1Moromeĩpo tõturupose Tawi Ritonõpo a:

— Kure oya jytory pata pona, Juta nonory pona tuisame ehtohme? tykase.

— Ỹ ytoko, tykase Ritonõpo.

— Oty pona ytõko ha? tykase, tõturupose Tawi.

— Eperõ pona, tykase.

2Naeroro Eperõ pona toytose Tawi typyxiãkõ maro asakoro: Ainoã, Jezereu pono te, Apikaiu, Napau Karameru põ pytỹpyry, enara. 3Tymarõkõ roropa tarose Tawi a, toto tapyĩ taõkõ maro. Mame tõsesarise toh nexiase pata tõ po Eperõ pũto. 4Mame orutua kõ Juta põkõ toytose Eperõ pona, Tawi tyrise eya xine tutuisarykõme, Juta tõ tuisaryme.

Mame Sauu tõ ekepyry tonẽse Jape-Kireate põkomo a. Moro poko turuse Tawi ahtao, 5typoetory tõ taropose eya Jape-Kireate põkomo a oturuse:

— Kure rokẽ oriporykõ se ase Ritonõpo a Sauu tõ pyno oexirykõke, ekepyry tonẽse oya xine exiryke! 6Naeroro opyno xine Ritonõpo ehtoh se ase, oewomarykõ se roropa! Ywy roropa isã opyno xine se ase onyrihpyrykõ pokoino. 7Morara exiryke enaromyra ehtoko, ajamihtatoko! Sauu, otuisarykõ toorihse, seromaroro Juta tomo a tymenekase ywy tutuisarykõme jehtohme.

8Sauu poetory, soutatu tõ esẽ Apinea, Nea mũkuru, toepase kynexine Ixiposete, Sauu mũkuru maro pata Maanaĩ pona, tuna Joatão mõpozakoxi. 9Moroto tuisame Ixiposete tyrise Apinea a, Kireate nonory esẽme te, Asea maro te, Jezereu roropa te, Eparaĩ maro te, Pẽjamĩ roropa te, Izyraeu tõ emero esẽme ehtohme. 1040me jeimamyry nae Ixiposete, Sauu mũkuru nexiase, Izyraeu esẽme toehse ahtao. Mame asakoro jeimamyry taropose eya tuisame toexiry poko. Yrome Juta tomo a Tawi tyrise tutuisarykõme, 11toerohse ynororo Eperõ po 7me jeimamyry zokonaka, Juta tõ esẽme.

12Mame Apinea, Nea mũkuru toytose, Ixiposete poetory tõ esã maro, Maanaĩ poe pata Kipeão pona. 13Joape, Zeruia mũkuru toytose, Tawi poetory tõ esã maro, oseporyse imaro xine Kipeão tunary pũtokoxi. Apinea marõkõ typorohse tuna pũtokoxi, Joape marõkõ tuna moino akoxi typorohse toto, mokaro etonie. 14Mame ynara tykase Apinea Joape a:

— Kure ya nuasemãkõ osetapary pixo kymarokõ neneryme, tykase.

— Kure roropa ya. Ah nosetapã toto, tykase Joape.

15Naeroro towõse toto xikihme etonatohme, 12me Pẽjamĩ pakomo, Ixiposete, Sauu mũkuru poetory, 12me roropa Tawi poetory. 16Mame osetonie exikety zupuhpyry tapoise eya xine. Mame tuose eya xine aoropary zehpyry aka rato pohsuimã ke. Oximaro toepukase toorihse toto. Naeroro moroto tosehpase Rato Pohsuimã kõ esaryme.

17Moromeĩpo tõsetapase toto yronymyryme, mame Apinea poetory tõ typoremãkase Tawi tomo a. 18Mame Zeruia mũkuru tõ oseruao moroto nexiase. Joape te, Apisai te, Asaeu, enara. Mokyro Asaeu axĩ tururume ytokety nexiase, kapauimo samo. 19Apinea tokahmase eya, tururume etapatohme repe, eramara roropa nexiase. 20Mame tỹkakoxi tõsenuhmase Apinea ahtao tõturupose eya:

— Omoro hma Asaeu? tykase.

— Ywy ase, tykase Asaeu.

21— Jekahmara ke exiko, tykase Apinea. Imepỹ apoiko nuasemano imõkomory apoitohme oya, tykase.

Yrome Asaeu onurumekara nexiase. 22Turuse ropa Apinea a:

— Epo hnae! Kurumekako! Oetapary se pyra reahse! Otara ãko ha orui a oetaparyhtao ya? tykase.

23Yrome Asaeu irumekary se pyra nexiase. Naeroro Asaeu wakuru typosohkase warata ãtykyry ke. Tutũtase warata ĩpary ae. Moroto toepukase ynororo, toorihse. Totypohse toto emero morotona toeporehkase toto ahtao, Asaeu ekepyry eneryke tyya xine.

24Yrome Apinea tokahmase irui tomo a, Joape a te, Apisai a, enara. Mame kohmãsasaka ahtao ypy Ama pona toeporehkase toto, pata Kia poe xixi tũtatoh wino, ona Kipeão esemary po. 25Pẽjamĩ põkõ tõximõse toto Apinea akorehmatohme ypy emory po. 26Mame Joape tykohmase Apinea a. Ynara tykase ynororo eya:

— Epo hnae osetapary poko. Osetapakehpyra kuahtao xine osenahkãko mã toto emero. Otara ahtao opoetory tõ etypohkapõko mah tyekyry tõ ekahmary pohko? tykase Apinea.

27Ynara tykase Joape eya:

— Oturupyra awahtao tyekyry tõ onetapakehpyra toh exiry kokoro ẽmehtoh ponãmero, tykase.

28Naeroro rueimo totose Joape a. Mame totypohse toto emero. Izyraeu tõ onekahmara toehse toto. Tõtuokehse toto.

29Mame Apinea tõ tõmehse toytorykõ poko jakanahmã Joatão kuroko. Tuna Joatão takuohse eya xine, mame toytose ro toto tosaka xine, Maanaĩ pona. 30Mame Joape tõ toehse ropa, Apinea ekahmakehxĩpo. Typoetory tõ tanonohpose eya, toto kuhtohme. Asaeu maro 20me toorihse, Tawi poetory tomo. 31Yrome Tawi tomo a 360me totapase Pẽjamĩ põkomo, Apinea poetory tomo. 32Mame Asaeu ekepyry tapoise eya xine zonẽtohme jumy ekepyry zonẽtoh tao, Perẽ po. Mame toytorykõ poko tõmehse toto Joape tomo, Eperõ pona toeporehkase ropa toto ẽmepyryme.