5
Ka Otow no Ogpakaroog to mgo Maroot no Batasan
Ka tibo no mgo otow no ogtuu to si Hisus ka Im-imanan to mgo Koot-otawan no oghingaranan ki Kristu, mgo anak to Magboboot sikandan.* To Ginirigu no kinagian, si Kristu ka ighingaranan dan to sikan no im-imanan dan no Lagboy no Igbuyag no innangon dongan no igpoindini to Magboboot kai to tano. No ko tu-tuu ian to indakoli to songo otow ka Amoy ta no ka Magboboot, ogpakalagkos dod to igdakoli rin ka mgo anak din. Ogkatagaan ta to igdakoli ta ka mgo otow no nohimu no mgo anak din ko indakoli tad ka Magboboot woy ogtuman ki to mgo sugu din. Ian su ka pogtuman ta to mgo sugu din, sikan ian ka indanan to duon ian goinawa ta kandin. Di kono man no mohirap to ogtumanon ta ka mgo sugu din. Ian su ka mgo otow no nohimu on no anak din, ogmanokal on su ligkat to pogsalig dan ki Hisus. No kono dan ogkatuman ka mgo maroot no batasan to soini no kalibutan. Ka mgo otow no ogtuu to si Hisus ka Anak to Magboboot, sikan ian ka ogpakaroog no ogligal to mgo maroot no mgo batasan to soini no kalibutan.
Ka Igmalogot to si Hisu Kristu ka Anak to Magboboot
Si Hisu Kristu ka nighondii to tano no nigbautismuan to woig. No pogkalugoy, niglangosa ka lawa rin to poghimatoy kandin. Kono no sikan do no woig no imbautismu ka igmalogot ko hontow si Hisus su songo og-awoson ta rod ka langosa rin no igmalogot kandin. Ka Gimukud to Magboboot, songo ogpamalogot ki Hisus su tu-tuu ian ka kagi to Gimukud to Magboboot. No sikandin, woy ka woig no imbautismu ki Hisus, woy ka langosa to pogkamatoy rin, tibo sikan no tatolu, ogpamalogot kanta to tu-tuu ian to si Hisus ka Anak to Magboboot. Ka igmalogot to otow, ogtuuan ta, di lagboy tad ogtuuan ko ka Magboboot on ka ogkagi, no ian din igpamalogot to Anak din ian si Hisus. 10 Ka otow no ogtuu to Anak to Magboboot, duon on dio to goinawa rin ka igmalogot to sikan no nigtuuan din. Di ka otow no kono ogtuu to innangon to Magboboot, ogkounawa to oghimuon din ka Magboboot no ubaton su kono din ogtuuan ka immalogot din tongod to Anak din. 11 No ka soini igmalogot kanta to duon imbogoy to Magboboot kanta to kouyagan ta no waro katamanan. No ka sikan no kouyagan ta, ogligkat to Anak din. 12 Ka otow no oggongon to Anak din no si Hisus, duon on kouyagan din no waro katamanan. Di ka sikan no otow no waro niggongon to Anak to Magboboot, songo waro makatagu to goinawa rin ka sikan no kouyagan.
Ka Kouyagan no Waro Katamanan
13 Ogsulatan ku sikaniu no nigtuu to ngaran to Anak to Magboboot su oyow ogkataga kow on ian to duon on to kaniu no goinawa ka kouyagan no waro katamanan. 14 No ko duon ogbuyuon ta to Magboboot, woy nataga ki to ogkaayun on to goinawa rin, songo nataga ki woy kono ki ogduwaruwa no ogpamminogan kid nikandin. 15 Sikan ian, ko nokoy ka ogbuyuon ta, woy nataga ki to ogpamminogan ki nikandin, songo ogkataga kid on to ogbogayan ki rin to sikan no nigbuyu ta.
16 Ko duon otow no ogtuu ki Hisus no ogkita to ogpakasalo ka duma rin no nigtuu, no ko ka salo to sikan no otow, kono no salo no kono ogkapasaylu, maroyow ko og-ampuan din ka sikan no otow no nakasalo no ogbogayan to Magboboot to pogkouyag din. Di duon salo no kono ogkapasaylu. Kono a ognangon kaniu to ig-ampu now ka sikan no otow no nakasalo to salo no kono ogkapasaylu. 17 Agad nokoy no maroot no batasan salo dod, di duon salo no ogkapasaylu. To Ginirigu no kinagian, soini ka salo no ogpakataman to kamatayon. Di waro ki lagboy mataga ko ian lituk ko salo no ogpakataman to kamatayon to lawa ro to songo otow, woy ko igkalituk to salo no ogpakataman to kamatayon no waro katamanan.
18 Nataga ki tongod to mgo otow no nohimu on no mgo anak to Magboboot, to kono dan ogparagason ka mgo salo dan. Ian su si Hisus no ian Anak to Magboboot ka ogkannugun kanta oyow kono ogpakatood si Satanas no oggongon kanta. 19 Songo nataga ki to nohimu kid on no mgo anak to Magboboot. Di ka tibo no mgo otow kai to soini no kalibutan no waro nigtuu kandin, duon pad to katondanan ni Satanas. 20 Nataga ki, tongod to Anak to Magboboot, to nighondii to soini no tano no nigbogayan ki nikandin to pogsabut oyow ogkatagaan ta ko hondoi ka tu-tuu ian no Magboboot. Sikanta no nigtuu, ogdumaruma ki kandin no ian ka tu-tuu no Magboboot woy songo ogdurumaruma ki to Anak din no si Hisu Kristu. Sikandin ian ka tu-tuu ian no Magboboot, woy sikandin dod ian ka ogpakabogoy to kouyagan no waro katamanan.
21 Mgo anak, tantanuri now ka goinawa now oyow kono kow oghilabot to mgo og-ampuan to mgo otow no kono ian no tu-tuu ian no Magboboot.

*5:1 To Ginirigu no kinagian, si Kristu ka ighingaranan dan to sikan no im-imanan dan no Lagboy no Igbuyag no innangon dongan no igpoindini to Magboboot kai to tano.

5:17 To Ginirigu no kinagian, soini ka salo no ogpakataman to kamatayon. Di waro ki lagboy mataga ko ian lituk ko salo no ogpakataman to kamatayon to lawa ro to songo otow, woy ko igkalituk to salo no ogpakataman to kamatayon no waro katamanan.