2
Yaluwa Tabuna yona huyalaoma mayadaina
1 Na kabo Pentekosi mayadaina ne unai* Pentekosi meta Dius yodi mayadai lakilakina hesau. Mayadaina ne unai Yaubada se lautokiyei kadi kai hesabana. Pentekosi kaniyona ede mayadai 50, iya ede Taukiuli Henuwaisinina mayadaina mulina ne unai. Pentekosi mayadaina unai bodalakilaki Yelusalema unai se bawabawa. meta taukawamamohoi maudoidi se lagegogoi numa kesega unai. 2 Makesega na dagugu lakilakina galewa ne unai ye dobima doha yaumailakilaki ye lotalu. Yodi kabamiya numana wa meta dagugu ye hemwayau. 3 Na ginauli hesau se kita kana kao doha kaiwa pulupululuna ye dobima na ye tatagwaligwali ede ye talu tamowai kesega kesega unai. 4 Na Yaluwa Tabuna maudoidi wa ye hemwayaudi na yona gigibwaliyena se hetubu kalina udoiꞌudoi udiyedi se hedehedede.
5 Na Pentekosi mayadaina hesabana ede tanoubu teha udoiꞌudoi udiyedi Dius tamowaidiyao* Dius tamowaidiyao kaniyona ede Abelahama kana isimulita, yo hinage ta wane Yaubada kana bodao iya ye kaimasiyedi wa. Yodi kabakita meta yodi tatao maudoidi ma gagilidi se hepelitomedi. Dius wa tanoubu maudoina tehana udoiꞌudoi udiyedi se miyamiya. se laoma Yelusalema, meta siya yodi laugagayo taumiyawatanidi ma nuwamaudoidi. 6 Huyana dagugu wa se lapui meta bodalakilaki se lagegogoi na tausunuma yodi hedehedede se lapulapuidi meta se nuwapwanopwano, matawuwuna ede taulaoma maudoidi kalinadi udoiꞌudoi udiyedi se hedehedede. 7 Siliyata yo nuwapwanopwanoyena se wane, “Teina tauhedehedede ta Galili tamowaidiyao. 8 Idohagi to maudoida ta lapulobai meta kalinada mamohoidi udiyedi se hedehedede? 9 Kita meta Patiya, Mediya yo Elama, Mesopotamiya, Yudeya yo Kapadosiya, Pontasi yo Eisiya, 10 Pilidiya, Pampiliya yo Aikupito tamowaidiyao. Hekadiyo Libiya tehana Sailini dedekanaena se laoma. Hekadi meta taumana Loma unai se laoma, 11 siya meta Dius yo hinage dagela tamowaidiyao se nuwabui na se patulau Dius bodadi udiyedi. Na hekadi meta Kiliti bwanabwanaluwana yo Alabiya tamowaidiyao. Na iyamo yodi hedehedede ta lapuidi meta kalinada udiyedi Yaubada yona laulau namwanamwadi se hededehemasalahadi.” 12 Na se noko, yo nuwadi se pwanopwano, na se bom se henahenamaiꞌuyoidi, “Teina meta kaniyona ede saha?”
13 Na hekadiyo meta taukawamamohoi wa se talatalawasiyedi se wane, “Tamowai ta nuwana se numa yauyaule!”
Petelo yona hedehedede Pentekosi mayadaina wa unai
14 Na kabo apostolo saudoudoi-kesega wa se tolo na kalina lakilakiyena Petelo ye hedehedede ye wane, “Yogu hali Dius, yo Yelusalema unai taumiya, kwa lapulapui na ginauli maudoidi ta kaniyodi kabo ya hededehemasalahadi. 15 Teina tamowai ta meta nige se numayauyaule matawuwuna ede teina ta meta sola ma malatomtomna. 16 Saha se masalaha kwa kitadi ta meta peloweta Yoela ye hededediko,
17 ‘Yaubada ye wane, “Mayadai gehegehediyao udiyedi kabo yaluwagu ya inidobiyei tamowai maudoidi udiyedi.
Natumiyao loheloheyao yo sinesineo kabo se hededepeloweta.* Hededepeloweta kaniyona ede Yaubada yona nuwatu ye mosei tamowai hesau unai, na kabo ye hededehemasalaha.
Yomi hewahewaliyo kabo tautau tabudi se kitadi.
Yomi tautaubadao meta kabo kenosuwai tabudiyao se kenosuwaiyedi.
18 Yo hinage kabo yaluwagu ya inidobiyei yogu heyayai tauginaulidi tatao yo sinesineo udiyedi na kabo se hededepeloweta.
19-20 Yada ne unai kabo laulau gigigigibwalidi se masalaha.
Mahana kabo ye masigili, na nawalai kabo ye bui doha kwasina.
Na kaiyaulina unai kabo hekihekinoi se masalaha,
meta kwasina, kaiwa, yo kasu lakilakina.
Mulina ne unai Guiyau yona mayadai wasawasana yo namanamalina kabo ye lage.
21 Na kaiteyadi se yogasae Guiyau unai, meta kabo ye gilihaidi.” ’ ” (Yoela 2:28-32)
22 Petelo yona hedehedede wa ye tubei ye wane, “Isalaela tamowaidiyao, kwa lapulapui! Komiu kabina kwa kata meta Yesu Nasaleta tamowaina laulau gigigigibwalidi* Laulau gigibwalidi ta meta kulikuli beyabeyadi wa udiyedi hedehedede haiyona udiyedi se kulihemasalaha. Na hedehedede haiyona ne meta kabikabi kesekesegadi se hetahetaladi. Bagubagunana ye kitalau gigibwali unai, iya ede laulau gigigigibwalina. Helabuina kaniyona ede taukaikewai wa se nokokalili. Yo hehaiyonana kaniyona ede hekihekinoi. ye ginaulidi kalimiuyena. Laulau wa udiyedi Yaubada ye hemasalaha yo ye hemamohoiyei meta iya Yesu ye hetamaliyama. 23 Teina tamowai ta meta Yaubada ye hineli yo ye kaisunuwanonohaiyako na ye mosegabaei kalimiuyena. Na komiu yomi nuwatuyena dagela tamowaidiyao kwa haidi na maidamiyao kwa hesataulo, na ye boita. 24 Na Yaubada iya ye gilihai boita unai na ye hetoloꞌuyoi, matawuwuna boita nige gonowana Yesu ye kabihekahini. 25 Dawida hinage Yesu hedehededena ye hedehedede ye wane,
‘Huya maudoina Guiyau ya kitakita.
Iya nimatutuguyena, unai nige gonowana ya matausi.
26 Unai nuwagu ye namwakalili, na ya hedehedede meta ma gwauyalagu,
yo taugu ta kabo hinage sunuma yo nuwabayao unai ye miya,
27 matawuwuna nige gonowana yaluwagu ta ku nuwagabaei boita magaina unai,
yo nige gonowana yom tamowai tabuna ku nuwagabaei na bwayabwayaena ye pwasa.
28 Mauli kedana wa ku hekitagauko,
na yau dedekam yena, kabo ku hegwauyalakaliliyeigau.’ (Same 16:8-11)
29 Kagu kahao, kabina ta katakalili meta kada kulutubu Dawida ye boita na se tole, na mayadai ta unai bwayabwayana ede yoda magai ta unai. 30 Dawida meta peloweta, na kabina ye kata Yaubada saha ye hededehesunuma yo ye kaigwala, meta kana isimulita tamowaina hesau kabo ye hemala wasawasa doha iya. 31 Ginauli saha kabo se tubu Dawida matana ne unai wa ye kitadi, na Keliso yona toloꞌuyo hedehededena ye hedede meta Yaubada nige iya ye nuwagabaei tauboiboita yodi magai* Tauboiboita yodi magai kaniyona ede tauboiboita yaluyaluwadi yodi kabamiya, kalinadaena hesana ede Biula. unai, yo tauna nige se pwasa bwayabwayaena. 32 Yaubada Yesu ye hetoloꞌuyoi boita unai, na kai maudoimai meta tauhemamohoiyena ede. 33 Na iya ye seuyoko Yaubada nimatutunaena ye tuli, na tamana yona hedehededehesunuma Yaluwa Tabuna ye hai. Na teina saha kwa kita yo kwa lapui ta, meta Yesu Yaluwa Tabuna ne ye inidobiyeiyama kalimaiyena. 34 Na Dawida meta nige ye sae galewa, na iyamo ye hedede ye wane,
‘Guiyau Yaubada ye hededelau yogu guiyau unai,
“Nimatutuguyena ku tuli,
35 ye lau ee kam waiunu ya toledi kaem guninaena,
se hemala kaem kabatoledi.” ’ (Same 110:1)
36 Unai, Isalaela tamowaidiyao maudoimiu bena kwa nuwatulobainamwanamwai meta Yesu kwa hesatauloꞌusei wa meta Yaubada ye kaisunuwaei iya Guiyau yo Keliso.”* Keliso kaniyona meta Yaubada yona kaisunuwa tamowaina, iya ede tamowai maudoidi taugilihaidi yo tausaguidi, yo iya meta tamowaina Dius tamowaidi se nayanayaeiꞌusei wa.
37 Hedehedede wa se lapuidi ede se nuwagwali na se henamai Petelo yo apostolo hekadiyo wa udiyedi se wane, “Kama kahao, saha kabo ka ginauli?” 38 Kabo Petelo ye hededelau udiyedi ye wane, “Kesega kesega bena ku nuwabui yo ka hebabatisoigo Yesu Keliso hesanaena, unai kabo Yaubada yom yababa ye nuwatugabaedi, yo yona kainauya Yaluwana Tabuna kabo ku hai. 39 Teina hedehededehesunuma ta Yaubada ye haiyawa komiu yo natumiyao yo dagela tamowaidi, yo kaiteyadi siya hinage Guiyau yoda Yaubada kabo ye yoganedi meta siya yodi.”
40 Na kabo Petelo hedehedede hekadiyo udiyedi ye guguyaidi ye wane, “Kwa nuwabui yo Yesu kwa sunumaei, kabo teina tamowai yabayababadiyao ta udiyedi ye gilihaigomiu.” 41 Mayadaina ne unai meta bodalakilaki Petelo yona hedehedede wa unai se kawamamohoi na siya se hebabatisoidi, na badodi ede 3,000 se lusae ekalesiya bodana unai. 42 Se patulau taukawamamohoi wa udiyedi na se hebodakesega. Se lapulapui apostolo yodi lauhekata wa udiyedi yo se koikoigogoi, yo Guiyau yona kaikaigogo henuwaisinina unai se kaikaigogoi, yo se tapwatapwalologogoi.
Taukawamamohoi se hebodakesega
43 Apostolo wa laulau gigigigibwalidi yo hekihekinoi kadi kao udoiꞌudoi se ginaulidi. Unai tamowai maudoidi Yaubada se matausiyei yo se hededetausaei. 44 Taukawamamohoi wa se lagelagegogoi na yodi gogo se kaikainauyaꞌuyoidi. 45 Yodi gogo yo yodi tano hekadiyo se lokunegabaedi na monidiyao se haidi na kadi boda wa unai tamowai hekadiyao se saguidi. 46 Mayadai kesega kesega se lagelagegogoi numa tabuna bakubakuna unai. Yo hinage yodi numa udiyedi Guiyau yona kaikaigogo henuwaisinina se ginauli, yo se kaikaigogoi ma gwaugwauyaladi yo ma nuwadobidobidi, 47 yo Yaubada se hedehedebasaei. Na boda maudoidi taukawamamohoi wa se kitahenamwadi. Na mayadai maudoina Guiyau tamowai ye gilihaidi na ye tolelaedi ekalesiya bodana wa unai.
*2:1: Pentekosi meta Dius yodi mayadai lakilakina hesau. Mayadaina ne unai Yaubada se lautokiyei kadi kai hesabana. Pentekosi kaniyona ede mayadai 50, iya ede Taukiuli Henuwaisinina mayadaina mulina ne unai. Pentekosi mayadaina unai bodalakilaki Yelusalema unai se bawabawa.
*2:5: Dius tamowaidiyao kaniyona ede Abelahama kana isimulita, yo hinage ta wane Yaubada kana bodao iya ye kaimasiyedi wa. Yodi kabakita meta yodi tatao maudoidi ma gagilidi se hepelitomedi. Dius wa tanoubu maudoina tehana udoiꞌudoi udiyedi se miyamiya.
*2:17: Hededepeloweta kaniyona ede Yaubada yona nuwatu ye mosei tamowai hesau unai, na kabo ye hededehemasalaha.
*2:22: Laulau gigibwalidi ta meta kulikuli beyabeyadi wa udiyedi hedehedede haiyona udiyedi se kulihemasalaha. Na hedehedede haiyona ne meta kabikabi kesekesegadi se hetahetaladi. Bagubagunana ye kitalau gigibwali unai, iya ede laulau gigigigibwalina. Helabuina kaniyona ede taukaikewai wa se nokokalili. Yo hehaiyonana kaniyona ede hekihekinoi.
*2:31: Tauboiboita yodi magai kaniyona ede tauboiboita yaluyaluwadi yodi kabamiya, kalinadaena hesana ede Biula.
*2:36: Keliso kaniyona meta Yaubada yona kaisunuwa tamowaina, iya ede tamowai maudoidi taugilihaidi yo tausaguidi, yo iya meta tamowaina Dius tamowaidi se nayanayaeiꞌusei wa.