1Ritonõpo a juãnopyry waro ase, sam tykamexipose jexiryke eya, zehno ahtao.

2Jaropoase ynororo ikohmamyry aka,

osema tõ ae jenyokyase saerehkatoh maro pyra.

3Tomary ke typitypipohse ywy eya ikohmamyry pona.

4Kynykynyme upũ tyripose eya,

ypihpyry roropa yzehpyry tõ tytahkase eya.

5Jomye apuru tyrise eya,

tapuruse ywy jetuarimatoh ke, sam katoh ke, enara.

6Xinukutumã aka tyripose ywy eya koko samo, aorihtyã sã jehtohme okynahxo.

7Keti ke tymyhse exiase omoxinety ke Ritonõpo a;

ãpuruhpyry tao ase, epasaromepyra roropa ase.

8Kohtãko ase jakorehmatohme repe,

yrome jotururu etary se pyra mã ynororo.

9Ytosaromepyra ase;

jesemary tapuruse exiryke eya topu konõto ke.

10Reão sã jeraximãko Ritonõpo mana,

uuso sã roropa toehse mana jeraximãko, jesekatohme.

11Jesemary poe taropose ywy eya,

tyxihxihkase ywy eya,

imeĩpo turumekase ywy eya.

12Taky tapoise eya,

typyre ke tuose roropa ywy eya.

13Moro pyrou tõ, Ritonõpo nuotyã mya tomõse kehko nexiase upũ aka.

14Ahno ypoihtory poko kohmãnõko mã toto;

jeunohnõko mã toto toremiaryhtao kokoro rokene.

15Tonahsẽ itunety ke tynahpase ywy Ritonõpo a ise pyra jehtoh ke,

tauhpase sã ywy eresukuru ke eya onẽzomopyra jehtoh ke.

16Jẽmyty tõsykysykymapose eya nono poro,

yzery tytahkase eya topu tõ pokona.

17Sekese jehtoh waro pyra toehse ywy,

tãkye ehtoh poko tuenikehse ywy pake.

18Okynã pyra orihnõko ase;

Ritonõpo eraximary poko ya jakorehmatohme tonahse nase.

19Wenikehpyra ase jemynyhmary poko, toiroro jehtopõpyry poko, sam katoh poko ya te, jetuarimatopõpyry poko roropa.

20Morohne poko osenetupuhkehpyra ase,

tapotũkehse ywy ukurohtao.

21Yrome jakorehmary Ritonõpo a eraximapitõko ropa ase ynara josenetuputyryhtao ya rokene:

22Kypyno xine Ritonõpo ehtoh enahpỹme mana.

Kure aexiry jũme enahpỹme roropa mana.

23Moro kypyno xine aehtopo te, kure aexiry roropa kasenatome mana ẽmepyry punero.

Imehxo mase, Ritonõpo,

anamonohpyra roropa mase xixi tũtary ropa samo!

24Ypyno exiketyme Ritonõpo mana.

Imepỹ pyra mã jesẽme.

Naeroro oenetupuhnõko ase.

25Kure Ritonõpo mana Tosẽkõme enetupuhnanomo a emero.

26Naeroro kurehxo mã kure ehtoh eraximary kyya xine,

penekehpyra roropa kuakorehmatohkõ Ritonõpo a eraximaryme.

27Kure mã moro penekehpyra ehtoh waro toehse ahtao poetome ro kuahtao xine.

28Sam tykamexipose kuahtao xine Ritonõpo a, kure toiroro kuexirykomo, tehme roropa, penekehpyra kuehtohkõme.

29Osenetaonohpyra sehtone Ritonõpo neneryme,

otarame kuakorehmatorỹko mana.

30Typoihtose kuahtao xine onezuhpyra sehtone,

kueunopyrykõ seanahtotone rokene.

31Iirypyrymãkõ wãnopyry se pyra Ritonõpo mana, jũme kurumekara xine mana.

32Emynyhmatoh enehporyhtao ro kyya xine kypyno xine ro mana yronymyryme, kypyno xine aehtoh jamihme mana.

33Sam kamexipory se nymyry pyra mana,

kymynyhmaporykõ se pyra roropa mana.

34Ritonõpo zuaro mana ãpuruhpyry taõkõ tyyryhmase ahtao Izyraeu nonory po;

35Ritonõpo Imehxo Exikety zuaro mana zae pyra imehnõ riryhtao kyya xine,

zae rokẽ tyripose toto ahtao eya.

36Zuaro Ritonõpo mana zae pyra kuomirykõ ahtao imepỹ poko apiakane ẽpataka.

37Tyriry se kuehtohkõ onyrisaromepyra sytatose tyripory se pyra Ritonõpo ahtao.

38Kure ehtoh exĩko mana, popyra ehtoh roropa exĩko, Ritonõpo, Imehxo Exikety omi poe.

39Onykerekeremara ehtoko, tuãnohse awahtao xine oorypyrykõ emetakame.

40Kynyrihpyrykõ senetone, sosenetupuhtone

kueramatohkõme ropa Ritonõpo a.

41Soturutone Ritonõpo a Kapuaono a, ynara sykatone:

42“Ritonõpo, iirypyryme toehse ynanase.

Õmiry omipona pyra toehse,

moro ynanyrihpyry onykorokara ro mase.

43“Yna zehno toehse mexiase, yna tokahmase,

yna totapase roropa oya,

yna onypynanohpyra mexiase zehno oexiryke,

44Akurũ ke sã yna zehno oehtoh ke tãtapuruse mase yna otururu oya onetara oehtohme.

45Yna tonepose oya imehnõ nonory põkomo a,

popyno anonohse samo, typahsẽme rokẽ yna toehse.

46“Yna eunohnõko mã toto yna epetõkara, emero.

47Tonaroxitapãse yna,

yna apoitoh tonõ nae mana,

yna typoremãkase te, yna tonahkase roropa, enara.”

48Xitãko ase, jenuru tõ ae iporiry yhtõko, yxity, wekyry tõ enahkaryke.

49Xitakehpyra jenuru tõ mana anorypyra roropa,

yxity kuãpõko ase enahpyra samo,

50Ritonõpo osenuhmatoh pona kapu poe yna enetohme.

51Atasamãko ase ukurohtao josenetuputyryhtao nohpo tõ poko.

Mokaro ryhmary tõ enease moroto ypatary po.

52Jepetõkara, popyra ehtoh onyripyra jahtao eya xine urakanase toehse mã toto juotohme torõ pitiko samo.

53Jẽmase toto eutary aka, isene ro,

topu ke japuruase.

54Tuna tõnuhse jupuhpyry epozakoxi:

“Orihnõko ase!” tykase ywy.

55Moro eutary ae tykohtase ywy jakorehmapotohme oya, Ritonõpo.

56“Ajohpame sã jomiry etako!” tykase jahtao oya,

ykohtary metase rahkene.

57Mame tozuhse ywy oya:

“Enaromyra exiko!” mase ya moro ẽmepyry ae.

58Ritonõpo, moepyase jakorehmase,

kypynanopyase orihpyra jehtohme.

59Ritonõpo, zae jepetõkara apiakako,

zae pyra toto ehtoh waro mase yyryhmatopõpyry eya xine.

60Yzehno mokaro ehtoh waro mase,

popyra jyriry se toto ehtoh waro roropa mase.

61Ritonõpo Jesemy, jeunohtopõpyry eya xine totase oya,

tyriry se toto ehtoh waro mase emero.

62Ykerekeremary poko kohmãnõko mã toto,

zuaro mase, yyryhmary se mã toto.

63Mokaro enẽko mase,

jeunohkehpyra mã toto.

64Ritonõpo, mokaro epehmako zae rahkene,

zuãnohko toto inyrihpyrykõ emetakame.

65Popyra ehtoh enehpoko mokaro pona.

Takorehmaneke pyra tyriko toto roropa!

66Ekahmako toto, Ritonõpo, toto zehno oehtoh ke,

enahkapoko toto sero nono po!