1 Dingla na pukakiar i rop, e Iesu i han ulak utumo e Kapernaum. A tarai la longori mang ika hanot tar ting na rumai, 2 pa galis on la, la hanot teteki, pa belal pukna tingui na rumai, pa tumo lapiu na taman otleng. Pa e Iesu i warawai ana warwara ane God tetek la. 3 Dingla na tarai la hanot taum ana ning a barsan a palaona i mat. Diat a barsan la losi tetek e Iesu. 4 Ika a galis a tarai la ka tur alar pasi pa bel la tolsot sur lar kas anoi. La abit ano usaot na palai a rumai, pa la regen pas ning a ris a pukul a rumai tostos ana pukna ning e Iesu i kes ia. Pa la alorong purum a barsan ning a palaona i mat taum ana logo ngasna. 5 Ning e Iesu i oroi anunla tortorot, i atai a barsan ning a palaona i mat mange, “Natuklik, di ka kepsen anum a toltol laulaula.” 6 Dingla na tena asaer tagun a Warkurai la kes tingia. La nuknuk ting na nuknukinla mange, 7 “Sur asa a barsan ne i atongi larne? I atong saksakan e God. Esi ir kepsen a toltol laulaula? E God ka.” 8 Aiapka e Iesu ka tasman tar a nuknukinla, pa i deken la mange, “Sur asa ning mulo nuknuk larne? 9 Esi na ngas a warwara ning bel i ngangitin sur ar atongi tana barsan ne? Ar atongi mange, ‘Di ka kepsen tar anum a toltol laulaula,’ o ar atongi mange, ‘Ur tur, los pas a logo ngasim pa ur han’? 10 Ar atongi manglarne sur mulor tasmani mang a Nat a Barsan i tong a warkurai sur ir kepsen a toltol laulaula mite lapiu.” Pa, i atai a barsan ning a palaona i mat mange, 11 “A atai u, ur tur, ur los a logo ngasim, pa ur han sur anum a rumai.” 12 I tur, i los anuna logo, pa i purum na matanla rop. La rop la kulkulan pa la rakan aleklek pas e God mange, “Bel mila sira oroi ta utna manglarne. Onobot ne mila oroi i.”

13 E Iesu i han purum ulak utumo na ris a puka tasi Galili, pa a tnan kunum a tarai la hanot teteki, pa i turpas a asaer la ana warwara ane God. 14 Ning i han amon, i oroi tetek e Liwai, a nat e Alpius, i kes ting na rumai totokom, pa e Iesu i atongi tana mang, “Ur mur iau.” Pa, e Liwai i tur pa i muri. 15 Lamur, ning e Iesu i kes ana utna na hangan ting na rumai ane Liwai, a galis a tena los totokom taum ana tena laulaula, la hangan taum o e Iesu pa kakak a asasaerla anunai. Anasa galis a tarai la mur e Iesu. 16 Dingla na tena asaer tagun a Warkurai, ning a Parisaiola, la oroi e Iesu ning i hangan taum ana tarai laulaula pa a tena los totokomla. La deken anuna kakak a asasaerla mang, “Sur asa ning i hangan taum ona tena los totokomla pa a tarai laulaula?” 17 Ning e Iesu i longori, i atai la, “A dokta bel i hanot sur la ning la laun wakak. Belal! I hanot sur la ning la kurah. Bel a hanot sur a tena tostosla. Belal! A hanot sur ar kabah pas a tarai laulaula.”

18 A kakak a asasaerla ane Jon taum ana Parisaiola la tamai. Dingla na tarai la han tetek e Iesu, pa la dekeni mang, “I mangasa ning a kakak a asasaerla ane Jon taum ana kakak a asasaer anuna Parisaiola, la tamai, ika anum na kakak a asasaerla belal?” 19 E Iesu i keles la mange, “A halalin na tinaulai totoh lar tamai mangmangasa ning a tona tinaulai kaning ot i kes taum on la? Ning kaning ot i kes taum on la, bel lar tamai. 20 Ika tik ta pukakiar ir hanot ning dir ben maskan a tinaulai totoh kusun la, pa, a pukakiar ning lar bot tamai.

21 “Bel tik ir raprap ta tona dia kaen taum ana ta muarna. Ning tik i toli larning, a tona ning dir raprap ono, ir silir sen aulak a muar a kaen, pa ir itna a taksilir. 22 Pa bel tik ir pek tar a tona wain ting na turai a koto na wain ning di toli ana palpal a inagoi, sakana a turai a koto na wain ir pusa, pa a wain ir tapek, pa a koto na wain otleng ir laulau. Dir pek ot a tona wain uting na tona koto na wain.”

23 Ana Pukakiar Sabat, e Iesu i han bolos a barim a wit. Ning la han amon, anuna kakak a asasaer la gomol kutus a witla. 24 A Parisaiola la deken e Iesu mang, “Oroi! Sur asa la tol a utna ning, pa bel la mur a Warkurai tagun a Pukakiar Sabat?” 25 E Iesu i keles la, “Mangasa belot mulo was asa ning e King Dewit i toli ning i taum ana halalna la murak, pa belal utna anlai? 26 Ning e Abiatar i ningnigo na tena artabar tetek e God, e Dewit i kas ting na rumai ane God pa i ien a bret ning di ka tabar tar e God ono. Pa i tabar na halalna otleng ono. A bret ning di sairasi kusun a tarai orosla. A tena artabarla ka tetek e God lar hangan taguni.”

27 Pa e Iesu i atai la mange, “Di tol tar a Pukakiar Sabat sur ir nangan a taraila, bel sur a tarai lar nangan a Pukakiar Sabat. 28 Larning a Nat a Barsan ot a Leklek tagun a Pukakiar Sabat.”