1 Pesu, foron tuaklik, gamen tifat arae lo Kumguui. Ia use u aragii usuf gam, fanseh ae ia ier kanaka isi gam. Ma ia ier kanaka le ian par gam. Gam foron rokap na talang, gam falaes iau, ke liu kimi i arae fifiil una foim kiak.

2 Ia sising Ewodia kamuh e Sintike le in tikii sau e wolwol kimuh, wara le kamuh ke Kumguui. 3 Ma ia sising o sabin, o tikiin foim tekentu kiak, le on lupes iun fifin ae, wara le ru foim rakrakai ta turang ini Rokap na Fafas. Ru foim rakrakai ta tura kama e Kelemen ke foron tikiin foim tikii kiak, ae asri ka kiis ta na Buk na Liu.

4 I rokap le gamen laes lamasau na kiiskiis kimi lo Kumguui. Ma ian use u sabin le, gamen laes. 5 Gamen fofo ini fanu tikii, isi rik par sinangu gam. Kumguui fatat in fis. 6 Gong gam lala wol na ti tier, isau le na foron tier tikii, gamen sising ke gamen fas God ini sanih gam ier isi, ma gamek sising an fotrokap usuf i. 7 Ma siaroh ke God, ae i laumet kulkulef na tasum ken fanu tikii, in fofonoi na liu kimi, ke na wolwol kimi tikii na kiiskiis kimi lo Karisito Iesu.

8 Foron tuaklik, igii e farfarop na orek kiak usuf gam: Wolwol kimi in kiis na foron tier ae ri rokap, ke foron tier ae keren ususefages ulo. Gamen wol na foron tier ae i tekentu, ke foron tier ae keren bulat lo, ke foron tier ae i tortores, ke foron tier ae i kalkaluu, ke foron tier ae i rokap kanaka, ke foron tier ae i mel e memeh lo. 9 Sanih ae ia ka fausum ta gam ini, ke gam ka kep ta u, ke gam ka ongen ta u, ke gam ka par ta u na liu kiak, gam sabin gamen mi lo arae. Ma God ae i ta siaroh la in kiis tura gam.

10 Ia laes kanaka na kiiskiis kiak lo Kumguui, wara le gam ka wolpes iau sabin. Ia usum le gam wol la lo iau, isau le biil ti sal kimi isi gamen lupes iau. 11 Biil ia orek aragii wara le ia bilbiling. Biil. Ia ka usum ta le ian laes la tom, taftawa matngan tier arafah ia fatafe tura. 12 Ia ka lasan ta aunbiing ia bilbiling, ke ia ka lasan ta na aunbiing ifuun e minmarang. Ia ka usum ta le ian laes la tom, taftawa male ia mas le ia fitol, ke male ia lauu le ifuun e minmarang. 13 Ifasih ian tel foron tier tikii, wara lo Karisito ae i ta rakrakai la sing iau.

14 Isau le, i rokap sabin gam ka ti turim turang ta na foron tatawin kiak. 15 Gam fan Pilipai, gam ka usum ta na aunbiing ae ia fafas ta ini Rokap na Fafas na falifuh na Masedonia, ke gam ka kiliis liu ta kimi. Gam usum le aunbiing ia la koseng Masedonia, biil ti fal e tom unune sabin ri fatal ta iau na sinangun fafen faliu. Biil. Gam keskes sau. 16 Aunbiing ia kiis ta na Tesalonika, biil gam fen iau na i tikii sau e aunbiing, isau le gam fen mulmul iau, aunbiing ia bilbiling isi fal e tier. 17 Gong gam wol le ia im isi ti fafen sing gam. Biil. Ia ier isi in mel e fafakalok na liu kimi. 18 Ia ka kep ta foron fafen tikii kimi, ae Epafroditus i filange u usuf iau. Ma foron fafen kimi, i laumet kanaka tom na foron tier ae ia bilbiling isi. Foron fafen tikii kimi ae, i arae fafen usuf God ae i furung rokap, ma God i somangat pes u ini laes. 19 God kiak in tel fasuut foron tier tikii ae gam bilbiling isi, tina foron rokap na minsik kia, wara le gam ke Karisito Iesu.

20 Keren usefages God Tama kerer fitliu, ma biil ti farfarop lo. Amen.

21 Gamen faorek pes fanu ke God na asa Karisito Iesu. Foron tualik kerer sabin igii turang, ri ta orek an famais kiri usuf gam. 22 Fanu tikii ke God ri ta orek an famais kiri usuf gam. Ke fanu tikii sabin na fel ke Sisar ri ta orek an famais kiri usuf gam. 23 Famais ke Kumguui kirer, Iesu Karisito in kiis na tanwa gam. Amen.