Ka Sulat ne Igpeendiye te
Hibruwanen
Igpewun-a
Ka seini ne sulat, ware nanengnengi ke hentew ka migsulat kayi, piru igpeendiye seini te sabeka ne punduk te me Hudiyu ne migmalintutuu ne egngaranan degma te Hibruwanen. Insulat seini su eyew egkalig-en ka pegpalintutuu ran tenged su nana-nasian e ka keyirapan ne eg-antusen dan wey in-el-elehan ka pegpalintutuu ran ki Kristu. Sikan naa, imbagget sikandan te talagsulat meyitenged te pegpalintutuu ran wey impanulu din sikandan te si Hisu Kristu ka malehet wey ka katammanan ne impakita te Manama te me etew kayi te ampew te tane.
Ne due seini se tatelu ne kamalehetan ne mig-ay-ayaran din te egpanulu: (1) Si Hisus ka ware bunsuranan wey ware katamanan ne Anak te Manama. Ne labew pad sikandin te me prupita, me panalihan, wey minsan ki Muwisis. (2) Si Hisus ka impeila te Manama ne ware katamanan ne talagpanubad. Labew sikandin te me talagpanubad diye te Tapey ne Kasabutan. (3) Ne pinaahi ki Hisus, ka migpalintutuu kandin egkaluwas te sale wey te kamatayen.
Nahuhud diye te kapitulu 11 ka meyitenged te pegpalintutuu te mabantug ne me Hibruwanen puun pad dengan. Sikan naa, imbagget te talagsulat ka migmalintutuu ne eglig-en te pegpalintutuu ran. Ne diye te kapitulu 12, imbagget din man-e sikandan ne egpabulus ka egmatinumanen taman te katamanan, ne iyan de egtengtengan si Hisus. Igpaantus man-e kandan ka me keyirapan wey ka pegbayad-bayad ne egginguma kandan. Piru keilangan ne egkatahaan dan ne seeye se langun, pegdisiplina re kandan te Manama isip me anak din. Mig-impusan din ka seini ne sulat pinaahi te pegtambag din wey pegpaney-paney rin.
Ka nasulat te seini ne baseen
Igpewun-a: Ka Anak iling ded te Manama 1:1-3
Labew si Kristu te me panalihan 1:4–2:18
Labew si Kristu engki Muwisis wey ki Huswi 3:1–4:13
Si Kristu ka labew te langun ne talagpanubad 4:14–7:28
Labew ka kasabutan ni Kristu du te langun ne me kasabutan 8:1–9:28
Labew te langun ka pegpanubad ki Kristu 10:1-39
Ka panunggilingan te pegpalintutuu ne eg-ikulen ta 11:1–12:29
Ka katammanan ne pegpaney-paney wey ka pegpanulu 13:1-25
1
Ka katelesan te Amey due te Anak
1 Dengan ne timpu, malasi migpakiglalag ka Manama te nalein-lein ne paahi diye te me kaap-apuan ta pinaahi te me prupita. 2 Piru te seini se katammanan ne timpu, migpakiglalag sikandin kanta pinaahi te Anak din ne in-alam din ne iyan egkeyimu ne kamuney te langun. Ne pinaahi kandin, innimu te Manama ka kalibutan. 3 Due te Anak egkakita ka katelesan te Manama, wey ke nekey ka Manama, iling naan ded ka Anak. Sikandin ka egbuut wey egtanggu te langun pinaahi te maresen ne lalag din. Te napenga rin e ka innimu rin ne peglinis te sale te me etew, migpinnuu e sikandin diye te igkakawanan* Sumale te tuluuwen te me Hudiyu, ka talahuren de ne etew ka egpakapinnuu diye te igkakawanan te mabantug ne etew. te Amana ne Maresen ne Manama ne diye te langit.
Labew ka Anak du te me panalihan
4 Purisu, labew pad sikandin te me panalihan te Manama wey labew pad degma ka genal ne imbehey te Manama kandin du te me panalihan. 5 Sal 2:7; 2Sam 7:14; 1Kru 17:13. Su ware de due panalihan ne migkahiyan te Manama,
“Anak ku sikeykew.
Kuntee, igpanengneng ku ne Amey ad e nikeykew.”
Ware ingkahi te Manama meyitenged te panalihan,
“Amey ad e nikandin,
wey Anak kud e sikandin.”
6 Diy 32:43 (LXX). Timul pad man-e, te pegpeuyan te Manama te mabantug† Te Grigu: ka panganey ne anak din. ne anak din kayi te kalibutan, migkahi sikandin,
“Keilangan ne ka langun ne me panalihan te Manama egsimba kandin.”
7 Sal 104:4 (LXX). Meyitenged te me panalihan, migkahi ka Manama,
“Innimu te Manama ka me panalihan ne egpekeiling te kalamag,
wey ka suluhuanen din ne egpekeiling te hapuy ne egkanlabkanlab.”
8 Sal 45:6-7. Piru migkahiyan din mule ka Anak din,
“Ka Peghari nu, Manama, ware iya egtamanan,
wey matareng ka peg-uyan nu te migharian nu.
9 Inggeyinawaan nu ka himu ne matareng, piru ka himu ne mareet, ingkeepes nu.
Purisu, sikeddi ne Manama nu ka mig-alam keykew ne egpakaparibabew te me duma nu
wey ka migbehey keykew te dakel ne kahale kuntere kandan.”
10 Sal 102:25-27 (LXX). Ne mig-abey sikandin migkahi diye te Anak din,
“Te an-anayan, Magbebaye, innimu nu ka kalibutan,
wey intekul te belad nu ka langit.
11 Egkengaawe sikandan, piru kene ka mule egkaawe.
Egkaleddak ka langun iling te me manggad.
12 Eglupien nu sikandan iling te kumbale,
wey egbullasan nu sikandan.
Piru sikeykew, kene ka egkabalbalawan
wey ware egtamanan te umul nu.”
13 Sal 110:1. Ne ware de due panalihan ne ingkahiyan te Manama,
“Pinnuu ka kayi te igkakawanan ku,
taman te eggimuwen ku ne diekanan nu
ka me kuntere nu.”
14 Na, nekey naa ka me panalihan? Sikandan ka me suluhuanen te Manama ne kene egkakita ne igpeuyan din eyew egtanggu te seeye se egpakarawat te kaluwasan.