1 Aunbiing o ier isi fatortores nenge kaltu ae i pang famu lo wo, gong o orek ngaliaf ulo. On faorek u sau arae i nenge tamam, ke foron guam arae foron tuamlik. 2 Ke on fatortores kelefin ae ri pang famu lo wo, arae le ri foron tinam, ke on fatortores foron tah arae le ri foron fenemlik, ini sinang ae i kalkaluu.

3 On lupes foron makos ae biil tom tikas una lupes ri. 4 Isau, male nenge makos i mel e berberat kia ke foron tubufifin, ke i rokap le rin finngas famu unune kiri usuf foron fanu lo ri, isi rik kiliis fafis fofonoi ken foron temri ke foron tinri, turan foron tubufifin ri. Wara le matngan sinang arae in falaes God. 5 Male nenge makos i kiis keskes tom ma biil tikas una fofonoi lo, i unune ma ka nene isi God sau in lupes u, i sising mulmul la na foron wor ke na foron siat tikii isi God in lupes u. 6 Isau le foron makos ae ri ier la sau isi rin falaes pununfo ri, tanwa ri ka met tah aunbiing ri liu biitom. 7 Ke, on ta rakrakai na orek igii usuf ri, isi biil tikas in tiu ri ini ti orek. 8 Male tikas biil i fofonoi lon foron sikinting tom lo, turan fanu tutus tina matanfel kia, ka la koseng ta tekentu na unune, ma i laulau kanaka lon fanseh ae biil ri unune.

9 Gong o siit asan ti makos turan foron makos una kep falupes, male biil biitom i won e sangful e bet kia. On siit asan makos sau ae i tel pes ta i tikii sau e kaltu, 10 ke ae fanu tikii ri usum na foron rokap na foim kia le i fofonoi rokap na berberat kia, ke i somangat pes foron ses la una matanfel kia, ke i sufe keken fanu ke God la,* Sinangun fan Iudaia i aragii, male foron ses ri tapiek, ke fafauun in sufe ufu piyiif tina kekri. ke i lupes fanu la ae ri fatafe ini tatawin, ke i ta liu kia la tom isi in tel foron rokap na foim.

11 Gong o siit asan foron makos, male biil biitom i won e sangful e bet kiri. Wara le aunbiing wolwol ken pununfo in rakrakai, rik ier mang isi fakekel, ke rik ta pokta ri ulo Karisito. 12 Aunbiing rin tel u arae, ke rik sotih na nagogon, wara le ri ka lek ta falimlim famu kiri tura Karisito. 13 Biil i sau ae, ri famam muduung sau na soleng foron matanfel. Ma nenge tier sabin, ri foron tom orek kumkum ma ri fakau paklu ri la sau na tier ken fal e fanu keskes, ma ri ka use foron tier ae biil i fasih le rin use u. 14 Pesu ia ka fas foron makos ae ri rakrakai biitom le rin fakekel sabin, rik fafang ma rik fofonoi na matanfel kiri, isi rik tikale foron tuui kirer isi biil rin use falaulau kerer. 15 Ia use u arae, wara le fal ri ka tamikis tah ma ri ka mi lo Satan.

16 Male nenge fifin ae i unune ma imel e nenge makos na matanfel kia, i rokap le in lupes u isi gong i ta tatawin usuf foron tom unune, isi i fasih rik lupes foron makos sau ae biil tom tikas una lupes ri.

17 Foron famfamu na lotu ae ri tel fakasi foim kiri, i fasih rin fafen fifiil kiri. Ma i tekentu kanaka ulon fanseh ae ri foim rakrakai na fafas ke tel fafausum. 18 Wara le Buk na Gogoh i tara aragii, “Gong o kabet ngusun bulmakau aunbiing i famam fose ufu punun wit, isi i sabin ik ien.”† Par Lo (Deuteronomy) 25:4 Ke nenge orek sabin i tara aragii, “I tortores le seh i foim, in kep fifiil kia.”‡ Par Luk 10:7 19 Gong o ongen pes orek ken i tikii sau e kaltu, aunbiing i tiu tikas e famfamu. Male in u le in tuul e kaltu rituul tiu u, ke ok somangat isi ongen orek kirituul. 20 Ke foron famfamu na lotu ae ri tel sinang laulau, gamen fatortores ri na matan fanu tikii, isi fal sabin rik sokeh isi tel sinang laulau.

21 Ia ta rakrakai na orek igii usuf o, na mata God ke Karisito Iesu turan foron angelo ae i tim pes ta ri, le on posefat na foron orek igii. Gong o lala nagogon fal, ma fal biil. Ke gong o lala ier sau isi fal, ma fal biil.

22 Gong o luun sape iun limam na olon nenge kaltu isi in tapiek nenge famfamu. Tarama sinang laulau ken fal e fanu ka tus lo wo. On fofonoi na liu kiam ae i kalkaluu.

23 Gong o umin dan kanan sau, on umin in tuul sabin e wain, una lupes balam ke una sasem ae o sem u la.

24 Sinang laulau ken fal e fanu i kiis na malmalal, famu na aunbiing ae rin ti na nagogon. Isau le sinang laulau ken fal e fanu ae i kiis mumun tah, namih in tapiek na malal. 25 Ifasih sau arae foron rokap na sinang. Fale rokap na sinang ka kiis tah na malmalal, ma fal ae biil biitom ri kiis na malmalal, biil tom ifasih le rin kiis mumun.