1Unuimata duka senchi untsumui;

yachameta nunú niina chichamen

antumtikagtawai.

2Nain aidaunum,

jinta amatkau aidaunum,

3tuja waiti aidaunum,

yaaktanum waitainum wajas untsumak:

4“¡Ashí aents aidautigmin juna tajime!

5Datsauch jintiag anentaimkachu aidautigmesh

shiig anentaimkau atajum;

tuja atum shiig anentaimkachu aidautigmek,

eseja anentaimat unuimagtajum.

6Pegkeg unuimamainun

wi titatjim nunú shiig antuka jukitajum.

7Wi titatag duka dekaske;

minak waitjutak shiig awajtuchui.

8Mina chichamjuk ashí pegkejai;

wika jimag weninnuchuitjai.

9Aents shiig anentaimkauwa

nunú diismak mina chichamjuk dakitmainchau

paan antumainai.

10Plata jumain idaikujum,

dekas wi jintiamua nunú jukitajum,

tuja oro shiig pegkeg jumain idaikujum,

dekas unuimata nunú jukitajum.

11Unuimata duka kaya pegkejuch aina

nuna nagkaesauwai.

Tuja waji pegkeg wakemain ainakush,

makichkish unuimatjaig betekchauwai.

12Witjai dekatnuk,

witjai chicham pegkejan sukagtinnuk,

tuja wi dutikatag takunuk

shiig anentaimsan dutikajai.

13Tuke Pujuun umija duka

pegkegchau takat aina nunak kajejawai.

Tuja ememamu,

tikich wagagkau anentaimat, pegkegchau takat,

waitjut aina nunak wika kajejajai.

14Chichagkagtut, pegkegnum anentaimat,

yachamet, unuimat aina duka midau ainawai.

Tuja senchia dushakam midauwai.

15Wi nunikti tibau asag apu wenawai,

nuninak chicham umiktin

dekas pegkeg aidaun najanainawai.

16Ashí apu nugkanum inamin aina duka,

wi nunikti tibau asag inamainawai.

17Tuja mina anentuidaunak

wishakam dutiksanuk aneajai,

tuja mina egatuidaunashkam wantintajai.

18Wiakchamet, eme anentam ata,

shiig pujut, waji wamak megkaejashtin

aina nunashkam wi suwajai.

19Wi sukagtamua duka

oro pegkeja nuna nagkaesauwai,

tuja wi sukagtamua duka

plata akiken nagkaesauwai.

20Wika tuke pegkejan takauwaitjai,

21nuniau asan mina anentuidaunak,

kuashat wajigtin wiakuch emajai.

22“Tuke Pujuu minak najatuawai.

Nii najankamu aina nunak

eke najantsuk miná najatuawai.

23Tuja nugkanak eke

najantsuk miná najatuawai.

24Mina najatuawa nuaduik

nayantsak atsujakui,

tuja yumi pukuni jiinaidaush,

namak aidaush atsujakui.

25Tuke Pujuuk muja aidaun, nain aidaun

eke najantsuk miná najatuauwai.

26Tuja nugkanak ikam aidaunash,

nuigtu nugka yukukuntujai nugkan najankauwa

nunakesh najantsuk miná najatuauwai.

27Apajuí nayaimpin yumi

piyajunum eneknak najanauwa

nuaduik wika pujuyajai.

28Tuja yakí agkajunum yujagmin najana umika,

nayantsan initken yumi pukuni jiinaidaun epetug,

29nayantsanum yumi piyag betsakai tusa emetug idayak,

tuja nugka buchitmainchau

atinun umikua nuadui nagkamsan,

30wika Apajuí takakui,

niijai takakun pujuyajai.

Wi ayajai niina shiig anemtikin,

tuja niina emtinig shiig aneasan

wasugkamkun pujuyajai.

31Apajuí nugka najanamun

diisan shiig aneyajai,

tuja nii aentsun najanauwa nuna

diisan shiig aneamu ajuti.

32“Nuadui uchig aidauwah,

wi tajim nunú antugtuktajum:

Wi tajim nunú umiakjumek,

Apajuí yayaam atinaitjume.

33Wi jintinjim nunú dakittsuk

shiig unuimagtajum,

nuniakjum shiig anentaimkau atajum.

34Aents kashi kashinig mina jegajui taa

mina chichamjun antugtauk shiig aneastinai,

wagki Apajuí yayamu asa.

35Mina igkuntuk pujutan juwawai,

nunik Tuke Pujuu wait anentam awai.

36Tuja mina pegkegchaun chichagtauk

jaka megkaetanum pujawai.

¡Tuja mina kajegtuina duka

jaka megkaetan aneenak núninawai!”