Bible in Makonde New Testament and Old Testament Portions Vagalata 2

Vamyombe pa Yelusalemu vankunkubali Paulu

1 Napanelo vikapite vyaka kumi na nsheshe, nindyúka kavili ku Yelusalemu pamo namu Balinaba, mushimwanda shosho ndímuukanavo Titu. 2 Kwanavo nguukile kwamwaa wamaono kutwala kuvaigwiniya ntenga wambone wanguvalanganga kwavamidi, ndíikanavo kanji kwagweka avalá váshaaneka kuva vakuvaikila ngwambambidya nakapanji ninkutumbama kwali nditumbama yamonyo. 3 Napane ata jo nyangu Titu wanguvénavo àvele avi ngalegu, hapali ámuungidile akumuligwe likumbi. 4 Ing'ano ai ishashambwike na vanung'unumunu vakushang'apa vainjidíle na malotelo ashipiipii. Vanavo vandílijalanianga kwida ndapalalesha unaiti wetu watuvenavo nkati mumwe Klistu Yesu kwambangidya vatuukenavo muutumwa. 5 Wetu hatulidabadabyénge kuvaigwilila vanavo kulamana na padyoko vela pakulota umwiu wantenga wambone uliikiniye kwenu mwenu.

6 Napanelo avalá váshaaneka kuva vakuvaikila, shavavéle sho, kwangu nangu hashinava shinu mwaa Nnungu hanatanana kuvailanga kwamunu na vovo vo, hashipali shavangujanjadidye. 7 Vanavo valakilé kwanjadedya kutwa kumanya do, ntenga wambone wo, ndikulupiligwa nangu kwavakakumuligwe kenga Patulu kwavakukumuligwa 8 mwaa jo ákadile madengo kumwe Patulu aumyombe kwavayuda ni jojo ákadile kwangu nangu kwavamidi. 9 Nadoni vamanya umonyo wangupatile, Tiyagu, Kepashi namu Nshuwau, vo váshaaneka kuva mabodo, vandítuwanidya makono akulodya upamo namu wetu, yani nangu namu Balinaba. Vanavo vandíkubali wetu tuve kwavamidi, vanavo kwavayuda 10 ila hatunavalivalile vákave pashinu, ni shinu shanguvikidile namene kuntima na kutandedya.*

Paulu ankunshashulanga Kepashi

11 Napanelo Kepashi pawikile pa Antiyokiya nínshashulanga ngala kwamwaa wakutenda makosha. 12 Mwaa vanu vanji vakwalakela kumwe Tiyagu vakanava kuwika, nae ashindalya na vamidi. Napane pavawikile vanavo, Kepashi andílyapula kutwala kulyumadyanga avajopa avalá váshishililidya likumbi. 13 Namomo vayuda vanji uti vandílyunganianga namu Kepashi mo mushinankulaba, ata mpaka Balinaba momo andítwaligwa mushinankulaba shave. 14 Bai pangugwene kenga havanauka shana nkati muumwiu wantenga wambone, ndímwaulila nae paumbala doni, “Wako umuyuda kanji unkunama kenga ummidi i kenga muyuda. Napane mwaa shani uvalamulila vamidi vaname kenga vayuda?”

15 Wetu túvele tuvayuda kwashivalakwelo i vakutega vavamidi,† 16 ata tumanya avi do, munu hanapata shinu ishaliya kwamwaa wakwodedya lilamulo ila kwaindila yakunkulupila Yesu Klistu, nawetu momo tuninkulupila Yesu Klistu pakulota tupate ishaliya kwaindila yakunkulupila Klistu i kwamwaa wakwodedya lilamulo. Ni doni, kwakwodedya lilamulo, hapali álota kupata ishaliya.

17 Ikava kenga wetu tulambela tupate ishaliya nkati mumwe Klistu kutwa wewe momo kwaneka kuva tuvakutega,‡ da napane Klistu jo ntumika walidambi? I mwanavo! 18 Mwaa ikava kenga avilá vyangubamalenge ninkunonowangidya kavili, bai ninkulilodya ngala kuva nimunu wakupujungula. 19 Mwaa nangu kwaindila yalilamulo ndipela mulilamulo§ kwambangidya nguname mu Nnungu. Nangu ndipela panshalaba namu Klistu. 20 Ninkunama kanji i nangu ila Klistu ni anama nkati mwangu.** Shingumi shanguvenavo mumili ambi apa, ninkunama kwakunkulupila Mwana wa Nnungu ángunagwaladidye na álijawile kwamwaa wangu nangu. 21 Hangunavika shinu kunyenje umonyo wa Nnungu mwaa ikava kenga kwaindila yalilamulo munu ankupata ishaliya, bai Klistu apadilé monyo.

*2:10 Vananangalaledi va ku Yelusalemu hashipali shinu shavanjadidye muntenga wambone utangóla kenga tunkupata ishaliya kwaumonyo kwaindila yalikulupililo. Vanavo havatangwele indivaikila vakumuligwe likumbi kwali vatandedye lilamulo pakulota vapate ishaliya. Pavatangwele do, vatanane vákave pashinu havashijanjedya ila vashilaililila vyepo vyantenga wambone wo. Kenga vyepo vyantenga wambone, nanae Paulu ankupundisha doni, indivaikila tunagwaladyanie. Lola 5:13-6:10.

†2:15 Paulu patangola doni, vakutega vavamidi avamba vamidi yamene kuvanavo lilamulo. Mwaa Nnungu anímpanga imbodi Abulaamu kutwala kunnamulila avakumule vanavake likumbi. Lola Kutunduvanga 17. Mushu mwake andívaambola vanaishilaeli ku Mishili kutwala kuvapa lilamulo. Lola Kuma 20. Napanelo vayuda vashivona vamidi kuva vakutega mwaa havapagwíte nkati mulilamulo.

‡2:17 Paulu patangwele doni, kutwala wewe momo kwaneka kuva tuvakutega ashivalinganianganavo vamidi váshaaneka kuva vakutega. Lola 2:15.

§2:19 Paulu patangwele doni, kwaindila yalilamulo ndipela mulilamulo, inkuululika kwamba vinu vivili. Shitandi, inkuululika kwamwaa wamunu mene kupata ishaliya kwaindila yalilamulo bai andyámbukanga lilamulo. Lola 2:16. Shambili inkuululika kwamba kupela kumwe Klistu panshalaba mwaa Paulu ankuka mushu aashidoni, ndipela panshalaba namu Klistu. Kavili ankupundisha doni, Klistu andipela kwaindila yalilamulo alitika dilana dyetu wetu dyalakéla mulilamulo. Lola 3:13. Nadoni aijá ánkulupila Klistu ankupela momo kwaindila yalilamulo mwaa ankupela panshalaba namu Klistu.

**2:20 Mushu mwake, Paulu ankupundisha atunduvangila ing'ano yakunama Klistu nkati mwavakwoda. Ankuvamanyiya vagalata vaname mu Imumu i kwamalotelo amili. Lola 5:16-26. Kwamwaa wakunama Klistu nkati mwave, vakwoda vankuulula kunama mwalatela Nnungu. Linganianga Vaepeshu 3:16-20; Valoma 8:9-11.