1N sii tun teen Yennu niipoouko,

n kan ban nyik u dontiri.

2N saa pak u sanne, kimaan waa tun linba ki turin na.

Ŋaant ki binba kur ki li diimm na n gbiint kii mɔk parpeenn.

3Taantin ki tin pak Yabint Yennu.

Ŋaant ki tin lakin dont u sann.

4N miar Yennu, ki u gat ki turin,

ki fat nyinnin jaŋmaanii kur ni.

5Ki binba kur ki li diimm na kpaa numm ki goriiɔ,

ki li maŋib; bi kan ban di fei.

6Ki fara damm fabin ki turɔ,

ki u turib gatu ki nyinnib bi wahala kur ni.

7Yennu malaka guu damm nba baakit ŋɔɔ Yennu,

ki u nyintib ninbɔŋ ni.

8Bikint ki la Yennu nba ŋan biaŋinba.

Piisin be daanɔ nba kur gur u mɔŋ Yennu boor paak.

9Ii baakit Yennu, yimm nba tee u niib,

kimaan binba saak Yennu maan ki kɔŋit siar.

10Yanbɔra saa fit kɔŋ jeet, ki kon n soorib,

ŋaan binba saak Yennu maan ki kɔŋit bonŋana.

11Ii saana, n yɔɔsnba, ki tan gbiint,

ki n saa wanni ki yin baak Yennu.

12I ŋmee loon ki wun la manfoor manu?

I loon manfofoouk nan parpeenn-ii?

13Ŋann ii nyik mabiit paku, ki bia daa fa faak.

14Nyikin toonbiit, ŋaan kii tuun toonŋana.

Lomin parmaasir nan i yan kur.

15Yennu ninbina gorii niŋamm nae,

ki u tuba bia gbiin bi fabinii.

16Yennu kɔn nan binba tuun toonbiit,

ki bi-i kpo, bi sann tuu bote.

17Niŋamm na tuu fabine ki tur Yennu,

ki wun gbat ki nyintib bi daamii ni.

18Yennu naak damm nba ki bi para biir,

ki sommit binba ki mɔk dindann nan waama na.

19Niŋanɔ mɔk daamii bonchiann,

ŋaan Yennu-e nyintɔ daamii maŋ kur ni.

20Yennu-e guu u kpaba, ki nan yennkɔɔwa ki jintiri.

21Toonbiite saa kpi nɔɔnbiit damm;

ki binba ki loon niŋamm na saa la tubdatu.

22Yennu saa tinn u niib;

ki binba baat u boor ki gurin na saa la tinnu.