1 Tanwa Kalkaluu i famalal u le, na farfarop na aunbiing, fal e fanu rin ta pokta ri una foron orek tekentu ke God, ma rik mi na foron tanwan famfabal ke na foron fafausum ken foron tanwa laulau. 2 Foron fafausum ae, i la sing foron tom famfabal ae biil mang tom i fasih rin iliim sinang rokap ke sinang laulau, wara le rokap na wolwol kiri ka rop tah, arae i sok tah na yiif. 3 Ri fausum fanu le gong ri fakekel, ke gong ri ien ti fal e matngan inen. Isau le God i fakiis ta foron inen igii isi fanseh ae ri unune ma ri usum na tekentu, rin fotrokap lo, ke namih rik ien u. 4 I tekentu kanaka, wara le foron tier tikii ae God i fakiis ta u i rokap. Biil ifasih keren soke ufu ti tier. I rokap le keren somangat pes u ini fotrokap usuf God. 5 Wara le orek ke God turan sising, i fakalkaluu foron inen ae, na mata God.

6 Male on fausum foron tuamlik na asa Iesu ini foron tier igii, on tapiek nenge rokap na tom foim ke Karisito Iesu, ke on posefat na tekentu na unune, ke rokap na fafausum ae o ka mi ta lo. 7 Fin koseng foron titiipapah foes ke foron ususe ae biil ifasih rin lupes o. Isau le on falasan wo tom isi on mi na foron sinang ae i rokap na mata God. 8 Male kere falasan pununfo kerer isi keren filau rokap, ke in farokap kerer sau na fatuklin aunbiing. Isau male keren falasan kerer isi mi na sinang ae i rokap na mata God, ke in farokap kerer na foron tier tikii, in farokap kerer na liu igii, ke na liu sabin ae namih.

9 Orek igii ia use u i tekentu kanaka, ma keren unune lo. 10 Kere foim la ke kere ka totof rakrakai la, wara le kere nene ini unune lo God ae i liu, i e Tom Fafaliu ken fanu tikii. In faliu pes fanu tikii ae ri unune lo.

11 On fausum ri ke ok farakrakai ri ini foron tier igii. 12 Gong o somangat pes tikas isi in puris o wara le o guam, isau le on tapiek nenge rokap na tintof na matan foron tom unune na orek kiam, na sinangum, na famais kiam, na unune kiam ke na liu kiam ae i kalkaluu. 13 On wes mulmul Buk na Gogoh usuf fanu, ke ok fafas, ke ok fausum ri papang na biing ian tapiek. 14 Gong o wol fofoes na fafen ae Tanwa Kalkaluu i ta ta u usuf o, aunbiing foron famfamu na lotu ri luun ta limri na olom, ma ri ka sising, ke ri ka orek poropet tah ulo wo.

15 On foim rakrakai ke ok ta tikii liu kiam una foron tier igii, isi fanu tikii rik par liu kiam lo God i kuum lalala. 16 On fofonoi rokap na sinangum ke na fafausum kiam. On posefat na iun tier igii. Male on tel u arae, ke on faliu wo tom turan fanseh sabin ae ri ongen o.