1 E Iesu i kas ulak uting na rumai lotu, pa ning a barsan kaning ia a kuna i del. 2 Pa a tarai la tai sur ta utna sur lar tiu e Iesu ono, pa la tai sursuri sur ning ir alangolango a tinsaman ana Pukakiar Sabat, o bel. 3 Pa i atai a barsan ning a kuna i del mang, “Ur tur te lanigo tan la rop.” 4 Pa e Iesu i deken la mange, “Asa ning a Warkuraila i atongi sur dir toli ana Pukakiar Sabat? Dir tol a wakakna o dir tol a laulauna, dir alangolango tik o dir saikol tik?” Ika bel la kelesi. 5 E Iesu i tai taltal ana balakut tetek la rop. I nukmaris la anasa a balanla i rakrakai. Pa i atai a barsan ning mang, “Ur kodos a kum.” I kodosi, pa a kuna i but ulak. 6 Ning a Parisaiola la purum, la han tetek a taraila ane Herot, pa la warwara taum pas sur lar umkol e Iesu mangmangasa.

7 E Iesu taum ana nuna kakak a asasaer la han utumo purum na puka tasi, pa a tnan kunum a tarai mitisa ana papar Galili la muri. 8 Pa a galis a tarai otleng la muri mitimo na papar Judia, pa mitisa e Jerusalem, pa miting na papar Idumea, pa mitimo na ning a ris a malum Jodan pa mitimo e Tair pa e Saidon otleng. Atnan kunum la hanot, anasa la ka longor tar a tatatnan utna ning e Iesu ka tol tari. 9-10 Ika alangolango pas a galis a tinsaman, pa la ning la kurah la sur sauran pas la, sur lar susur milau e Iesu pa lar tuki. Pa, i atai anuna kakak a asasaerla sur lar dulan parung a mon, sur ning a tnan kunum a tarai la kar atalilis pasi, io ir kas onoi. 11 La ning a mot i solsolong la, ning la oroi e Iesu lar punga purum namatana. Pa a motla lar kukuk mange, “U a Nat e God.” 12 Ika i sairas la sur gong la atong otnani mang i esi.

13 Lamur e Iesu i han usaot na mangir, pa i kabah pas la ning i mang sur la, pa la han teteki. 14 I aslang pas ka ning a bonot pa pisir naur, pa i atong la ona aposella. I kabah pas la sur lar han taum, pa ir sune sen la sur lar warawai ana warwara ane God. 15 I saran tar a rakrakai tan la sur lar kepsen a motla kusun a taraila. 16 Ine ning a bonot pa pisir naur ning i aslang pas la. Saimon ning e Iesu i saran tar ning a risana otleng e Pita. 17 E Jems di tas ma e Jon naur a nat e Sebedi, ning e Iesu i saran ulak a risan diau mang e Boarnerges, a kamkamna mang naur a tena warwara, 18 Endru, Pilip, Bartolomiu, Matiu, Tomas, Jems a nat e Alpius, pa e Tadius, pa e Saimon a Silot * Silot i a rising ning di atong a kunum a tarai ning la harum taum ana matanitu Rom sur lar langolango., 19 pa e Judas Iskariot, ning i tuam sen e Iesu.

20 Lamur e Iesu i kas ting na rumai pa a tnan kunum a tarai kale la han teteki, pa e Iesu taum ana nuna kakak a asasaerla bel la tolsot sur lar hangan. 21 Ning anuna mangis a tarai la longor a utna ne, la han sur lar ben pasi, anasa a tarai la mang bel ma i tostos a nuknukna. 22 A tena asaerla tagun a Warkurai mitisa e Jerusalem, la atongi mange, “Belsebul, a ningnigo anuna motla, kaning ma o e Iesu, pa i kepsen a motla ana rakrakai e Belsebul.” 23 Pa, e Iesu i kabah la teteki, pa i warwara larlar mange, “E Satan bel ir tolsot sur ir kepsen e Satan. 24 Ning ta matanitu ir sarara, a matanitu ning ir tur rakrakai mangmangasa? 25 Pa ning ta kabaitamana lar harum artalai tan la ot, bel ma lar kes taum. 26 Ning e Satan ir harum ulak taum ana nuna tena titolla, anuna matanitu bel ir tur rakrakai, ir rarop ka.

27 “Bel tik ir kas uting na rumai anuna ta rakrakai a barsan, pa ir los a ututnala mitisaui na rumai, ning bel i dot akes tar a rakrakai a barsan ning. Ning ot ir dot nigon tari, ir bot los pas anuna ututnala. 28 A atong momoli ta mulo: Dir kepsen a toltol laulau anuna taraila, pa nunla na warwara laulaula tetek e God. 29 Ika ning tik ir atong laulau a Talngan Tabu, bel tik ulak ma ir kepsen pasi. A toltol laulau ning ir tur tikin.” 30 E Iesu i atongi manglarne anasa la atongi ono mang, “A mot kaning ono.”

31 Tana e Iesu taum ana tastasnala la hanot, la tur tumolapiu pa la arsune suri. 32 A kunum a tarai la kes talilis pasi pa la atai i mang, “Etnam taum ana tastasimla kanumo lapiu. La tai sur u.” 33 Pa i deken la mang, “Esining e nang, pa esila ning na tastasikla?” 34 Pa i tai tetek la rop ning la kes talilis pasi. Pa i atongi larne, “Oroi, la ne, e nangla pa na tastasikla. 35 Anasa esining i mur a nuknuk e God, i ot ning a tasik barsan, pa a tasik hane pa e nang.”