1 Israe ŋic jaŋerao porofete burecne i wâc mâmâc fuarâ jumbiŋ, eme ŋoŋerao iŋuc jaha qaqazu burecne fuaniŋmu. Jaŋe mitire mumusifuc bâfuapie ŋoŋerao fâfâuc fuaocmu, erâ Wofuŋ kiwiric-jeŋic rowec e mickeniŋmu. Iŋuc epie sisipiric ɋeŋfâfâc jaha fisi-jareocmu. 2 Ŋic i jaŋe sasec gie bapie bocjahazi honerâ bâjâpec-jopaniŋmu, eme jaŋere erâ miti hata susure fuaocmu. 3 Erâ wâc moneŋ mafare andac ehuc maŋko fuac dâŋzi eatuc-ŋopahuc wiac-ŋeŋicte kâŋgâc gie baniŋmu. Jaŋere okacne dâŋ esecne mukicne i mi pârâwewec, â sisipiric-jeŋic i micmâŋ mi ewec.

4 Anuture manaeŋgopeneŋ, e aŋelo sâqorekicne jaŋe mi akic-jopawec, aricne, e hârâcko tuŋjopame duŋdapâcko humbiŋ, ira okac dameŋte woŋec foeŋgopieŋ. 5 E mârâc sasac jaha ŋic â wiac sasawa mi akic-jopawec, mâc Noa, tiŋne jujure biŋe mumu, erâ ŋic ŋokac 7 jaŋe sawa ŋezic-jopame ɋâricne juhapie ŋic sâqocne jaŋerao rumi sâko fisiwec. 6 Erâ Sodom â Gomora hae iŋuc jaha sirowenicte mume ʒoczi ʒacjofawec, i ŋic sâqocne ʒâhec fuarâ juniŋmu jaŋere uŋ muhuc iŋuc ewec. 7 Erâ wâc mitiŋic Loti e sindaŋŋic jaŋe wiac mamakâcne mimi tâmiric ehuc jupie irec buʒâic manahuc juhame ŋezickewec. 8 Loti e mitiheczi jaŋere ŋondeŋko juhame jaŋe sindaŋ hârindaŋ epie ʒoaŋne ʒoaŋne hone manac ehuc maŋne sisi hâhâŋ wemo afecne ewec. 9 Wofuŋ eki ine ŋic mitihec eesâic docko roroŋ sasapec ejareekac â miti tâmiric jaŋe okac dameŋko ʒâic gie mujareocte kâpâcwâru bacjopaekac. 10 Ŋic maŋjeŋiczi sasecte bâruŋkeme sohoŋ nâ ruac ehuc Wofuŋ â ŋic fekicne ro waha âte ejareeŋgopieŋ jaŋe hâcne kâpâcwâru sanaŋne bacjopaocmu. Ŋic iŋucnezi hâhâwic tâmiric mukac mupe ehuc tatamachec jaŋe wâc musuac-jopaeŋgopieŋ.

Miti beherâ sasecko sipirickezo

11 Iŋuc ehapie aŋelo jaŋe ine sasanaŋ â tâpiri fuŋmoc fojarekaczi Wofuŋte maio mi mugâpâre-jareeŋgopieŋ. 12 Ŋic izi hâcne maŋ tâmiric, qowi qa nâc ejareeŋgopeneŋ jaŋe iŋucne. Jaŋe wiac fuŋne kâuc baeŋgopieŋ i kosa musuaeŋgopieŋ; irec qowi sisipiric sipirickeniŋmu, 13 ehuc hehesic-jeŋicte furine roniŋmu. Jaŋe ʒoaŋ ɋaɋacko tiwâ ʒepec â gae wowozi ʒeri-jeŋic eekac. Mamakâcne â maŋwânâŋ qâŋkerâ juju, ʒege hârocko hefârec-ŋopahuc bâbâsifucte eeatuc-ŋopa, 14 ʒâŋe-jeŋiczi sasec ʒâŋe fifi, sâqocne gapecmâc ee, ŋic biric borocne wiac iŋucnere doc babac-jopa, moneŋ mafare harac eku maŋjeŋic ekicne, ŋic iŋucnezi hârâcte biŋe hâcne¡ 15 Jaŋe hata dândâŋne i râpeckerâ qâsoriehuc Bileam, Beorore ŋokâ, ere kike hata bâjâpembiŋ. E sâqocnere furi roocte andac eme 16 Wofuŋzi qaqatara-ticnere haneckewec. Eme doŋgi dâŋ tâmiriczi ŋicdâŋ dâŋehuc porofete bâbâsifucne e heckenewec.

17 Ŋic iŋucnezi opâ ʒizicne iŋucne, erâ mâŋâŋzi hâwec ficne sueme ra fe ware fe eekac iŋucne tinac. Ŋic i jaŋe ŋafe sanaŋko dapâc qisiricko fisiniŋte mukicne. 18 Jaŋe pacgoroŋ dâŋ erâ, ŋic qâpuc hata ɋâri qaqa jaha râpeckembiŋ, jaŋe eatuc-jopaeŋgopieŋ, ehuc tiwâ ʒepeczi gisicbeŋ eme sicne-jarepie fisipie qâturerâ sasec gie baeŋgopieŋ. 19 Ehuc ŋic ʒiŋuc jazaeŋgopieŋ: “Iŋuc erâ niŋgiŋ tâmiric sâcne juhâmozo”, i jaŋacne sisipiricte niŋgiŋko fohuc iŋuc mueŋgopieŋ. Ŋic moczi wiac mocte kiŋaŋ qaocmu, e wiac irec niŋgiŋko juocmu hâcne.

Hata raŋɋanao risierâ kiŋsâko hurezo

20 Manaŋgopieŋ, miti tâmiric jaŋere sohoŋ râpeckerâ Wofuŋ â bâbâpiaŋ Jesu Kristo mana maŋ embiŋzi ijaha mocwâc maickerâ qohotaniŋmu, ine mârâc juju bapa-jeŋic afecne sâqorehame ʒâhec juju bapa-jeŋic sâqore sanaŋkeocmu. 21 Ŋic iŋucne jaŋe tiŋne hata kâuc bahuc mi âtepie muzac boc mi sâqorezac; â hata i âtekicnezi tiri sâcmutâc dâŋ qazu-jarekicne i mocwâc igockehuc hata raŋɋanao risiepie ine sâqoreekac. 22 Ŋic iŋucne jaŋerao dâŋ ʒiŋuc mukicne i sanaŋkeekac: Qâto e nânâ maŋurâ ijaha mocwâc nâekac, â bec e opâ ruarâ izia sohoŋ ruaekac.