1 Jorocfâc-nane, ŋoŋere papia ʒi qâreŋkehape jajahec ekac. No maŋŋeŋic wiwickepe mitidâŋ mi mana sifuckehuc sâcne mana taraniŋte qâreŋke-ŋareekopac hâcne. 2 Eme ŋoŋe tiri porofete mârâc jaha dâŋ mumbiŋ irec mecne â aposolofâc-ŋeŋic nâŋe Wofuŋ â bâbâpiaŋte sâcmutâc dâŋ ŋazambeŋ i mecne mâmâc manasuhuc junʒepieŋ. 3 Ehuc qanaŋ ʒiŋuc mana sanaŋkenʒepieŋ: Dameŋ bembeŋkezo eme ŋic âke sisicne fuarâ mufec muriŋ dâŋ muhuc sasec gie-jeŋicte heʒâkiriŋkerâ juniŋmu. 4 Ehuc ʒiŋuc muniŋmu: “Wofuŋ risieocte mukicne fârine weni? Kâcɋenefâc-nâŋec hâmombiŋ, ehame wiac sasawa mâreŋ fuaweckonecteaŋ fowarehuc juwec iŋucnea fohuc jukac.” 5 Jaŋe fuŋne ʒiŋuc mana-bipiehuc dâŋ i mueŋgopieŋ: Sambâŋ e mârâc jaha fuawec â mâreŋ e iŋuc jaha. I Anutu dâŋticnere opâonec fuarâ opâheckoaŋ fowec. 6 Eme ʒâhec opâzia ŋic â wiac sasawa qâuruc-jopahuc bâsirowec-jopawec. 7 Á sambâŋ â mâreŋ ʒi fokopirec ine Anuture dâŋzi sakarec-jofame ʒocte biŋe erâ fokopirec. Okac dameŋ maickeme ŋic sâqocne jaŋe sipirickeniŋte irec woŋec fokopirec hâcne.

8 Jorocfâc-nane, wiac moc ʒi kâuc mi banʒepieŋ: Wofuŋ e ʒoaŋ gie bapa mocjahare maname jare I tauseŋ tinac eekac â jara I tauseŋ irec maname ʒoaŋ gie bapa mocjaha tinac eekac. 9 Wofuŋ e dâŋ muwec irec fârine bâfuaocte bititiehuc dameŋ mi bâʒoraekac, ŋic gâcnezi manapie iŋuc tinac eekac. Aricne, e ŋic gâcnezi sipirickenʒipiŋte ŋoŋere erâ woŋec juekac. E ŋic mâmâc sasawa maŋjeŋic bârisie-fâreniŋte muekac hâcne.

10 Wofuŋte dameŋ e râsi fisieŋgopieŋ iŋuc jaha ututuŋ maickeocmu. Maickeme sambâŋ e fânâŋ sâko ehuc siroweocmu, â wiac hohonene sasawa i ʒoczi ʒafâreocmu, erâ wâc mâreŋ â fainao wiac bâfuakicne i ʒoczi ʒâseŋkeocmu. 11 Wiac sasawa sirowe-fâreocmu, irec ŋoŋe pectâc juhuc miti sisirombe faio bajunʒepieŋ. 12 Iŋuc ehuc Anutu dameŋ-ticne hejâpehuc harac huacbuc enʒepieŋ. Maickeme hâcne sambâŋ e ʒoczi ʒârârâŋneocmu, â wiac hohonene sasawa i ʒocbâruŋko ʒâtâmireocmu. 13 Nâŋâc ine sambâŋ ɋâricne â mâreŋ ɋâricne fuaocte biŋe qanârekicne, irec woŋec jueŋgopeneŋ, eme ira tiŋne jujuzi sâcke-fârerâ fozokac.

14 Jorocfâc-nane, ŋoŋe wiac iŋucnere woŋec juhuc ere maio maŋfuru â bahacmâc juniŋte wawariehuc wamao jupie honec-ŋopame sâckezejec. 15 Erâ Wofuŋ-nâŋeczi dameŋ-ticne bâʒorame munʒepieŋ, bâpiaŋ-nâpoocte ekac. Âgo biaŋ-nâŋec Paulo e maŋɋârâŋ-ticnere sâcko dâŋ irecteaŋ qâreŋke-ŋarewec. 16 E papia qâreŋkehuc sâc dâŋ i mufua rawec. Papia-ticnao dâŋ gâcne fokac irec fuŋne qame hukicne. Eme dâŋ iŋucne i ŋic mutucne â biric borocne jaŋe musifuckeeŋgopieŋ. Erâ i ere papiare sawa mâcne, miti papia gâcnere mâmâc ehuc sisipiric maickeeŋgopieŋ. 17 Âgo biaŋfâc-nane, uŋdâŋ qanaŋ ŋazakicnere ŋic kosa jujune jaŋere mumusifuczi maŋŋeŋic bâŋgoroŋkeme dockenʒipiŋte sawaŋ-ŋeŋic qahuc junʒepieŋ. 18 Ehuc Wofuŋ â bâbâpiaŋ-nâŋec Jesu Kristo ere aki anonocko â fuŋne-ticne mana utuckehuc soka sanaŋ enʒepieŋ. E eri tatamac i ʒiŋuczia focnekac erâ juju sanaŋ dameŋko iŋuc jaha focne rahuc juzokac.