MIN-IBLIW
Nag takakins kal nilel let towen, pines min-Yudiy tasiyas nisimounids waseg Yeisuw Kelis. Let towen wanuwan ikatimlakay va̱gan bikakins Yeisuw Kelis nakaleiwag kweivaw bo ilisow min-Yudiy sikaleiwag kweiboug. Ilana, “Kadiloka bitatoukums, tasimounids Yeisuw waseg, va̱gan Yowbad mo bikalin nuwan ya̱kids.”
1
Yowbad natun tatonen
1 Kweiboug, tut babaw, ked kweitan kweitan waseg, Yowbad anilivan isekes tammwayas. Anilivan bo isekes tasiyas palopits mo ikatpeles, isekes tammwayas.
2 Tage nakabiyokous tut, nagein waseg, anilivan bo isekeids Natun waseg. Bo isek Natun youd babaw nisesus, mamagina nakiyay tatonen. O tut kweiboug, Natun ileb Taman, mo ibun ven watinow.
3 Natun mititeilin ivag mamagina Yowbad yakawanan, peinan askakin katanok-wan. Anilivan tawtoun waseg bo ikimtuwes youd babaw ven watinow o walba̱lab, va̱gan biwotets bwein. Bo iwid adsinaps kalbaleb ikous, mo isin Yowbad wanaka̱tay walba̱lab.
4 E, Natun yagan imug; min-liba̱lab asibabaw yiges ikuyeim. Natawtoun-vak bo imug wasigeis tasiyas min-liba̱lab.
5 Yowbad nag teitan gum-liba̱lab bidibek mamagina:
“Yak Natug, nagein bo kumlavag Natug”; nag.
Misinaka Natun tatonen idibek ma̱wan. Kweitan-vak Yowbad anilivan, idibek Deibid mamagina:
“Yey bamlavag Taman tonen;
mtowen yey Natug.”
6 Kwatounun livan, misiya̱mun nisen Natun kunutaw ven watinow waseg, ilivan mamagina:
“Meiveks-wan min-liba̱lab bweina bikululs wamatan.”
7 Liva̱nen tasiyas Yowbad nataka̱yobs ilivan mamagina:
“Bo iva̱ges tasiyas nataka̱yobs mamagina yag;
o natouwat tasiyas iva̱ges mamagina mayen kov.”
8-9 Tage liva̱nen Natun nises Bukitab waseg mamagina:
“O Yowbad, mukwaleiwag nag beikous.
O mukwaleiwag didumwal, bwanabwein.
Ivag sivinam sinap didumwal; sinap kaydodog kupiyev.
Mapuna Yowbad bo nisekeim mumwa̱saw singay.
Waseg nukwalisawes simwey.”
10-12 Kweitan livan-vak mamagina:
“Guyaw ya̱koum, wankougwana nukusein ven watinow;
o liba̱lab mukwabwabub ya̱koum.
Youd tasiyas igaw bipsa̱pwas beikous,
tage yak bukusesun-wan.
Ma̱wana kweim kweiboug bisigsa̱gob,
mo bukwatpum bukwatlow ma̱wana kweim tonen;
tage yak bukusesuna, bukusigeg.
Ambweilim nag beikous.”
13 Nag teitan gum-liba̱lab idibek mamagina:
“Kusin wagunka̱tay mo bavag mukwaleiwag wasigeis tasiyas nikamliweims ya̱koum.
E, mo bimlavags mamagina mukwabtatet tasiyas.”
Nag. Misinaka Natun tatonen idibek ma̱wan.
14 Peinan min-liba̱lab mamagina kalisiy kululuwes tasiyas. Yowbad ikayyabes kid bimtakavateids gamag mwasanin ya̱kids, kalisiy wasigeis ya̱kids Yowbad mo bikatinabwes.