1 Foron tualik kemtuul, gam tom gam usum le kiis kimemtuul aga tura gam, biil i tier foes, i mel tom e fua. 2 Gam usum le, aunbiing biil biitom kemtuul la ugapiek usuf gam, fanu ri falaulau ta kemtuul ma ri ka famatlawen kemtuul na maleh na Pilipai. Isau le na falupes ke God kirer, kemtuul ka foim rakrakai tom isi le kemtuul en fas gam ini Rokap na Fafas kia, ma biil kemtuul soke fanseh ae ri tapiek arae foron tuui kimemtuul. 3 Aunbiing kemtuul fas gam isi kiliis liu, foron orek kimemtuul biil i to ger, ma biil kemtuul orek ini ti wolwol laulau, ma biil sabin kemtuul fambal gam. Biil. 4 Isau le kemtuul fafas ini Rokap na Fafas, wara le God i tof ta kemtuul, ke ka unune tah lo kemtuul isi le kemtuul en fafas. Aunbiing kemtuul fafas, biil una falaes fanu sau, biil. Kemtuul fafas isi God tom ae i tof balmemtuul la, in laes ini. 5 Gam usum le biil kemtuul falaes gam ini foron mot na orek, ke biil kemtuul ram kum na ti foron tier sing gam, biil. God tom i par u ma ka usum lo kemtuul. 6 Biil kemtuul im isi ususefages sing fanu, le sing gam le sing tikas awii.

7 Ifasih le kemtuul en sising gam isi ti falupes, wara le kemtuul foron aposel ke Karisito. Isau le biil kemtuul tel u arae. Kemtuul kiis fofo na fatpoto gam, arae nenge fifin i fofonoi na berberat kia. 8 Kemtuul ier kanaka isi gam ke kemtuul ka laes kanaka isi kemtuul en fafas ini Rokap na Fafas ke God. Biil kemtuul laes sau isi fafas usuf gam, kemtuul laes sabin isi kemtuul en ta liu kimemtuul usuf gam, wara le gam laumet kanaka na matmemtuul.

9 Foron tualik kemtuul, gam ka usum tah na foron rakrakai na foim kimemtuul. Kemtuul foim tah na wor ke na siat ke kemtuul ka songsong na olon foron foim ae kemtuul tel u. Kemtuul ka foimnge pitkalang kimemtuul tom, isi biil kemtuul en ta tatawin isi gamen fofonoi lo kemtuul, aunbiing kemtuul fas gam ini Rokap na Fafas ke God.

10 Gam tom, ke God sabin, gam ka par ta liu kimemtuul na fatpoto gam foron tom unune. Liu kimemtuul i kalkaluu ma i tortores, ma biil i fasih tikas in tiu kemtuul ini ti tier. 11 Gam usum le foron sinangu kemtuul usuf temtem tikii lo gam i arae sinang ae nenge kaltu i tel u la usuf berberat kia. 12 Pesu kemtuul ka farakrakai gam ke kemtuul ka famor gam ke kemtuul ka fas gam sabin isi gamek liu ini matngan liu ae in falaes God, ae i kam pes ta gam una matanfuntih kia ke memeh kia.

13 Ke kemtuul fot rokap la sabin usuf God, wara le aunbiing gam posefat na orek ke God ae gam ongen ta u sing kemtuul, ke gam ka somangat pes u. Biil gam somangat pes u arae orek ken fanu sau, biil. Gam somangat pes u, wara le i e orek ke God tom. Foron orek ae i foim na liu kimi ae gam unune. 14 Foron tualik kemtuul, gam arae foron tom unune lo Iesu Karisito ae ri kiis na foron maleh tikii na Iudaia. Wara le gam sabin gam ngar ta fangungut sing foron fanu tina maleh kimi tom arae foron tom unune na Iudaia ri ngar ta fangungut sing fanu kiri tom. 15-16 Fanseh ae ri siimete ta Iesu Kumguui ke foron poropet, ke fanseh ae ri fes ufu ta kemtuul sabin. Ri tof u le rin ti kale kemtuul isi gong kemtuul fafas usuf fanu ae biil ri fan Iudaia isi God gong i faliu ri. Aunbiing ri tel u aragii, God biil i laes ini ri, ma ri kiis arae foron tuui turan fanu tikii. Ke matngan sinangu ri aragii, ri ka luun turim foron sinang laulau kiri. Tipes u aiwa, ngaliaf ke God ka la usuf ri.

17 Foron tualik kemtuul, kiis sararah kirer biil i sawin, aunbiing fan Iudaia ri fes ufu ta kemtuul koseng gam. Kere kiis sararah sau na pununfo kerer, isau le foron wolwol kirer, kemtuul wol la tom lo gam. Kemtuul ier kanaka isi par gam, pesu kemtuul ka foim rakrakai isi le kemtuul en tel fasuut u. 18 Kemtuul ier kanaka isi le kemtuul en fis usuf gam. Iau Pol, fafuun ia ka totof tah isi le ian la usuf gam, isau le Satan ka ti kale kemtuul tikii. 19 Kemtuul ier kanaka le kemtuul en par gam sabin, wara le kemtuul unune lo gam le gamen tifat aunbiing Iesu Kumguui kirer in fis ma kerek sotih na mata. Ke gam e kamtinan laes kimemtuul. Ke i wara lo gam, pesu i fasih kemtuul ek lala laes ini foim kimemtuul na biing ae. 20 Tekentu kanaka, gam tom foron memeh kimemtuul turan laes kimemtuul.