M̃aki Nap̃a Pol Siria Pa Pan
Li Nalelagaen Wa Lala Nae Garu
PILIP̃AE
Visayuena Na Tusi Nene
Komp̃asnen suniena plas na tusi nini
Pol siri m̃aki nene pa e sum̃are nae Pilip̃ae nap̃a la nene ape yaru p̃esa nae Yurop nap̃a Pol mlologon p̃esan lologena wo pani la, ana apimi ape li nalelagaena. Pilip̃ae naga pulkumali keviu tai na lepas ne Masetonia, nap̃a sike vatanon P̃arin Sup̃e keviu nae Rom. Pol siri m̃aki nini e pogos tai nap̃a m̃eke e yum̃a naloge viowaena, a e poglis nene li nalelagaena lap̃asa asum̃a akawe naga, a naga miloge piowa m̃enaga e vianena na visokanena nap̃a sike loyum̃a e sum̃are nae Pilip̃ae. M̃aki nini kila meraravan nap̃a Pol naga p̃asine ga Ntewa, a naga kekara na kekara, ana tekilia sane naga sanene komin nap̃a naga mlelaga m̃arera e Yesu Kristo.
Pol siri m̃aki nini vena visan potena van li nalelagaena lala nae Pilip̃ae nap̃a amiila naga e ya nap̃a naga sinenania. La nene amligan kilavaru lap̃asa pa pania vena iilaen naga, a naga siri m̃aki nini pani la, vena visirluaen kiela sitomiena vena alelaga m̃arera e Yesu Kristo. Naga kila sanene komin nap̃a visae aloge sane naga m̃eke yum̃a naloge viowaena, ana pe aloge viowagan vap̃isi.
Naga pisa pan la vena akila kiela sitomena la sum̃aga tano, sane sitomena kiena Yesu Kristo. Pe pon re avilave poli, a asum̃a asitom la ga. Naga pisa panila sape kiela maliena viu nap̃a sike e Yesu Kristo, naga suri nap̃a Ntewa mla korenan ga sanene pan la e kiena lemamiena, a atol ga e kiela lelagaena lala. Pe atol re kome nap̃a amlogear navisaluaena kiena lus nae Israel la poli, peraga, atolia komin amlelaga ga e Yesu Kristo.
Pol sinenan sape li nalelagaena lala nae Pilip̃ae monar atol p̃elaga kiena Yesu Kristo. Naga sape la nap̃a asikol la ruru e Yesu, Ntewa mla sum̃are na lelaga sike e kiela maliena, a kila la asum̃a akekara luwega.
Pupia suri tai nap̃a Pol pisayu e m̃aki nini, naga sape li nalelagaena lala monar asikol ruru la amio Kristo, monar akekara, a kiela sitomena lala a kiela lelagaena lala sum̃al m̃arera e naga silaga. M̃aki nini kila merarava pan ita nap̃a Pol naga sinen sii pap̃isi li nalelagaena na sum̃are lala nae Pilip̃ae.
Komp̃asnen tusi la na nini
Visena p̃esa 1:1-11
Suri la nap̃a Pol sum̃a mloge ke piowagania 1:12-26
Malena kiena yaru nap̃a mlelaga monar taveve maliena kiena Kristo 1:27—2:18
Pol sape vitetalia Timote va gar pun la, a pitetalia Epaprotaetas p̃asup̃e si pa um̃a 2:19-30
Le Pilip̃ae lala monor avisuar la e kiela sinekar lala 3:1—4:9
Pol amio kiena erau lala nae Pilip̃ae 4:10-20
Visena maro 4:21-23
1
Visena na sumo
Yum̃aena 16:12M̃aki nini, yar na yum̃ae korenena la lua kiena ne Yesu Kristo, nane imimi lua Pol amio Timote, imimi lua mesiri pim̃asu pan amiu, nap̃a asike e pulkumali nap̃a Pilip̃ae, nane amiu nap̃a kiamiu malena su ruru ke amio Kristo, sane ape li nalelagaena wa lala, amio kiamiu nasumonena lala amio kiamiu yaru naiilaena lala. Imimi lua mekekaran navitawe amiuena sina ga e m̃aki nini, e kia kiena ne Ntewa arimata a Sup̃e Yesu Kristo, a imimi lua mepiun tan lalua nene, vena aligan lemamena a sum̃arena sike amio amiu nanagane.
Pol mlenwo la
3-4 In na nesitom̃al amiu lue ga e kiau leniena, a nekekara lue ga nalenwo amiuena van kieta Ntewa, a navisaen potena pap̃isi vania vanon amiu. In na nesitom̃al ke kiamiu navisuarinena, amio m̃ena kieta nayum̃ae veragaena e lologena wo, siar e nap̃a nesiar kiau yum̃aena e amiu, pimi tol nanagane, ana nepisa potena pap̃isi vanonia. In na nemlelaga sane Yarkeviu, nap̃a siar kiena yum̃aena wo tai pan amiu rui, naga kilia yum̃aen m̃a vano, vano-o kila ruru punu ga, nane e pog maro e pupia legiena nena kiena Yesu Kristo. Vanon sanene, avisu nap̃a in na nesitom amiu manene laa, nepisu sane nanene na mesmes ga, vanon tepa lele taaga loyum̃a e lemamena kiena ne Ntewa rui, ana amiu amio inu e sur la mok rui, e pog wo a e pog m̃arera. Nanagane, nepuarar ruru amiu asike e loyum̃a e inu, kila sane nanagane pogos nap̃a nesike e yum̃a na koaena, sa ga nap̃a ita m̃a nena ga. Pona visae aure inu neva e kumal na visen van inu vanon lologena wo nap̃a nepisawal ke ne, ana sa ga amiu amio inu ke na wa. Nanene pe lelaga ne, ana Ntewa kilia sape sineun m̃ena nesape nevisuli si maramiu wa. Awe, sineu miye amiu pap̃isi ne, e sinesiena make ga kiena ne Yesu Kristo. Nemlenwo amiu sanini, nesape kiamiu sinesiiena monar kapuru lue ga, a visae na kiliaena wo a namanmaruaena a navisuveve ruruena sike e amiu, kilia iila sinesiiena nene imi ve keviu lue van amiu. 10 Visae amiu ave sanene, yoko akilia atol make ga p̃elaga wo lala, a aligan la nap̃a piowa, ana yoko kiamiu malena la kilia merarava ruruia, tap̃atete sur tai te amiu e legiena kiena ne Kristo nap̃a pimi ke ne. 11 A kiamiu malena la yoko kilia war mras nen mesmesuena nap̃a Yesu tam̃an pimi, ana sane kieta mrapa tai nap̃a tekilia teyeluar Ntewa vanonia, a Ntewa m̃ena p̃arwarinia.
Pol sike e yum̃a na loge viowaena a kila ke yum̃aena kiena Sup̃e
12 Wolai a vineu lala, nesape nevisawal sur nene van amiu, sane pog m̃arera la nap̃a pimi pan e inu ke narui, pe akilawo re kiau yum̃aena poli, peraga. Ana la amiilaar ke lologena wo kilia va manene laa sane e yo tap̃ena la ve moki. 13  Yum̃aena 28:30E lepas nen yo nap̃a nesike ea, nepisu sane yar na mara lala amloge lologena wo na rui, a pa tol yar na mara e yum̃a m̃ana ne P̃arin Sup̃e Sisa, amio yeririna tap̃ena lala. Nanagane na la apisu kilale rui sane nop̃ar ke sen la nene vanon ga Kristo. 14 A nekekara m̃ena pap̃isi navisuen pogos nap̃a apuarnu e yum̃a na koaena sanene, ana sur nene pe kila re li nalelagaena tap̃ena la e nini amarau poli, kila la asum̃al m̃arera laa sane e Sup̃e, a ap̃aryon ke ga navisawalen visena kiena ne Ntewa.
15 Lala amlologon visena kiena ne Ntewa, pe sur wo tai, ana sur taaga, nekilia sane lala p̃asia amlologon Navisaarena Kristo e sitomena wo, a p̃asa amlologon e sitomena na vielueena a e sitomena na vilaveena. 16 A la nap̃a amiyum̃ae po, apisulup̃ar sane nesike e yum̃a na koaena vanon nemiyum̃aen lologena wo, ana sinela piowagan inu, a sinela piowagan la nap̃a pe amloge re poli wa, p̃isi na amlologo e sitomena wo. 17 Ana lala tap̃ena nene, amlologon Kristo ana pe ape lelaga re poli, ap̃arwar la pap̃isi, asape akila sa nap̃a lala towe ava metava. Sitomena viowa na sanene sike e la, ana pogos nap̃a apisu nap̃a apiar ruru inu e sen la nene nesike e nini, apisu sane pe kiela pog nap̃a akilia avisayu kare kiau kia e maran yar lala, ana akila kiela kia la pa metava. 18 Ana ane kilia, pona pe pe sur re tai poli. Kiela sitomen po yo, po piowa ga, ape lelaga pona apisokan, ana pupia sur keviu, kia kiena ne Kristo monar molue lue ga silaga.
Pol sape mal pona mare, ana sinenan ga Yesu
19 Sur ne na nene, pogos nap̃a nemloge asape kiena kia momolue ke pa rui, nekekara pap̃isi, ana sa pogos tai neloge sane kiena yum̃aena pa po manene laa ke sane, yoko neloge won vap̃isi. Nanagane na nepisu sane amligan nu nem̃eke ga e marena, a pe mrapa re nap̃a nekilia nemolue si vetan poli, ana pogos nap̃a nemloge sane kiena yum̃aena pa ke meta sanene, miilalua si kiau sitomena sane, kila nemlelaga manene laa sane e kiamiu leniena lala, amio naiilaena wo kiena ninuna ne Sup̃e Yesu Kristo, sane yoko wo van inu na wa. 20 Sanene na, nanagane na nemlelaga ke m̃arera sane akilali ya ne van inu, ana tap̃atete akila nekila sur tai na piowa pona nevisa visena tai nap̃a yoko nemawan sina e marana ne Ntewa. Visae nemal po nemare, pe pe sur re tai poli, ana sane pogos punu ga, sineun ga nesape nem̃areran ga kilaen kia kiena ne Kristo va manene laa metava wa, e sur ya nap̃a yoko vim katen inu po e tasneu. 21 Sur nap̃a teke e inu sanini, visae nemali, malena wo kiena Kristo sike amio inu, a visae nemare, neva nesike nemio naga, nap̃a wo manene laa sane. 22 Visae ve kiau nap̃a nemal ve piavi re laa sane e yomarava nini, naga nene sane kiau yum̃aena wo p̃as sike ga wa nayum̃aenena, nap̃a kilia war mras wo lala. Sanene na, nepisu sane visae nesum̃a, woga ga, a nepisu m̃ena sane visae nevano, naga m̃ena poga ga. P̃isi na nemninue narui, popon netaveve nape narui. 23 M̃arera pan inu pap̃isi navisuveveen mrapa lua nene navisa lologiaena tai, komin e kana lepas tai, sineun manene laa pap̃isi vena nevetan yomarava nini, neva nesike nemio Kristo, naga po manene laa sane, 24 ana nepisu m̃ena sane popon manene nesu re laa e nini sane, vena neiila amiu re laa ga wa. 25 Sitomena ne sanene m̃arera ruru pan in rui, kila sane nanagane nepisu sane nekilia nevisaar van amiu sane nesike si nemio amiu na wa, vena kila amiu akilia aloge wo e kiamiu viawaena e Kristo Yesu, a vena akilia ava re laa sane amio naga. 26 Ve sanene, yoko visae pogos tai neim nekaten amiu, nemlelaga sane yoko kila amiu akekaran Kristo va laa sane na wa, a yoko wo vap̃isi van amiu, kila ne kiamiu sur la ve moki sina na visaen potena vania a ve nayeluaren naga vanonia.
Monar teyakolkol ita ruruia, teve taaga na kilaen mara van sinekar lala
27 Ana pe tekilia ruru re poli wa sane yoko ve sanapen inu, ana pe sineun re asitom̃al in poli, asitom̃al amiu ga. Ayal ruru e mrapa na po, mesmes sane ave yar na lologena wo kiena ne Kristo. Pona nekilia neim nakaten amiu, po tap̃atete neim̃asu, ana popon visena tai tol kiligau sane apiawa m̃arera ruruia, nap̃a ninumiu ve taaga, kiamiu sitomena taaga ga na sum̃alen lele taaga, amiu am̃areran sane nalelagaena e lologena wo monar tauluia. 28 Ana ve amarau re, asitom korenan sur la nap̃a sane yoko nasinekar la akila van amiu. Pogos nap̃a neloge sane akila ke sanene, yoko wo na wo, vanon yoko ve kile kiena ne Ntewa van nasinekar lala vena welualaen, a ve kile kiena ne Ntewa van amiu vena kiamiu natamaliaena. 29 Lelaga, yoko monar akila mara amio sinekar la sanene, vanon pogos nap̃a Kristo p̃ere amiu ape kiena, pe naga re ga nap̃a aviawa ga e poli, ana yoko akus m̃ena naloge viowaena vanonia. 30  Yum̃aena 16:19-40Monar ve sanene, vanon nanagane tokus pae ke pupia mara nene nap̃a nanua apisu ke nokusia, pona nap̃a asum̃a amloge ke asape nokus ke ga wa.

1:1 Yum̃aena 16:12

1:13 Yum̃aena 28:30

1:30 Yum̃aena 16:19-40