Ruti
1
Mago nagapi zamaga'zane, fri'zane fore hu'nea naneke
1 Korapa'ma ke fagagohu vahemo'za (jasi) mopa kva hu'naza knafi, tusi'a zamagate'za Juda mopare fore higeno, mago nera Betrehem, Juda mopareti ne'mo, osi'agna Moapu umaniku nenarone, tare ne'ane zamareno vu'ne. 2 Ana ne'mofo agi'a, Elimeleki'e, nenaro agi'a Naomi'e, hagi tare ne'amokizni znagi'a, Maloni'ene, Kilionike. Efrati naga nofipinti Betrehem, Juda mopafinti Moab mopare e'za emani'naze. 3 Ana mopare mani'nageno, Naomi neve, Elimeleki'a frigeno, Naomi'a tare ne'mofavre'ane zamagraku mani'naze. 4 Higeno tare ne'amoke Moapu mopareti mofatre ara erina'e. Magomofo agi'a, Opa'e, hanki magomofo agi'a Ruti'e. Ana nehu'za teni'a zgegfu naza anantega mani'naze. 5 Anante mani'nageno Naomina, tare mofavre'a Maloni'ene, Kilionikea anazanke hu'ne fri'na'e. Ana hzageno, Naomina, tare mofavre'ane, neve'ene, fri'zageno, zavi neteno agraku mani'ne!
6 Moapuma mani'neno antahiama Ramo'a asomu huntegeno, agri'a vahepina nezamo'a avite'ma higeno'a, Naomi'a mopa'are vunaku retro nehigeno, nenoferokea, agrane vunaku tro hu'na'e.
Naomi'ene, Rutike Betrehem vu'na'a naneke
7 Nenofero a'trene, agrane (Naomi) ne'maniza mopa atre'za vu'za Judama nevza kante uhnati'naze. 8 Anante Naomi'a tarega nenoferogiznigu anage hu'ne, tarega motna'a kma antahi'o, antatani'amofo nontega vi'o. Fri'naza nagate'ene, nagrite'enema tanagrama ha'a avu'ava zantera, Anumzamo'a tnagrira ana huno knare avu'ava huranantesie. 9 Kasefa ve eritna nonku'ma hnapina Anumzamo'a knare'za huno kegva huranantegahie huno neznasmino, znagi antako nehige'za krafa hu'za zvi ate'naze. 10 Hianagi znagra anage huna'e, O'e, tagra kagri vahetega kagrane vugahu'e, huke asmi'na'e. 11 Hu'neanagi, Naomi nona'a anage hu'ne, Kuma tni'arega etetna vi'o, mofanimotna'a, Judama nagranema vna'a zamofona knare kegafa omne'ne. Nagra knare osu'noanki'na, mofavrea ksente'snugeno, anamo'a nernave zana osugahie. 12 Ku'ma taniarega etetna vi'o, mofa nimotna'a! Nagra ko tvava te'noanki'na ete'na arvea osugahue, nagrama antahi'na knare kna me'neanki'na meni kerge ve erina mofavre zga kse zamantegahue husine. 13 Tanagra knare znavega ante'nesanke'ne, arave huga kantera ra hate'sino? Tanagra knare vea e'oritna ana kna'afina amnea mani'tesino? O'e, mofa trenimotna'e, nagranena ovu tfaza hugaha'e. Na'ankure tanagrama eri'a knazana agtere'na nagra eri'noe, Ramo'a nagrira nazeri haviza hu'ne. 14 Tusi krafa hu'za mago'ene zvira ate'naze. Anante Opa'a nenoferona azerino antako nehuno, ana huo huno huma nenteana, Ruti'a tusi'za huno Naomina agzafeno anuki hampo'na hu'ne. 15 Naomi'a anage hu'ne, Ko, neganunkna'a, vahe'ane, anumzama'a nehirega eteno nevie. Neganunkna amage antenka kumaka'arega vuo, huno asmi'ne.
16 Hianagi Ruti'a ke'arera amanage hu'ne, natrenka vuo hunka kagra tutura huonanto. Na'ankure, kagrama inantega vusanana, anantega nagra vugahu'e. Inante manisanana, nagra anante umnigahu'e. Kagri vahe'mo'za, nagri vahe manigahaze. Kagri Anumzamo'a, nagri Anumza segahie. 17 Inante'ma kagrama fri snantera, anante nagra frisnuge'za ase nantegahaze. Anumzamo'a nagrira tusi'a kna namigahie, nagrama nehua kema amage'ma osnugeno'a. Magoke'zana fri'zamoke tazeri pasegahie.
18 Naomi'ma kegeno hampo'na tino agrane vugahue'ma higeno'a, tutu'ma huma nenteretira anante atre'ne. 19 Higeke ana tarega'moke vuvava hu'ne Betrehem uhanatina'e. Betrehemi ufrake'za, ana miko kumamo'za uma hnatina'a zankura tusi muse hu'naze. Ana kumate a'ne zgamo'za anage hu'naze, Ama ara Naomio?
20 Hianagi, Naomi'a ke nonazmi huno, Naomi'e (knaremo'e) hutma nagia ohetma, Mara'e (aka he'ne) huta nagia aheho, na'ankure Miko'zante Kva Hu'nea Hanave Anumzamo (Sovren) knare'zana huonante'ne. 21 Amareti'ma atre'na vu'noana avitena vu'noe, hianagi Ramo'a nzampi omne kno eteno nvareno e'ne. Na'a higetma Naomi'e huta nagia nehaze, negazo Ramo'ma nagrima ha'ma renenante'no, Miko'zante Kva Hu'nea Hnave Anumzamo (Sovren) nagri'ma nasuzane, nata'zama nenamiana?
22 E'ina higeno, Naomi'ene tragote'noma e'nea ara, Moabuti a' Ruti'e, nenofero. Moabuti'ma e'ne Betrehemi'ma ehanati na'ana, bali hoza agafa hu'za traga nehza knafi ena'e.