ ଉଙ୍ଗ୍ଡେ ସୁଗା ସାମାଦାନ୍ ଆଡିଙ୍ଗ୍ବକେ ଆତେନ୍ସା ମେଁ ସାମୁଆଁରେ ଜିସୁନେ ଇରିଆତୁଗ୍ ସ୍ଲେ ସାମୁଆଁରେ ଗୁଆର୍ ମ୍ୟାକେ । ସାରାସାରି ମେଁ ସାପା ମଞ୍ଚ୍ପୁର୍ ଅରିଆ ନିମାଣ୍ଡା ସାମୁଆଁ ଡିଙ୍ଗ୍ନେ ମ୍ନା ଆଦେସ୍ ଏତେ ଆକେନ୍ ନିମାଣ୍ଡା ସାମୁଆଁ ଗୁଆର୍କ୍ନେ ବନ୍ଦ୍ ଆଡିଙ୍ଗ୍କେ ।
ସାସ୍ତର୍ ବିତ୍ରେ ଲେଃକ୍ନେ ସାମୁଆଁଇଂ
୧. ଦିକ୍ୟାଣ୍ଡ୍ରେ ଜହନ୍ ଆରି ଜିସୁନେ ଡୁବନ୍ । ୧:୧-୧୩
୨. ଗାଲିଲୀନ୍ନିଆ ଜିସୁନେ ସେବା କାମ୍ । ୧:୧୪; ୯:୫୦
୩. ଯିରୁସାଲାମ୍ ଅରିଆ ଜିସୁନେ ୱେନେ ଆରି ମନ୍ଦିର୍ ନ୍ନିଆ ଗିଃଗାଃନେ । ୧୦:୧-୫୨
୪. ଜିସୁନେ ସାମୁଆଁ । ୧୩:୧-୩୭
୫. ଜିସୁ ଗୁଏଃନେ ତଃଡ଼ିଆନେ ଆରି ମ୍ନା ଆଦେସ୍ । ୧୪:୧-୧୦; ୧୬:୯-୨୦
୧
ଦିକ୍ୟାଣ୍ତ୍ରେ ଜହନ୍ନେ ପର୍ଚାର୍ ।
(ମାତିଉ ୩:୧-୧୨; ଲୁକ୍ ୩:୧-୧୮; ଜହନ୍ ୧:୧୯-୨୮)
୧ ଆକେନ୍ ଇସ୍ପର୍ନେ ଉଙ୍ଗ୍ଡେ ଜିସୁ କିସ୍ଟନେ ନିମାଣ୍ଡା ସାମୁଆଁ ଆରାମ୍ ଡିଂକେ । ୨ ବାବବାଦି ଯିଶାଇୟନେ ସାସ୍ତର୍ନ୍ନିଆ ଗୁଆର୍ ବକେ ।
ଇସ୍ପର୍ ବାସଙ୍ଗ୍କେ,
“ପେ ଆତ୍ଲା ଗାଲି ତିଆର୍ ଡିଙ୍ଗ୍ନ୍ସା ନେଙ୍ଗ୍ନେ ଦୁତ୍କେ ସେନୁଗ୍ ମ୍ୱେଏ ।
୩ ବାଲିଲନ୍ନିଆ ମୁଇଂଜା କିରଚେ ବାସଙ୍ଗ୍ଡିଂକେ;
ମାପ୍ରୁ ନ୍ସା ଗାଲି ତିଆର୍ ଡିଙ୍ଗ୍ପା;
ମେଁ ପାଙ୍ଗ୍ନେ ଗାଲି ସିଦା ଆଡିଙ୍ଗ୍ପା ।”
୪ ଆତେନ୍ ଅନୁସାରେ ଡୁବନ୍ ବିଃଣ୍ଡ୍ରେ ଜହନ୍ ଲଣ୍ଡିଆଃପାକା ପାଙ୍ଗ୍ଚେ ପର୍ଚାର୍ ଡିଂକେ ବାରି ଡୁବନ୍ ବିଃନେ ମୁଲେକେ । ମେଁ ରେମୁଆଁଇଂକେ ବାସଙ୍ଗ୍ଡିଂଗେ, “ନିଜର୍ ନିଜର୍ ପାପ୍ବାନ୍ ଆଣ୍ଡେପା ବାରି ଡୁବନ୍ ଡୁଂଡଲାପା । ତେଲା ଇସ୍ପର୍ ପେନେ ପାପ୍ କେମା ଡିଂଏ ।” ୫ ଜିଉଦା ପ୍ରଦେସ୍ ଆରି ଯିରୂଶାଲମ୍ ସହର୍ବାନ୍ ଜାବର୍ ରେମୁଆଁ ଜହନ୍ ବାସଙ୍ଗ୍କ୍ନେ ସାମୁଆଁ ଅଁନ୍ସା ପାଙ୍ଗ୍ଆର୍କେ । ମେଇଂ ନିଜର୍ ନିଜର୍ ପାପ୍ ସିକାର୍ ଡିଙ୍ଗ୍ଚେ ବାରି ଜହନ୍ ଆମେଇଂକେ ଜର୍ଦନ୍ କେଣ୍ଡିଆନ୍ନିଆ ଡୁବନ୍ ଡୁଂଡ ଆର୍କେ ।
୬ ଜହନ୍ ଉଟ୍ ଉକ୍ସାନେ ସକା ସଃଡିଂଗେ ଆରି ନ୍ସାନ୍ନିଆ ଉକ୍ସାନେ ଗ୍ନେଗ୍ସାଃ ଗାଗ୍ ଡିଙ୍ଗେ । କ୍ୟାରବ ସ୍ଲାଃନେ ଚୁଚୁ ଆରି କଣ୍ତା ଞ୍ଜୁଙ୍ଗ୍ ମେଁନେ କାଦି ଲେଃଗେ । ୭ ଜହନ୍ ୱାସାର୍ଚେ ବାସଙ୍ଗ୍କେ, “ନେଙ୍ଗ୍ବାନ୍ ଜାଣ୍ଡେ ଜାବର୍ ବପୁ ରେମୁଆଁ ପାଙ୍ଗ୍ଡିଂକେ, ନେଙ୍ଗ୍ ମେଁନେ ଜୁତା ତୁତଃନେ ଆନେଙ୍ଗ୍ ଯଗ୍ୟ ଣ୍ଡୁ ।” ୮ ନେଙ୍ଗ୍ ଆପେକେ ଣ୍ଡିଆନ୍ନିଆ ଦିକ୍ୟା ବିଃଡିଂକେ ମାତର୍ ମେଁ ଆପେକେ ପବିତ୍ର ଆତ୍ମା ବାନ୍ ଦିକ୍ୟା ବିଏ ।
ଜିସୁନେ ଦିକ୍ୟା ଆରି ପରିକ୍ୟା ।
(ମାତିଉ ୩:୧୩; ୪:୧୧; ଲୁକ୍ ୩:୨୧-୨୨; ୪:୧-୧୩)
୯ ଆତେନ୍ ବେଲା ଜିସୁ ଗାଲିଲୀନେ ନାଜରିତବାନ୍ ପାଙ୍ଗ୍ଚେ ଜର୍ଦନ୍ ଲଣ୍ଡିଆଃନ୍ନିଆ ଜହନ୍ବାନ୍ ଡୁବନ୍ ଡିଙ୍ଗ୍କେ । ୧୦ ଜିସୁ ଲଣ୍ତିଆଃବାନ୍ ତାର୍କ୍ନେ ବେଲା କିତଙ୍ଗ୍ଇନି ମେଲା ଡିଂକେ । ମେଁ କେକେ ଜେ ପବିତ୍ର ଆତ୍ମା ମେଁନେ ଆଡ଼ାତ୍ରା କୁକୁର୍ୟାଃ ରକମ୍ ଜାର୍କ୍ନେ କେକେ । ୧୧ ✡ ୧:୧୧ ମାତିଉ ୩:୧୭; ୧୨:୧୮; ମାର୍କ ୯:୭; ଲୁକ୍ ୩:୨୨.କିତଙ୍ଗ୍ ଇନି ବାନ୍ ଆକେନ୍ ସାମୁଆଁ ନାଙ୍ଗ୍କେ “ନା ନେଙ୍ଗ୍ନେ ନିଜର୍ ଗଡ଼େଅ ନା ଅରିଆ ନେଙ୍ଗ୍ନେ ଜବର୍ ସାର୍ଦା ।”
୧୨ ଆତ୍ବାନ୍ ପବିତ୍ର ଆତ୍ମା ଜିସୁକେ କଣ୍ଡାନ୍ନିଆ ଡୁଂୱେକେ । ୧୩ ଜିସୁ ଆତ୍ଅରିଆ ମ୍ବାର୍କୁଡ଼ି ସ୍ମି ଜାକ କଣ୍ଡାନେ ପସୁ ଏଃତେ ଲେଃଗେ । ଆତ୍ଅରିଆ ମେଁ ସଏତାନ୍ବାନ୍ ପରିକିତ ଡିଙ୍ଗ୍କେ । ଇଡ଼ିଙ୍ଗ୍ କିତଂଇନିନେ ଦୁତ୍ଇଂ ପାଙ୍ଗ୍ଚେ ଜିସୁନେ ଜତନ୍ ଡିଙ୍ଗ୍ଆର୍କେ ।
ଜିସୁ ଅଁଣ୍ଡ୍ରୁଆ ଆଃଡ଼ ସାଃଣ୍ଡ୍ରେକେ ୱାକେ ।
(ମାତିଉ ୪:୧୨-୨୨; ଲୁକ୍ ୪:୧୪-୧୫; ୫:୧-୧୧)
୧୪ ଏନ୍ ଇଡ଼ିଂ ଜହନ୍କେ କଏଦ୍ ଡୁଆ ଆଃଗାକ୍ନେ ଇଡ଼ିଂ । ଜିସୁ ଗାଲିଲୀ ଏରିୟାବାନ୍ ପାଙ୍ଗ୍ଚେ ଆରି ମେଁ ଇସ୍ପର୍ନେ ନିମାଣ୍ତା ସାମୁଆଁ ବାସଙ୍ଗ୍ନେ ଲାଗେକେ । ୧୫ ✡ ୧:୧୫ ମାତିଉ ୩:୨.ଜିସୁ ବାସଙ୍ଗ୍ନେ ମୁଲେକେ “ବେଲା ଡା ଡିଙ୍ଗ୍କେ, ଇସ୍ପର୍ନେ ରାଜି ଡାଗ୍ରା ପିଙ୍ଗ୍ଚାଡିଂକେ ପାପ୍ବାନ୍ ମନ୍କେ ଆବଦ୍ଲେ ବିଃପା ନିମାଣ୍ଡା ସାମୁଆଁକେ ବିସ୍ବାସ୍ ଡିଙ୍ଗ୍ପା ।”
୧୬ ଜିସୁ ଗାଲିଲୀନେ କେଣ୍ଡିଆଃ ଆଃଡ଼ାଃ ବିଃଚେ ୱେକ୍ନେ ବେଲା ଶିମୋନ ଆରି ମେଁନେ ବୟାଁଣ୍ଡେ ଆନ୍ଦ୍ରିୟକେ କେଣ୍ଡିଆଃ ଡାଗ୍ରା ଜାଲ୍ ତାଲାଗ୍ଡିଂକ୍ନେ କେକେ । ଡାଗ୍ଲା ମେଇଂ ଆଃଡ଼ ସାଃଣ୍ଡ୍ରେ ଲେଃଆର୍ଗେ । ୧୭ ଜିସୁ ଆମେଇଂକେ ବାସଙ୍ଗ୍କେ, “ପେ ସାପାରେ ନେଙ୍ଗ୍ ଏତେ ପାଙ୍ଗ୍ଲାପା, ନେଙ୍ଗ୍ ଆପେକେ ମାପ୍ରୁନେ ଗାଲିପାକା ରେମୁଆଁଇଂକେ ଡୁଂପାଙ୍ଗ୍ନେ ଣ୍ଡ୍ରାସିକେଏ ।” ୧୮ ତେଲା ଶିମୋନ୍ ଆରି ଆନ୍ଦ୍ରିୟ ମେଇଂନେ ଜାଲ୍ ଆନ୍ତାର୍ଚେ ଜିସୁନେ ପ୍ଲା ୱେଆର୍କେ ।
୧୯ ଆରି ମେଁ ଉଡ଼ି ସ୍ଲ ରକମ୍ ୱେଚେ ଜେବଦୀନେ ଉଙ୍ଗ୍ଡେ ଜାକୁବ୍ ଆରି ମେଁନେ ବୟାଁ ଜହନ୍କେ ତରା ଅରିଆନେ ଜାଲ୍ ପାଗ୍ଲୁଗ୍ ଡିଙ୍ଗ୍କ୍ନେ କେକେ । ୨୦ ଜିଆ ଜିଆ ମେଁ ଆମେଇଂକେ ୱାକେ । ମେଇଙ୍ଗ୍ନେ ଆବାଡ଼େ ଜେବଦୀକେ କୁଲିରେ ଏଃତେ ତରାନ୍ନିଆ ଆନ୍ତାର୍ଚେ ଜିସୁନେ ପ୍ଲା ୱେଆର୍କେ ।
ଜିସୁ ଗଲିଆ ସାକ୍ନେ ରେମୁଆଁକେ ନିମାଣ୍ଡା ଆଃଡିଙ୍ଗ୍କେ
(ଲୁକ୍ ୪:୩୧-୩୭)
୨୧ ଇଡ଼ିଙ୍ଗ୍ ଜିସୁ ଆରି ସିସ୍ଇଂ କପର୍ନାହୂମ ଅରିଆ ୱେଆର୍କେ । ଜିଉଦିଇଙ୍ଗ୍ନେ ପୁଣ୍ତେନେ ଦିନା ଜିସୁ ଜିଉଦିଇଙ୍ଗ୍ନେ ପାର୍ତନା ଡୁଆ ୱେଆର୍କେ ଆତ୍ ଅରିଆ ରେମୁଆଁଇଂକେ ସିକ୍ୟା ବିଃନେ ମୁଲେକେ । ୨୨ ଜିସୁନେ ଗିଆନ୍ ଅଁଚେ ଆତେନ୍ ରେମୁଆଁଇଂ ବକୁଆ ଡିଙ୍ଗ୍ ଆର୍କେ । ଜିସୁ ଆମେଇଂକେ ଦର୍ମ ଗୁରୁଇଂ ରକମ୍ ଗିଆନ୍ ମାବିଚେ ମୁଇଂ ନେତା ବାଲେଃକ୍ନେ ରେମୁଆଁ ରକମ୍ ଗିଆନ୍ ବିଃ କି ।
୨୩ ଜିସୁ ଜିଉଦିଇଙ୍ଗ୍ନେ ପାର୍ତନା ଡୁଆ ନ୍ନିଆ ଲେଃକ୍ନେ ବେଲା ଆତ୍ ଅରିଆ ଦେତ୍ରକମ୍ ମୁଇଙ୍ଗ୍ ରେମୁଆଁ ଲେଃଗେ । ଜାଣ୍ଡେନେ ଗାଗ୍ଡ଼େ ଗଲିଆ ଗାଲେଃକେ । ଆତେନ୍ ରେମୁଆଁ କିରଚେ ବାଲିର୍କେ । ୨୪ ଏ ନାଜରିତୀୟ ଜିସୁ “ନାଁ ଏଃତେ ନେଙ୍ଗ୍ନେ ମେଃ କାମ୍ ଲେଃକେ ? ପେ ମେଁନେ ଆନେକେ ଦଂସ ଆଡିଙ୍ଗ୍ ନ୍ସା ପାଙ୍ଗ୍ ପେଲେକେ ? ନାଁ ଜାଣ୍ଡେ ନେଙ୍ଗ୍ ଆତେନ୍ ମ୍ୟା ନ୍ଲେକେ । ନାଁ ଇସ୍ପର୍ନେ ପବିତ୍ର ରେମୁଆଁ !”
୨୫ ଜିସୁ ଆମେକେ ଦମ୍କେଚେ ବାସଙ୍ଗ୍କେ, “ବୁଙ୍ଗ୍ ଲାଃଲା ଆକେନ୍ ରେମୁଆଁ ବିତ୍ରେବାନ୍ ତାର୍ ୱେଲା ।”
୨୬ ଗଲିଆ ରେମୁଆଁକେ ଲାଃଜୁର୍ ବିକେ । ଇଡ଼ିଙ୍ଗ୍ ମେଁ ମାଲେ କିରଚେ ଆତେନ୍ ରେମୁଆଁ ବିତ୍ରେ ବାନ୍ ତାର୍ଡକେ । ୨୭ ଆକେନ୍ କେଚେ ରେମୁଆଁଇଙ୍ଗ୍ ବକୁଆ ଡିଙ୍ଗ୍ ୱେ ଆର୍ଗେ । ମେଇଙ୍ଗ୍ କୁଡ଼େଚେ ବାଲିର୍ବାତାନେ ଲାଗେକେ, “ଏନ୍ ମେଁନେ ? ଆକେନ୍ ରେମୁଆଁ ଆନେକେ ତ୍ମିନେ ଗିଆନ୍ ବିଃ ଡିଙ୍ଗ୍କେ ? ମେଁ ଗଲିଆଇଂକେ ଡିଗ୍ ଆଦେସ୍ ବିଡିଙ୍ଗ୍କେ ଆରି ଗଲିଆଇଂ ମେଁନେ ସାମୁଆଁ ମାନେଃ ଡିଙ୍ଗ୍କେ !”
୨୮ ତେଲା ଜିସୁନେ ସାମୁଆଁ ଗାଲିଲୀ ଏରିଆ ସାପାପାକା ଟାପ୍ନା କବର୍ ୱେଚାକେ ।
ଜିସୁ ଗୁଲୁଏ ରେମୁଆଁକେ ନିମାଣ୍ଡା ଆଃଡିଙ୍ଗ୍କେ ।
(ମାତିଉ ୮:୧୪-୧୭; ଲୁକ୍ ୪:୩୮-୪୧)
୨୯ ଜିସୁ ଆରି ସିସ୍ଇଙ୍ଗ୍ ପାର୍ତନା ଡୁଆବାନ୍ ତାର୍ଚେ ଜାକୁବ୍ ଆରି ଜହନ୍ ଏଃତେ ଶିମୋନ୍ ଆରି ଆନ୍ଦ୍ରିୟନେ ଡୁଆ ୱେଆର୍କେ । ୩୦ ଶିମୋନ୍ନେ ଆତାଡ଼େ ଆଃସାବାଚେ ସିଙ୍ଗ୍ଲାନ୍ନିଆ ଡୁଲେଗ୍ଲେଃଗେ । ତେଲା ଆତ୍ ଅରିଆ ଲେଃକ୍ନେ ରେମୁଆଁଇଂ ଜିସୁକେ ମେଁନେ ସାମୁଆଁରେ ବାସଙ୍ଗ୍ ଡିଙ୍ଗ୍ଗେ । ୩୧ ଜିସୁ ମେଁନେ ସିଙ୍ଗ୍ଲା ଅରିଆ ୱେକେ । ଆକେନ୍ ଦାପ୍ରେ ଜିସୁ ମେଁନେ ନ୍ତି ସାଚେ ଆତଡ୍ୟାକେ । ଆମେକେ ସାଃବା ଆନ୍ତାର୍କେ ଆରି ମେଁ ନିମାଣ୍ତା ଡିଙ୍ଗ୍ୱେଗେ । ଇଡ଼ିଙ୍ଗ୍ ମେଁ ଆମେଇଂକେ ସେବା ଡିଙ୍ଗ୍ଆର୍କେ ।
୩୨ ସ୍ନି ଲଗ୍ନେ ଇଡ଼ିଙ୍ଗ୍ ରେମୁଆଁଇଙ୍ଗ୍ ଜବର୍ ଆଃସିଲେକ୍ନେ ରେମୁଆଁକେ ଆରି ଗଲିଆ ସାଃଲେକ୍ନେ ରେମୁଆଁଇଙ୍ଗ୍କେ ଜିସୁନେ ଡାଗ୍ରା ଡୁଂପାଙ୍ଗ୍ଆର୍କେ ।
୩୩ ଇନିନେ ସାପା ରେମୁଆଁ ଆତେନ୍ ଡୁଆନେ ବାଜାର୍ ଡାଗ୍ରା ରିସିଙ୍ଗ୍ ଆର୍କେ । ୩୪ ବିନ୍ବିନ୍ ରକମ୍ ରଗ୍ ସାଃଲେକ୍ନେ ଗୁଲେ ରେମୁଆଁକେ ଜିସୁ ନିମାଣ୍ତା ଆଡିଙ୍ଗ୍କେ । ମେଁ ଗୁଲେ ଗଲିଆଇଂକେ ଆଃନ୍ତାର୍କେ ଆରି ମେଁ ଗଲିଆଇଂକେ ବାଲିର୍ ନ୍ସା ଆବିଃକେ ଣ୍ଡୁ ମାତର୍ ମେଇଂ ଆମେକେ ସାମୁଆଃ ଲେଃଗେ ।
ଗାଲିଲୀନ୍ନିଆ ଜିସୁନେ ପର୍ଚାର୍
(ଲୁକ୍ ୪:୪୨-୪୪)
୩୫ ଆରି ମୁଇଙ୍ଗ୍ ଦିନା ତାଂକିଗ୍ ଲେଃକେଲା ଜିସୁ ତଡ଼ିଆଚେ ରେମୁଆ ଗଣ୍ଡ୍ ଣ୍ଡୁନେ ଜାଗାନ୍ନିଆ ୱେକେ । ଆତ୍ ଅରିଆ ମେଁ ପାର୍ତନା ଡିଙ୍ଗ୍ନେ ଲାଗେକେ । ୩୬ ଇଡ଼ିଙ୍ଗ୍ ଶିମନ ଆରି ମେଇଙ୍ଗ୍ ସାଙ୍ଗଡ଼େଇଙ୍ଗ୍ ଜିସୁକେ ତୁତୁର୍ନେ ୱେଆର୍କେ । ୩୭ ମେଇଙ୍ଗ୍ ଜିସୁକେ ଅବାଚେ ଆରି ଆମେକେ ବାସଙ୍ଗ୍ଆର୍କେ, “ସାପାରେ ଆନାକେ ତୁତୁର୍ ଡିଙ୍ଗ୍ ଆର୍କେ ।”
୩୮ ଡାଗ୍ଲା ମେଁ ଆମେଇଂକେ ବାସଙ୍ଗ୍କେ, “ଏଲାପା ନେଙ୍ଗ୍ ବିନ୍ ଜାଗାନ୍ନିଆ ଲେଃକ୍ନେ ଇନି ଆନେଃକେ ୱେନେ ପଡ଼େଏ । ଆତ୍ଅରିଆ ଡିଗ୍ ନେଙ୍ଗ୍ ମ୍ବାସଙ୍ଗ୍ଏ, ନେଙ୍ଗ୍ ଆତେନ୍ ଉଦେସ୍ରେ ତାର୍ନ୍ଲେଃକେ ।”
୩୯ ଆରି ମେଁ ଗାଲିଲୀନେ ସାପା ଏରିଆ ଅଲେଙ୍ଗ୍ଚେ ମେଇଂନେ ସାପା ପାର୍ତନା ଡୁଆନ୍ନିଆ ବାସଙ୍ଗ୍ଆର୍କେ ଆରି ଗଲିଆଇଂକେ ଆଃଆନ୍ତାର୍ଆର୍କେ ।
ମୁଇଂ କୁସ୍ଟ ରଗି ନିମାଣ୍ଡା ଡିଂକେ
(ମାତିଉ ୮:୧-୪; ଲୁକ୍ ୫:୧୨-୧୬)
୪୦ ମୁଇଂ କୁଷ୍ଟରଗି ଜିସୁ ଡାଗ୍ରା ପାଙ୍ଗ୍ଚେ ନ୍ତିକେ ଜଡ଼େଚେ ଆମେକେ ବିକ୍ୟା ଡିଙ୍ଗ୍ଚେ ବାସଙ୍ଗ୍କେ, “ନା ଜଦି ଇକ୍ଚା ନାଡିଙ୍ଗ୍ଏ” ତେଲା ଆନେଙ୍ଗ୍କେ ନିମାଣ୍ଡା* ୧:୪୦ କୁଷ୍ଟ ରଗ୍ ନ୍ସା ମୁଇଙ୍ଗ୍ ଜିଉଦି ରେମୁଆଁ ଇସ୍ପର୍ନେ ପାର୍ତନା ଡିଙ୍ଗ୍ ଆୟାକେ ଡାଗ୍ଲା କୁସ୍ଟ ରଗ୍କେ ଜିଉଦିଇଂ ଆବୁଲେ ଡାଗ୍ଚେ ମନେ ବାବେଡିଙ୍ଗ୍ ଆର୍କେ ନାରାଡିଙ୍ଗ୍ଏ ।
୪୧ ଆତେନ୍ ରେମୁଆଁ ଆଡ଼ାତ୍ରା ଜିସୁ ଲିବିସଃ ଡିଂଚେ ମେଁ ନ୍ତି ଲିଗ୍ଚେ ବାସଙ୍ଗ୍କେ, “ନେଙ୍ଗ୍ ଇକ୍ଚା ଡିଙ୍ଗ୍ଣ୍ଡିଂକେ ନାଁ ନିମାଣ୍ଡା ଡିଙ୍ଗ୍ୱେଲା !” ୪୨ ଏହେନ୍ ଦାପ୍ରେ ମେଁନେ କୁଷ୍ଟରଗ୍ ବ’ୱେଗେ ଆରି ମେଁ ନିମାଣ୍ଡା ଡିଙ୍ଗ୍ ୱେଗେ । ୪୩ ଜିସୁ ରେମୁଆଁଇଂକେ ଡାଟାମ୍ ବାବ୍ରେ ଆଦେସ୍ ବିଚେ ଟାପ୍ନା ବେ ବିଃକେ । ୪୪ ତରକ୍ ଲାଲା, “ଆଜାଡିଗ୍ ମେଁନେ ଆବାସଙ୍ଗ୍ଗେ ଡାଗ୍ଲା ୱେଲା ପୁଜାରି ଡାଗ୍ରା ୱେଚେ ନିଜର୍ ଗାଗ୍ଡ଼େ ଆଃସୁଏ ଆରି ମୋଶା ମେଃମେଃନେ ଆଦେସ୍ ବିଃବକେ, ଆତେନ୍ ସାପା ନାନେ ଇକ୍ଚାରେ ମେଇଂନେ ଡାଗ୍ରା ସାକି ବିନେସା ବେଦିନ୍ନିଆ ଦାନ୍ ବିଃ ।”
୪୫ ରେମୁଆଁ ଆତେନ୍ ଜାଗା ଆନ୍ତାର୍ଚେ ତାର୍ ୱେଗେ ଆରି ଆଜାକେ କେକେ ଆମେକେ ବାସଙ୍ଗ୍କେ, “ଜିସୁ ଆନେଙ୍ଗ୍କେ ନିମାଣ୍ଡା ଆଡିଙ୍ଗ୍ ବିଃବକେ । ତେଲା ଜିସୁନେ ସାମୁଆଁ ସାପା ପାକା ବେପ୍ରେ ୱେଗେ । ମାତର୍ ରେମୁଆଁ ମାରିଆଃ କେଚେ ଲାଗ୍ଡଆର୍ଏ, ମାତର୍ ଜିସୁ ଆଣ୍ଡିନେ ଏରିଆ ୱେ ଆୟାକେ ଣ୍ଡୁ । ତେନ୍ସା ମେଁ ରେମୁଆଁଗଣ୍ଡ୍ ଣ୍ଡୁନେ ଟାନ୍ଇଂନ୍ନିଆ ଲେଃଗେ । ମାତର୍ ସାପା ରେମୁଆଁଇଙ୍ଗ୍ ଜିସୁ ଡାଗ୍ରା ପାଙ୍ଗ୍ନେ ଲାଗେକେ ।